¹ Le nimbaeo Sekema ty Rehoboama, satria ty Israely iaby ro niavy tao Sekema mba hanao aze ho mpanjaka. ² Naharey zay Jeroboama anadahy Nebata (fa re mboe tagne Egypta, tagne amize nialane ty fiatreha Solomona Mpanjaka), satria Jeroboama nitoboke tao Egypta. ³ Naho nampagnirake vaho nikaike aze iereo, naho Jeroboama vaho reo fiangona Israely iaby niavy naho nirehake tamy Rehoboama hoe:" ⁴ Natao ty raenao mavesatre ty zioganay. Ka haivagno ty asa mafe ty raenao, naho hamaivagno ty zioga mavesatre ze nampindesene anay, le hanompo anao zahay." ⁵ Rehoboama nirehake tamiereohoe:" Mindehana zisike ty telo andro naho miheregna amiko atoy." Ka lasa ty vahoake. ⁶ Nangalake hevetre tamireo lahilahy zoke-ty ndaty ze nagnatreke i Solomona raene tamy re mboe velo ty Rehoboama Mpanjaka, naho hoe re hoe:" Ino ro torohenareo ho ahy mba hamaleako reo vahoake reo?" ⁷ Nirehake tamine iereo naho nanao hoe:"Laha ho mpanompo reo vahoake reo riha androany ka hanompo iereo, naho hamale iereo amity rehake soa, le ho mpanomponao zisikagne iereo." ⁸ Fa Rehoboama nilietse ty torohevetre ze nomea ty zoke-ty ndaty aze naho nipay hevetse tamireo ajalahy ze niarabey tamine vaho nagnatreke aze. ⁹ Hoe re tamiereo hoe:" Ino ro torohevetre omeanareo ahy ze mete havalentika reo vahoake ze nirehake vaho nanao tamiko hoe:" Haivagno ty zioga ze natobo ty raenao taminay'?" ¹⁰ Reo ajalahy ze niarabey tamy Rehoboama nirehake tamine naho nanao hoe:" Mirehafa amireo vahoake ze nirehake taminao fa i Solomona raenao le nanao ty zioga iereo ho mavesatre kanefa riha tsy maintsy hagnaiva zay. Tokone hirehake amiereo riha ho:' Ty ankihikeleko le bey noho ty valaha ty raeko. ¹¹ Ka amizao, na le nampinday zioga mavesatre anareo aza ty raeko, le mboe hagnampe ty zioganareo raho. Ty raeko nagnalilo anareo tamity karavasy fa zaho kea hagnalilo anareo amity mengoke."' ¹² Ka niavy tagne amy Rehoboama tamity andro fahatelo Jeroboama vaho ty vahoake iaby, arake ty nandilia ty mpanjaka laha fa nirehake re hoe:" Miheregna amiko eto amity andro fahatelo." ¹³ Ty mpanjaka namale ty vahoake tamity rehake mafe naho nilietse ty torohevetre ze nomea reo zoke-ty ndaty aze. ¹⁴ Nirehake tamiereo re arake ty toroheve reo ajalahy; hoe re ty hoe:" Nampinday anareo zioga mavesatre ty raeko, kanefa mboe hagnampe ty zioganareo raho. Nagnalilo anareo tamity karavasy ty raeko, fa zaho kea hagnafay anareo amity mengoke." ¹⁵ Naho le tsy nidranjy ty vahoake ty mpanjaka, fa bakamy Yaveh ze zaka zay, mba hahafahane manao ty rehane ze nirehafene tamity alala Ahia Silonita tamy Jeroboama anadahy Nebata. ¹⁶ Laha fa hisa ty Israely iaby fa tsy nidranjy iereo ty mpanjaka, le namale aze ty vahoake naho nanao hoe:" Ino ro mba anjaranay ao amy Davida? Tsy mana lova ao amity anadahy Jese zahay! Mindena agne antragnonareo, ry Israely. Amizao henteo ty fokonao, ry Davida." Le nihere tagne antragnone ty Israely. ¹⁷ Fa reo vahoake Israely ze nitoboke tao antana Joda, le i Rehoboama ro lasa mpanjaka iereo. ¹⁸ Naho i Rehoboama Mpanjaka nagnirake i Adorama, ze nifehe mpiasa antseresere, fa ty Israely iaby nitora-bato aze ka mate re. Rehoboama mpanjaka nilay malaky tagne Jerosalema niakatre tamity kalesene. ¹⁹ Laha zao Israely le niharo tamity foko Davida zisikandroany. ²⁰ Laha fa rey Israely iaby fa nihere Jeroboama le nampagnirake nampikaike aze ho ao amity fivoria iereo, naho nanao aze ho mpanjaka ty Israely iaby. Tsy nisy ndaty na raike aza nagnorike ty foko Davida, laha tsy ty foko Joda arere avao. ²¹ Laha fa niavy tao Jerosalema Rehoboama, le namory reo foko Joda vaho reo foko i Benjamina iaby; nisy lahilahy voafily 180.000 te miramila, mba hialy amity foko Israely, mba hagnere ty fanjaka Rehoboama anadahy Solomona. ²² Fa ty safan'Agnahare niavy tamy Semaia, ty lahilahin'Agnahare; voalaza hoe: "Ambarao Rehoboama anadahy Solomona, mpanjaka i Joda, ty foko Joda vaho Benjamina iaby, naho reo ndaty ambine iaby; ambarao hoe: ²⁴ 'Zao ro safa Yaveh: Ko manafike na mialy amity rahalahinao vahoake Israely riha. Ty lahilahy kirai-kiraike le tsy maintsy mihere agne amity tragnone, satria bakamiko ze zaka zao." Le nidranjy ty safa Yaveh iereo, naho nihere vaho nandrae ty lalane, naho nagnenke ty rehane iereo. ²⁵ Naho Jeroboama nagnore i Sekema teo amity tane tazoa Efraima, naho nitoboke teo. Niakatre bakao re naho nagnore i Pehoela. ²⁶ Jeroboama nanao anakam-po hoe:" Hihere ho ahy ty foko Davida ty fanjaka amizao. ²⁷ Laha miakatre mba hanao soro ao amity tempoly Yaveh ao Jerosalema reo vahoake reo, le hihere amity tompo iereo, le amy Rehoboama mpanjaka Joda ndraike ty arofo reo vahoake reo. Hamono ahy iereo ka hihere amy Rehoboama mpanjaka Joda." ²⁸ Naho Rehoboama mpanjaka nipay hevetre naho nagnamboatre anak'agnombe volamena roe; le hoe re tamity vahoake:" Sarotre ho anareo ty hiakatre hoagne Jerosalema. Ingo, toa ty zagnaharenareo, ry Israely, ty ninday anareo niakatre niala ty tane Egypta." ²⁹ Natobone tao Betela ty raike naho ty hafa tagne Dana. ³⁰ Naho le lasa hadisoa ze fihetseke zay. Ty vahoake nindeha tamity raike na ty hafa, tamity lala iaby mbaeo Dana. ³¹ Jeroboama nagnore reo tragno tamity toera abo naho nanendre mpisoro bakamireo vahoake iaby, zay tsy bakao amireo anadahy Levy avao kea re. ³² Nanendre andro fifalea ty Jeroboama tamity vola fahavalo, tamity andro faha dime amby folo ty vola, manahake ty hafalea te agne Joda, naho niakatre tegne amity alitara re. Tagne Betela ro nanovane zay, nanao soro tamity anak'agnombe ze namboarene, naho natobone tagne Betela reo mpisoro tao amity toera abo ze nataone. ³³ Niakatre tagneamity alitara ze namboarene tao Betela ty Jeroboama tamity andro faha dime ambifolo tamity vola fahavalo, tamity vola ze nihevere ty saine avao; nanendre andro fifalea ho ahy ty vahoake Israely re, naho niakatre tagne amity alitara mba hagnoro liten-ketae magnitse.