¹ Nisy lahilahin'Agnahare bakagne Joda niavy tao Betela noho ty safa Yaveh. Nitsanga teo agnila ty alitara ty Jeroboama mba hagnoro liten-ketae magnitse. ² Nikorake tamity alitara noho ty safa Yaveh re hoe:" Alitara! Alitara! Zao ro nambara Yaveh hoe:' Ingo, hisy lahilahy atao ty hoe Josia haterake amity foko Davida, naho eo aminao ro hanovane soro mpisoro amity toera abo vatane ze magnoro liten-ketae magnitse eo aminao amizao. Hagnoro taolan'ondaty eo aminao iereo."' ³ Bakeo ty lahilahin'Agnahare nagnomea famantara tamy andro igne avao, nanao hoe:" Zao ro famantara nirehafe Yaveh:' Ingo, hizara ty alitara, naho hirarake ty lavenoke amine eo."' ⁴ Laha fa rey ty mpanjaka ze nirehafe ty lahilahin'Agnahare, fa nikaike mafe nandietse ty alitara tao Betela re, le namototre ty tagnane bakeo amity alitara ty Jeroboama, nanao ho:" Trepaho re." Bakeo mate ty tana ze vinotone tamity lahilahy, ka tsy afake nagnemotre zay hihere sase re. ⁵ (NIzara avao kea ty alitara naho niarake bakeo amity alitara ty lavenoke, arake ty voafary ty famantara ze nomea ty lahilahin'Agnahare noho ty safa Yaveh.) ⁶ Namale Jeroboama Mpanjaka nhao nirehake tamity lahilahin'Agnahare hoe:" Mangataha saotre amy Yaveh Zagnaharenao, naho mivavaha ho ahy, mba hihere amiko ndraike ty tanako." Laha zao le nivavake tamy Yaveh ty lahilahin'Agnahare, naho nihere tamine ndraike ty tana ty mpanjaka, naho lasa manahake ty taloha zay. ⁷ Hoe ty mpanjaka tamity lahilahin'Agnahare hoe:" Andao holy miarake amiko ka mba hitofa, naho homeako valesoa riha." ⁸ Hoe ty lahilahin'Agnahare tamity mpanjaka hoe:" Na le homeanao ahy aza ty antsasa ty fanagnanao, le tsy hindeha hiarake aminao raho, na hihinan-kane na hinon-drano amity toera toy, ⁹ satria Yaveh nandily ahy tamity rehane hoe:' Tsy hihina mofo na hinon-drano riha, na hihere amity lala ze niboahanao."' ¹⁰ Laha zao le nindeha tamity lala hafa ty lahilahin'Agnahare naho tsy nihere tagne antragnone tamity lala ze nombane ho agne Betela. ¹¹ Naho nisy mpaminane antetre raike nitoboke tao Betela, naho niavy ty raike tamireo anadahine ka nirehake tamine ty zaka iaby ze vita ty lahilahin'Agnahare tao Betela tamio andro o. Nirehafe i anagney tamine kea reo rehake ze nirehafe ty lahilahin'Agnahare tamity mpanjaka. ¹² Hoe ty rae iereo tamiereo hoe:" Aia ro lala nombane?" Naho hisa ty anane ty lala nomba ty lahilahin'Agnahare bakagne Joda. ¹³ Laha zao le hoe re tamireo anadahine hoe:" Asio lasele ho ahy ty borike." Ka le nasia iereo lasele ty borike naho nitikitse re. ¹⁴ Nagnorike ty lahilahin'Agnahare ty mpaminane antetre ka nahisake aze nitoboke teo ambane ty hetae terebinta; naho hoe re tamine:" Iriha vao ty lahilahin'Agnahare bakagne Joda?" Le namale re hoe:" Izaho vatane." ¹⁵ Bakeo nirehake tamine ty mpaminane antetre hoe:" Andao hiarake amiko agne antragno naho hihinan-kane." ¹⁶ Le namale ty lahilahin'Agnahare hoe:" Tsy hindeha hiarake aminao raho na hilitse hiarake aminao, na hihinan-kane na hinon-drano miarake aminao amize toera zay, ¹⁷ satria nandilia ahy tamity safa Yaveh zay hoe:' Tsy mahazo mihina sakafo na minon-drano agne riha, na mihere amity lala ze nandehananao."' ¹⁸ Le hoe ty mpaminane antetre tamine hoe:" Mpaminane manahake anao kea raho, naho nisy anjele nirehake tamiko noho ty safa Yaveh, nanao hoe:' Ento mihere agne antragnonao miarake aminao re, mba hahafahane mihinan-kane vaho minon-drano."' Kanefa navande tamity lahilahin'Agnahare re. ¹⁹ Laha zao le nindeha nihere niarake tamity mpaminane antetre ty lahilahin'Agnahare naho nihinan-kane tao antragnone vaho ninon-drano. ²⁰ Laha nitoboke teo andatabatre iereo, le niavy tamity mapminane ze ninday aze nihere ty safa Yaveh, ²¹ naho nikorake tamity lahilahin'Agnahare ze bakagne Joda re, nanao ty hoe:" Hoe Yaveh ty hoe:' Satria tsy nanenke ty reha Yaveh riha naho tsy niambe ty lily ze nomea Yaveh anao, ²² fa nihere vaho nihinan-kane vaho ninon-drano tao amity toera ze nirehafe Yaveh anao mba tsy hihinana hane na hinoma rano, le tsy haleve agne amity kibory reo razambeinao ty vatanao." ²³ Laha fa baka nihinan-kane vaho laha fa baka nino re, le nasia ty mpaminane lasele ty borike ty lahilahin'Agnahare, ty lahilahy ze nihere niarake tamine. ²⁴ Laha fa lasa ty lahilahin'Agnahare, le nisy liona nifanoje tamine tegne andala naho namono aze, ka nenga teo andala ty fatene. Bakeo ty borike nitsanga teo agnila zay, naho ty liona avao kea le nitsanga teo agnila ty fate. ²⁵ Laha fa nandrio teo ty ndaty ka nahisake ty fate tavela teo andala, naho ty liona nitsanga teo agnila ty fate, le nindeha iereo naho nirehake zay tagne amity tana ze nitoboha ty mpaminane antetre. ²⁶ Laha fa rey ty mpaminane ze ninday aze nihere tamity lala zay, le heo re hoe:" Ty lahilahin'Agnahare ze tsy nanenke ty safa Yaveh zay. Laha zao le nomea Yaveh ty liona re, ze namiravira aze naho namono aze, arake ty nampiambena ty safa Yaveh aze." ²⁷ Ka nirehake tamireo anane lahy ty mpaminane, nanao ty hoe:" Asio lasele ty borikeko,' le nasia iereo lasele zay. ²⁸ Nindeha re naho nahisake ty fate tavela tagne andala, naho ty borike vaho ty liona nitsanga teo agnila ty fate. Tsy nihane ty liona ty fate, na nivinonone ty ampondra. ²⁹ Nalae ty mpaminane ty fate ty lahilahin'Agnahare, nampandrene teo amity borike zay, naho nientene nihere. Niavy tagne amity tanane arere re mba handala vaho handeve aze. ³⁰ Nampandrene tao amity kibory arere ty fate, naho nandala aze iereo, nanao ty hoe:" Feie, ry rahalahiko!" ³¹ Laha fa baka nandeve aze iereo, le nirehake tamireo anane lahy ty mpaminane antetre, nanao hoe:" Laha fa mate raho, le alevegno ao amity kibory ze nandevegna ty lahilahin'Agnahare. Ampandreo eo agnila ty taolane ty taolako. ³² Satria ty hafatre ze nambarane noho ty safa Yaveh, tamity alitara tao Betela vaho tamireo tragno iaby agne amity toera abo agne amireo tana Samaria, le hiseho vatane." ³³ Tafaragnio le tsy niala tamity fomba ratine Jeroboama, fa mboe nanohy nanondro mpisoro bakamity foko ndaty ho amity toera ambone avao. Ze tahanompo le natokane ho mpisoro. ³⁴ Lasa hadisoa tamity longo i Jeroboama vaho nahavy ty longnone ho poteke vaho rava teto ambone ty tane zay.