1 Tamize andro zay le nanare mafe Abia anadahy Jeroboama. 2 Hoe Jeroboama tamity valine hoe:" Mirsangana rie naho magnova toera, mba tsy ho hay ty ndaty fa valiko riha, naho mindehana agne Silo, fa agne ro misy i Ahia mpaminane; ie ty nirehake ty momba ahy, nirehake fa lasa mpanjaka reo ndaty reo raho. 3 Mindaisa mofo folo, mofomamy tsiampe, vaho tantele tavoara raike, naho mindehana agne amy Ahia. Hitalily aminao ze hiseho amio kolo o re." 4 Nanoe ty valy Jeroboama zay; le lasa re naho nindeha nimbaeo Silo, naho niavy tao antragno Ahia. Naho tsy nahisake ty Ahia; tsy nahisake sase re noho ty fianterane. 5 Hoe ty Yaveh tamy Ahia hoe:" Ingo, ho avy eto aminao ty valy Jeroboama mba hipay toro-hevetre mikasike ty anane lahy, satria marare re. Zao iaby rehafe amine, satria laha fa avy re, le kisare hanao ampela hafa re." 6 Laha fa rey Ahia ty feo ty tombone laha re nilitse ty varavara ay, le hoe re ty hoe:" Milira, ry valy Jeroboama. Nagnino riha ro kisare manao ndaty hafa? Nirahe hitalily vaovao raty ho anao raho. 7 Mindehana, ambarao Jeroboama fa Yaveh, ty Zagnahare Israely, le nanao ty hoe:' Nakareko tamireo ndaty riha mba hahavy anao ho mpitarike ty vahoake Israely. 8 Nafahako teo amity foko Davida ty fanjaka naho nameako anao zay, nefa riha le tsy manahake Davida mpanompoko Davida, niambe ty liliko naho nagnorike ahy tamity arofone iaby, mba tsy hanao laha tsy ty mare eo amasoko. 9 Fa riha kea le nanao raty, mihoatre noho reo iaby nagnoloa anao. Riha le nanao zagnahare hafa, nanao saren-jaka an-indy mba hahameloke ahy, naho nagnafake ahy ho ao andambosinao. 10 Laha zao, ingo, hinday loza amity fokonao raho; handrava ty ajalahy iaby ao Israely raho, na ty ndevo na ty afake, naho hamoa vatane ty fokonao, manahake ty ndaty magnoro zezeke zisike ty hirava zay. Na ia ia ty fokonao ze mate ao amity tana le ho hane reo amboa, naho na ia ia mate agne ambaibo le ho hane reo voro ty lagnitse satria Izaho, Yaveh ro le fa nirehake zay.' 12 Ka mitsangana, ry valy Jeroboama naho miheregna agne antragnonao; laha fa militse ao amity tana ty tombonao, le ho mate ty Abia. 13 Handala vaho handeve aze ty Israely iaby. Re avao ro arere bakamity foko Jeroboama haleve ao agnate kibory, satria tao amine arere avao, bakao amity tragno Jeroboama, ro nahisaha zaka soa teo amaso Yaveh, ty Zagnahare Israely. 14 Yaveh avao kea le hagnakatre mpanjaka Israely raike ze handrava ty foko Jeroboama amio andro o. Androany ze andro zay, zao dieny zao. 15 Fa YAveh le hanafike Israely manahake ty volotara hozogne ty rano, naho re le hagnombotre Israely hiala eo amio tane soa ze nomeane ty razambey iereo o. Hanjara iereo agne andafe ty rano Efrata re, satria nanao baon'Aseraha iereo naho nahameloke Yaveh. 16 Re le hiala Israely noho reo hadisoa Jeroboama, reo hadisoa ze nataone, vaho nitarihane Israely mba hanonta." 17 Le nitsanga ty valy Jeroboama ka nindeha, naho niavy tao Tirza. Laha niavy teo ambaravara ty tragnone ra, le mate ty kolo. 18 Nandeve vaho nandala aze ty Israely iaby, arake ty le fa nirehafene tamiereo arake ty reha Yaveh ze nambarane tamity alala Ahia mpaminane mpanompone. 19 Naho reo zaka hafa mikasike Jeroboama, ty nagnaramane aly vaho nanjakane, le ingo, sinoratre tao amity boke ty tantara ty mpanjaka Israely reo. 20 Nanjaka roe amby roapolo tao Jeroboama naho nimate niarake tamireo razambeine, naho Nadaba anane lahy ro lasa mpanjaka teo amity toerane. 21 Naho Rehoboama ana i Solomona ro nanjaka tao Joda. Raike amby efapolo tao Rehoboama ro lasa mpanjaka, naho nanjaka fito amby folo tao tamy Jerosalema re, ty tana ze finily Yaveh tamity foko Israely iaby hagnisia ty agnarane. Ty agnara ty renene le Nama Amonita. 22 Nanao ze raty amaso Yaveh ty Joda; nanao hasarota ho aze ty hadisoa natao iereo, mihoatre naho ty zaka iaby ze le fa natao ty razambey iereo. 23 Fa iereo avao kea le nagnamboatre toera abo ho ahy ty vatagniereo, tsangam-bato, naho baon'Aseraha magnera ty vohitse vaho tegne ambane hetae maintso. 24 Nisy kea reo lahilahy nivaro-bata tao amity tane. Nanao reo zakaraty fatao ty firene ze niroahe Yaveh teo agnoloa ty vahoake Israely iereo. 25 Naho tamity fahadime tao nanjaka Rehoboama mpanjaka ro niavy nanafike i Jerosalema ty Sisaka mpanjaka i Egypta. 26 Nalaene iaby reo harea tao antragno Yaveh, vaho reo harea tao antragno ty mpanjaka. Nalaene iaby ty zaka iaby; nalaene avao kea reo ampinga volamena iaby ze namboare Solomona. 27 Nanao ampinga varahy teo amity toera iereo avao kea i Rehoboama mpanjaka naho nametrake reo teo antagna reo mpifehe ty mpiambe, ze niambe ty varavara ty tragno ty mpanjaka. 28 Isake ty nilitse tao antragno Yaveh ty mapanjaka, le nondrone reo mpiambe reo; naho niente iereo nihere tao amity tragno ty mpiambe. 29 Naho reo zaka hafa mikasike Rehoboama, vaho ze nataone iaby, feie vao tsy le fa voasoratre ao agnate ty boke ty tantara ty mpanjaka i Joda reo? 30 Nisy aly zisikefarane teo amy Rehoboama vaho Jeroboama. 31 Ka nimate niarake tamireo razambeine ty Rehoboama naho niarake naleve tamiereo tao amity tana Davida. Ty agnara ty renene le i Nama amonita. Abia anane lahy ro lasa mpanjaka teo amity toerane.