¹ Tamity tao fahavalo amby folo nanjaka Jeroboama anadahign'i Nebata, le nanomboke nanjaka teo amy Joda ty Abia. ² Nandily telo tao tamy Jerosalema re. Imaka ro agnara ty renene. Anak'ampela Adsaloma re. ³ Nindeha tamity hadisoa iaby ze nataon-draene taloha ty androne re; ty arofone le tsy mba voatoka ho ahy Yaveh Zagnaharene manahake ty arofo Davida, razambeine. ⁴ Na zay aza, naho ty amy Davida, Yaveh Zagnaharene le nagnomea fanilo aze tagne Jerosalema tamity alala ty fanangana ty anane hisolo aze mba hahamafe i Jerosalema. ⁵ Nataon'Agnahare zay satria Davida le nanao ty mare teo amasone; zisike ty andro iaby niaignane, tsy mba nivio tamize iaby nandiliane aze re, laha tsy tamity raraha Oria Hetita avao. ⁶ Naho nisy aly teo amy Rehoboama vaho Jeroboama zisike ty androm-piaigna Abia iaby. ⁷ Ty amy reo raraha hafa mikasike Abia, le ze nataone iaby, feie tsy le fa voasoratre ao amity boke ty tantara ty mpanjaka Joda vao reo? Nisy aly teo amy Abia vaho Jeroboama. ⁸ Nimate niarake tamireo razambeine Abia, naho le naleve iereo tagne amity tana Davida re. Asa anane ro lasa mpanjaka teo amity toerane. ⁹ Tamity tao faha roapolo nanjaka Jeroboama mpanjaka Irsaely, le nanomboke nanjaka teo amy Joda ty Asa. ¹⁰ Nandily zisike ty raike amby efapolo tao tamy Jerosalema re. Imaka ro agnara ty zazane, ty anak'ampela i Absaloma. ¹¹ Nanao ty mare teo amaso Yaveh ty Asa, hoe ty natao i Davida razambeine. ¹² Rinoane tsy ho amity tane reo lahilahy mpitsangatsanga amity fanompoan-tsampe ze natao reo razambeine. ¹³ Nafahane tamity maha-mpanjaka vave aze kea ty Maka, zazane, satria re nagnamboatre sampe raty bakamity baon'Ashera. Tinampa Asa ty sampe raty ka noroane tagne ambaibon-driake Kidrona. ¹⁴ Fa reo fitoboha abo tsy mba nafahane. Na zay aza, ty arofo Asa le voatoka ho ahy Yaveh vatane zisike ty androne iaby. ¹⁵ Nientene ho agne antragno Yaveh ty zaka ze voatoka ty raene, vaho reo zaka ze voatoka vita tamity volafoty vaho volamena, naho reo enta. ¹⁶ Nisy aly teo amy Asa vaho Basa mpanjaka Israely, tamity andro iereo iaby. ¹⁷ Nanao rehareha tamy Joda ty Basa mpanjaka Israely ka nananga i Rama, mba tsy hiengane ty ndaty hiala na hilitse ao amity tane Asa mpanjaka Joda. ¹⁸ Naho le nalae Asa ty volafoty vaho volamena iaby sisa tao amireo efetre famoria tao amity tragno Yaveh, vaho reo efetre famoria ty lampa ty mpanjaka. Nataone teo antagna reo mpanompone naho nampagnaterene ho ahy Beni-hadada anadahy Tabrimoma anadahy Heziona, mpanjaka i Syria, ze nitoboke tagne Damaskosy zay. Hoe re: ¹⁹ "Ao hisy fifagnenkea amiko vaho aminao, manahake ze nisy teo amity raeko vaho ty raenao. Ingo, le fa nampanese ho anao raho. Ravao ty fegnenkeanao vaho Basa mpanjaka Israely, mba hialane amiko." ²⁰ Nidranjy i Asa mpanjaka Beni-hadada ka nandefa reo mpifehe ty tafine, naho le nanafike ty tana Israely iereo. Nanafike i Iona, Dana, Abelabeti-maka, naho ty Kinerota iaby, niarake tamity tane Naftaly iaby iereo. ²¹ Naho laha fa rey Basa zay le najanone ty fanangana i Rama naho nihere tagne Tirza re. ²² Naho le nanao fagnombara teo amy Joda iaby ty Asa mpanjaka. Tsy nisy na raike afake niala. Nalae iereo iaby reo vato vaho ty hetae Rama ze nagnoregna i Basa ty tana. Naho le nampiasae Asa mpanjaka zay zaka fagnamboara zay mba hanangana i Geba i Benjamina vaho Mizpa. ²³ Ty amireo zaka hafa mikasike Asa, ty herene iaby, ze nataone iaby, reo tane naorene iaby, feie tsy le fa voasoratre ao amity boke ty tantara ty mpanjaka Joda vao reo? Kanefa zisike ty androm-pianterane le narare tamity tombone re. ²⁴ Naho nimate niarake tamireo razambeine ty Asa ka le naleve niarake tamiereo tao amity tana Davida raene. I Josafata anane lahy ro lasa mpanjaka nisolo aze. ²⁵ Nadaba anadahy Jeroboama nanomboke nanjaka tamy Israely tamity tao faharoe nanjaka Asa mapanjaka Joda; nanjaka tamy Israely zisike ty roe tao re. ²⁶ Nanao ty raty tamaso Yaveh re naho nindeha tamity lalan-draene, vaho tamity hadisoane, ze nitarihane ty Israely hanonta. ²⁷ Basa anadahy Ahia, bakamity foko Isakara, navande handietse i Nadaba; vinono Basa tao Gibetona, ze ahy reo Filist ina re, satria Nadaba vaho ty Israely iaby nanao faherano tagne Gibetona. ²⁸ Tamity tao fahatelo nanjaka Asa mpanjaka Joda, le namono i Nadaba ka lasa mpanjaka teo amity toerane. ²⁹ Laha vaho lasa mpanjaka re, le vinono Basa ty foko Jeroboama iaby. Tsy nisy nengane ty fiay ty foko Jeroboama; ze fomba zay ro nandravane ty foko ty mpanjaka, arake ze natalily Yaveh tamy Ahia Silonita mpanompone, ³⁰ noho reo hadiosa Jeroboama ze nataone vaho ty nitarihane ty Israely hanonta, satria nipay ty helo Yaveh, ty Zagnahare Israely re. ³¹ Ty amity zaka hafa mikasike i Nadaba, vaho ze nataone iaby, feie tsy le fa voasoratre ao amity boke ty tantara ty mpanjaka Israely vao reo? ³² Nisy aly teo amy Asa vaho Basa mpanjaka Israely tamity andro iereo iaby. ³³ Tamity tao fahatelo nanjaka Asa mpanjaka Joda, le nanomboke nanjaka teo amy Israely iaby tagne Tirza ty Basa anadahy Ahia naho nanjaka zisike ty efetre amby roapolo tao re. ³⁴ Nanao ze raty teo amaso Yaveh re naho nagnorike ty fomba i Jeroboama vaho ty hadisoane ze nitarihane ty Israely hanonta.