¹ Avy tamy Jeho ana i Hanany ty safa Yaveh handietse Basa, nanao ty hoe: ² "Na le fa nagnafake anao hiala amity deboke aza raho vaho nanao anao ho mpitarike eo amy Israely vahoakeko, le fa nagnorike ty fomba Jeroboama riha naho nampanonta Israely vahoakeko, mba hahameloke ahy amity hasisoa iereo. ³ Ingo, haravako vatane ty Basa vaho ty fokone naho hanao ty fokonao ho hoe ty foko i Jeroboama ana i Nebata raho. ⁴ Nihane reo amboa ty ndaty Basa ze mate ao antana, naho reo voro ty lagnitse le nihina ty ndaty ze mate egne ambaibo." ⁵ Ty amireo zaka hafa mikasike Basa, ze nataone, vaho ty herene, feie vao rey tsy le fa voasoratre ao amity boke ty tantara reo mapanjaka Israely reo? ⁶ Nimate niarake tamireo razambeine ty Basa naho naleve tagne Tirza, naho Elaha anane ro lasa mpanjaka teo amity toerana. ⁷ Le niavy nandietse Basa vaho ty fokone ty safa Yaveh tamity alala Jeho mpaminane ana i Hanany, noho ty raty iaby ze nataone teo amaso Yaveh, mba hahameloke aze amity asa ty tagnane, manahake ty foko Jeroboama, naho satria le fa namono ty foko i Jeroboama iaby avao kea re. ⁸ Tamity fahaene amby roapolo tao nanjaka Asa mpanjaka Joda, le nanomboke nanjaka teo amy Israely tagne Tirza ty Ela ana i Basa; nanjaka zisike ty roe tao re. ⁹ Zimry mpanompone, kapitene ty ila ty kalesene, le nihevetre handietse aze. Naho tagne Tizra ty Ela, nagnamamo ty vatane ao antragno i Arza, ty teo amity foko Tirza. ¹⁰ Le nilitse ty Zimry, nanafike vaho namono aze, tamity hafa fito amby roapolo tao nanjaka Asa mpanjaka i Joda, ka lasa mpanjaka nisolo ty toerane. ¹¹ Laha fa nanomboke nanjaka vaho natoboke teo amity sezan-droandria Zimry, le namono ty foko i Basa iaby re. Tsy nagnenga lahilahy raike tamity longo vaho nama Basa ho velo re. ¹² Ka rinava Zimry ty foko Basa iaby, arake ty safa Yaveh ze nirehafene handietse i Basa tamity alala Jeho mpaminane, ¹³ noho ty hadisoa Basa iaby vaho ty hadisoa Ela anane ze natao iereo, vaho ty nitariha iereo ty Israely hanonta, mba ho nahafaha iereo nipay Yaveh, ty Zagnahare Israely, mba ho meloke amity sampe iereo. ¹⁴ Ty amireo zaka mikasike i Ela, iaby ze nataone, feie vao rey tsy le fa voasoratre tao amity boke ty tantara reo mpanjaka Israely? ¹⁵ Tamity fahafito amby roapolo tao nanjaka Asa mpanjaka Joda, le nanjaka tagne Tirza zisike ty fito andro avao ty Zimry. Naho nitobe tao Gibetona, ze ahy reo Filistina ty tafike. ¹⁶ Reo tafike nitobe tagne le naharey ty rehake hoe:" Nimenomeno Zimry naho le fa namono ty mpanjaka." Ka tamize andro zay tagne antobe, ty Israely iaby le nagnombara i Omry, ho mpifehe ty tafike, ho mpanjaka eo amy Israely. ¹⁷ Nindeha niakatre bakagne Gibetona Omry vaho reo Israely iaby niarake tamine, naho nanao faherano i Tirza iereo. ¹⁸ Laha fa hisa Zimry fa le azo ty tana, le nilitse tao amity fiaro mafe ze niharo tamity lampa ty mpanjaka re naho nagnoro ty tragno teo amine; tamize fomba zay ro nifatezane tao agnate afo. ¹⁹ Zay le naho ty hadisoa vitane tamity fanova raty teo amaso Yaveh, tamity fagnoriha ty foma Jeroboama vaho tamity hadisoa ze le fa nataone, mba hitarike ty Israely hanonta. ²⁰ Laha ty amireo zaka hafa mikasike i Zimry, vaho reo fivaliha ze nataone, feie vao reo tsy le fa voasoratre ao amity boke ty tantara reo mpanjaka Israely? ²¹ Bakeo le zinarane ho toko roe reo vahoake Israely. Nagnorike i Tibny ana i Ginata ty ila ty vahoake, mba hanao aze ho mpanjaka, naho ty ilane nagnorike Omry. ²² Fa nahere naho reo ndaty nagnorike Tibny ana i Ginata reo ndaty nagnorike Omry. Ka mate Tibnia; naho lasa mpanjaka ty Omry. ²³ Nanmboke nanjaka teo amy Israely tamity hafa raike amby telopolo tao nanjaka Asa mpanjaka Joda ty Omry, naho nanjaka zisike ty roe amby folo tao. Nanjaka tagne Tirza zisike ty enen-tao re. ²⁴ Viniline tamy Samera tamity talenta volafoty roe ty tazoa Samaria. Nagnore tana teo amity tazoa re naho nanao ty agnara ty tana hoe Samaria, arake ty agnara Samera, ty tompo ty tazoa taloha. ²⁵ Nanao ze raty teo amaso Yaveh ty Omry naho raty fagnahy mihoatre iaby ze teo alohane. ²⁶ Fa nindeha tamity lala iaby i Jeroboama ana Nebata vaho ty hadisoane ze nitarihane ty Isarely hanonta, mba hipay Yaveh, ty Zagnahare Israely, mba ho meloke amity sampe iereo ze tsy misy antone re. ²⁷ Laha ty amity zaka hafa mikasike ze natao Omry, vaho ty here ze nasehone, feie tsy le fa voasoratre ao amity boke ty tantara reo mpanjaka Israely vao reo? ²⁸ Ka le nimate niarake tamireo razane ty Omry naho naleve tagne Samaria naho Ahaba anadahine ro lasa mpanjaka nisolo ty toerane. ²⁹ Tamity fahavalo amby telopolo tao nanjaka Asa mpanjaka Joda, le nanomboke nanjaka reo amity Israely Ahaba ana i Omry. Nanjaka teo amity Israely tao Samaria zisike ty roe amby roapolo tao ty Ahaba ana i Omry. ³⁰ Nanao ze raty teo amaso Yaveh Ahaba ana i Omry, mihoatre noho reo iaby ze talohane. ³¹ Zaka tsy nisy dikane tamy Ahaba ty nindeha tamity hadisoa Jeroboama ana i Nebata, ka le nalaene ho valine ty Jezebela anak'ampela Etibala, mpanjaka reo Sidoniana; nindeha naho nanompo i Bala re ka nihohoke tamine. ³² Nagnore alitara ho ahy Bala tao antragno Bala re, ze naorene tagne Samaria. ³³ Le namboatre baon'Aseraha ty Ahaba. Mboe nanao mihoatre noho zay aza Ahaba mba hahameloke Yaveh, ty Zagnahare Israely, mihoatre reo mpanjaka Israely iaby talohane. ³⁴ Zisike ty fitondra Ahaba, le nagnere nagnore i Jeriko ty Hiela bakagne Betela. Hiela le nametrake ty foto ty tana tamity arofo Abirama, anadahine voalohane; naho Segoba, faralahine; le namoe ty fiaine laha nagnoregnane reo vavahady ty tana, arake ty safa Yaveh ze nirehafene tamy Josoa ana i Nona.