¹ Elia Tisbita, bakagne Tisba agne Gileada, nirehake tamy Ahaba ty hoe:" Laha mboe velo kea Yaveh, ty Zagnahare ty Israely, ze nitsanganako eo agnoloane, le tsy hisy mika na ora amity tao toy laha tsy mirehake zay raho." ² Niavy tamy Elia ty reha Yaveh, nanao ty hoe: ³ "Miala teo naho mindehana manignana; mihaja ao amity baibon-driake Kerita, antignana Jordana. ⁴ Naho hino ty rano bakao amity baibon-driake riham, naho le fa nandily reo goake raho hamaha anao agne." ⁵ Ka nindeha ty Elia naho nanao arake ze nandilia ty safa Yaveh. Nindeha re mba hitoboke eo amity baibon-driake Kerita, antignana Jordana. ⁶ Ninday mofo vaho hena ho ahy reo goake ty maray naho mofo vaho hena ty hariva, naho nino tamity baibon-driake re. ⁷ Fa laha fa afake kele le maike ty baibon-driake satria tsy nisy ora tamity tane. ⁸ Niavy tamine reo safa Yaveh, manao ty hoe:" ⁹ "MItsangana, mindehana agne Zarefata, zay agne Sidona, naho mitoboha agne. Ingo, le fa nandily mpivembata tagne raho mba hampihina anao." ¹⁰ Ka nitsanga re naho nindeha tagne Zarefata, naho lafa fa niavy teo ambavahady ty tana re le nisy mpivembata raike namory tapa-ketae teo. Le nikaike iereo naho nanao ty hoe:" Mba hindaisanao rano kele agnate siny rie raho mba hinomako." ¹¹ Laha nindeha hangalake rano re le nikaike aze re, naho hoe re:" Mba andaiso mofo raike egne antagnanao rie raho." ¹² Le namale aze re hoe:" Laha mboe velo kea Yaveh Zagnaharenao, le tsy mana mofo raho, fa sakafo feno ty tagna agnate siny vaho menake kele agnate tavoara avao. Ingo, mamory tsila-ketae roe raho mba hahafahako militse ao le mahandro zay ho ahy vaho ahy ty anako, mba hihinananay zay, naho ho mate." ¹³ Hoe Elia tamine:" Ko matahotre. Mindehana naho anovo arake ze le fa nirehafene, nefa anovo mofo kele raho aloha naho ento miakatre eto amiko zay. Naho laha fa vita zay le manova ho anao vaho ho ahy ty ananao. ¹⁴ Fa Yaveh, ty Zagnahare ty Israely, manao ty hoe:' Tsy ho rava ty sinin-kane, na hijano hily ty tavoara ty menake, zisike hiavia ty andro hampipoha Yaveh ty ora eto antane." ¹⁵ Le nanao arake ze nirehafe Elia tamine re. Re vaho Elia, niarake tamity fokone, le nihina zisike ty andro maro. ¹⁶ Tsy rava ty sinin-kane, na nijano nily ty tavoara ty menake, arake ze le fa nirehafe ty safa Yaveh, arake ze rehafene tamy Elia. ¹⁷ Tafara reo zaka reo, le narare ty ana rampela, ty tompo ty tragno. Tena nahere vatane ty aretene ka tsy niay sase re. ¹⁸ Ka hoe ty renene tamy Elia:" Ino ro hasahiranao amiko, ry lahilahin'Agnahare? Niavy amiko eto mba hampahatiaro ahy ty hadisoako naho hamono ty anako vao riha?" ¹⁹ Le namale aze Elia ty hoe:" Ameo ahy ty anako lahy." Nalaene tamity sandrine ty ajalahy naho nientene niakatre tao amity efetre ze nijanognane, naho nampiroroene teo amity fandreane ty kolo. ²⁰ Nikorake tamy Yaveh re naho nanao ty hoe:" Yaveh Zagnahareko o, feie vao ninday loza teo amity mpivembata ze hijanognako avao kea riha, tamity famonoa ty anane?" ²¹ Bakeo le namototre ty tagnane intelo teo amity kolo Elia; nikorake mafe tamy Yaveh re naho nanao ty hoe:" Yaveh Zagnahareko o, mangatake aminao raho, engao rie hihere ao amine ty fiay ty kolo toy." ²² Nidranjy ty feo Elia Yaveh; ka nihere tamine ty fiay ty kolo, naho velo ndraike re. ²³ Nalae Elia ty kolo naho nientene niakatre tao amity efetragnone hizotro ho ao antragno; le natolone ty rene ty kolo naho hoe re:" Ingo, velo ty ananao." ²⁴ Hoe rampela tamy Elia:" Amizao haiko fa lahilahin'Agnahare riha, naho ty safa Yaveh ambavanao ao le mare."