¹ Naho laha fa afake andro maromaro le niavy tamy Elia ty safa Yaveh, tamity tao fahatelo ty main-tane, nanao ty hoe:" Mindehana, misehoa amy Ahaba le handefa ora amity tane raho." ² Nindeha niseho tamy Ahaba Elia; naho mafe ty kere tagne Samaria. ³ Ahaba nikaike Obadia, ze nita ty lampa. Naho Obadia le nagnomea hasy Yaveh vatane, ⁴ ka laha fa namono reo mpaminane Yaveh Jezebela, le nangalake reo mpaminane zato naho nagnaja iereo isan-dimampolo tao andavabato naho namaha iereo tamity mofo vaho rano ty Obadia. ⁵ Naho heo Ahaba tamy Obadia:" Mindehana mitete ty tane zisikagne amity loharano vaho reo baibon-driake iaby. Fa mete hahisake akata-maintso hameloma ty soavale vaho ty ampondra tika, mba tsy hisy ho robake ty biby hare iaby." ⁶ Ka nifampizara iereo ty tane mba hindehanane amizay naho hipaiane rano. Ahaba nindeha tamity lala raike naho Obadia nindeha tamity lala hafa. ⁷ Laha mboe tegne andala Obadia, le nifanoje tampoke tamy Elia re. Obadia nahay aze ka nagnohoke ty vatane tamity tane. Hoe re ty hoe:" Riha vao toy, ry Elia tompoko?" ⁸ Elia namale aze hoe:" Izaho toy. Mindehana rehafo ty tomponao ty hoe:' Ingo, ato Elia."' ⁹ Le namale Obadia ty hoe:" Ino ro hadisoako, ro atolonao eo antagna Ahaba ty mpanomponao, mba hamonoane ahy? ¹⁰ Laha mboe velo kea Yaveh Zagnaharenao, le tsy misy firene na fanjaka ze tsy nandefasa ty tompoko ndaty hipay anao. Na mbia mbia ro misy firene na fanjaka manao ty hoe:' Tsy ato Elia, le ampanove Ahaba fifanta hifanta fa tsy nahisake anao iereo. ¹¹ Nefa amizao hoe riha:' Mindehana, rehafo ty tomponao fa atia Elia.' ¹² Vatane vaho miala aminao raho, ty fagnahy Yaveh hinday anao agne amity toera tsy haiko. ka laha hindeha raho naho hirehake amy Ahaba, naho laha tsy hahisake anao re, le ho vonoene raho. Kanefa izaho, mpanomponao, le nanompo Yaveh hatramity hakeleako. ¹³ Feie tsy nirehafene taminao vao, ry tompoko, ze nataoko laha fa vinono Jezebela ty mpaminane Yaveh, ty fomba nagnajako ty mpaminane Yaveh zato ka dimampolo iaby ro tao agnate lava-bato vaho ty namahanako mofo vaho rano iereo? ¹⁴ Amizao hoe riha amiko:" Mindehana naho rehafo ty tomponao fa eto Elia, ka le ho vonoene raho." ¹⁵ Le namale Elia ty hoe:" Laha mboe velo kea Yaveh tompo ty maro, ze itsanganako eo agnoloane, le hiseho amy Ahaba vatane raho androany." ¹⁶ Ka lasa Obadia nindeha mba hanente i Ahaba, naho nirehake tamine ze nirehafe Elia. Le nindeha nifanoje tamy Elia ty mpanjaka. ¹⁷ Laha fa nahisake Elia ty Ahaba, le hoe re tamine:" Riha vao io? Riha ty raike ze minday koronta ho ahy Israely!" ¹⁸ Le namale Elia ty hoe:" Tsy ninday koronta ho ahy Israely raho, fa riha vaho ty fokon-draenao ro ndaty nampisy koronta tamity alala ty fialanareo tamity lily Yaveh vaho ty fagnorihanareo i Bala. ¹⁹ Ka amizao, mandefasa rehake naho avorio eto amiko ty Israely iaby ao ambohitse Karmela, miarake amireo mpaminane Bala 450 vaho reo mpaminane Aseraha efajato ze nihina teo andataba Jezebela." ²⁰ Le nandefa rehake tagne amity vahoake Israely iaby vaho namory niarake reo mpaminane tao ambohitse Karmela ty Ahaba. ²¹ Naho Elia namonje ty vahoake iaby ka nanao ty hoe:" Zisike ombia riha ro hiova hevetre zisikagne? Laha Yaveh ro Zagnahare, le magnoriha aze. Fa laha i Bala ro Zagnahare, le magnoriha aze." Fa ty ndaty tsy namale rehake aze. ²² Le hoe ty Elia tamity vahoake hoe:" Izaho, le izaho arere avao, ro sisa mpaminane Yaveh, nefa ty mpaminane Bala le ndaty 450. ²³ Ka ao reo ro hagnomea agnombe roe ho antika. Ao iereo hifily agnombe raike ho ahy iereo vaho handrasa zay, naho hampandre zay eo amity hetae, nefa tsy handrehetre afo eo ambane zay. Le hikarakara ty agnombe raike hafa raho ka hametrake zay eo amity hetae, naho tsy hagnisy afo eo ambane zay ²⁴ Le hikaike ty agnara ty zagnaharenareo nareo, naho zaho hikaike ty agnara Yaveh8, naho ty Zagnahare ze hamale amity afo, le ao re ro ho Zagnahare." Ka namale ty ndaty iaby naho nanao ty hoe:" Mete zay." ²⁵ Naho hoe ty Elia tamireo mpaminane Bala:" Mifilia agnombe raike ho anareo, naho omano aloha zay, fa ndaty maro nareo. Le kaiho ty agnara ty Zagnaharenareo, nefa ko asia afo eo ambane ty agnombe." ²⁶ Le nangalake ty agnombe ze nomea aze iereo naho nikarakara zay, le nikaike ty agnara Bala zisike ty maray zisike-pitatao-vovogna iereo, nanao ty hoe:" Ry Bala o, midranjigna anay." Nefa tsy nisy feo, na nisy namale kea. Nandihy nagnodidy ty alitara namboarene iereo. ²⁷ Laha mitatao-vovogna le nagnafake iereo Elia nanao ty hoe:" Mikaiha mafe avao! fa Zagnahare re! asa mboe midineke re, na magnaiva ty vatane, na nisy lia nombane, na asa miroro re ka tokone hofohaze." ²⁸ Fa mboe nikaike mafe avao iero, naho nandrasa ty vatagniereo, arake ty fataone mateteke miarake amity meso vaho lefo, zisike mandoa lio-ty vatagniereo. ²⁹ Lasa ty mitatao-vovogna, le mboe nisafoake avao re zisike ty andro ty fagnatetre hariva, nefa tsy nisy feo na nisy namale kea; tsy nisy nidranjy ty fangataha iereo. ³⁰ Le hoe Elia tamity ndaty iaby:" Magnatogna amiko eto," le nagnato aze ty ndaty iaby. Le namboatre ty aliara Yaveh ze rava vatane re. ³¹ Nangalake vato roe ambgy folo Elia, ty vato kirai-kiraike aby manoro ty raike amireo foko reo anadahy Jakoba_ty Jakoba nahavia ty safa Yaveh, nanao ty hoe:" Israely ro ho anareo." ³² Tamireo vato reo ro nagnoregnane ty alitara tamity agnara Yaveh naho re le nandavake lavake kele magnodidy ty alitara bey tandre voan-jaka indroe ty famaran. ³³ Nandahatre ty hetae ho ahy ty afo re, nandrasa ty agnombe, naho nametrake reo agnombe vita rasa teo amity hetae. Hoe re ty hoe:" Feno rano ty siny efatre ka ailigno eo amity fagnatetre oroa vaho eo amity hetae." ³⁴ Le hoe re:" Anovo fagnindroene zay. Le heo ndraike re:" Anovo fagnintelone zay," Le natao iereo fagnintelone. ³⁵ Le nirarake nagnodidy ty alitara ty rano naho nameno ty lavake kele. ³⁶ Niseho zay tamity andro ty fagnatetre tamity soro amity hariva, naho Elia mpaminane le namonje ka nanao ty hoe:" Ry Yaveh, Zagnahare Abrahama, vaho Isaka, naho Israely, ao ho hay eto androany fa Riha ro Zagnahare eto amy Israely, naho zaho le mpanomponao, naho nanao zao zaka iaby zao arake ty rehanao raho. ³⁷ Midranjigna ahy, ry Yaveh, midranjigna ahy, mba hahaia ty ndaty toa fa Riha, Yaveh, le Zagnahare, naho Riha ro nanolike ty arofo iereo taminao ndraike." ³⁸ Naho ty afo Yaveh nipoke ka nandrava ty fagnatetre oroa, naho kea ty hetae, reo vato, naho ty deboke, naho nandany ty rano ze tao amity lavake kele. ³⁹ Laha fa nahisake zay ty ndaty iaby, le nagnohoke ty vatane teo amity tane naho nanao ty hoe:" Yaveh, Re ro Zagnahare! Yaveh, Re ro Zagnahare!" ⁴⁰ Ka hoe Elia tamiereo:" Tsepaho reo mpaminane Bala. Ko enga hisy hilay iereo na le raike aza." Ka tsinepake iereo, naho Elia ninday reo mpaminane Bala nizotro tagne amity baibon-driake Kisona naho namono iereo tagne. ⁴¹ Hoe Elia tamy Ahaba:" Mitsangana, mihinana naho minoma, fa zay ty feo ty oram-bey." ⁴² Ka niakatre mba hihina vaho hino Ahaba. Le niakatre teo ambone i Karmela Elia, niondreke teo amity tane re, naho nametrake ty vatane teo agnivo ty ongone. ⁴³ Naho hoe re tamity mpanompone:" Miakara amizao, ka magnetea egne amity riake." Le niakatre ty mpanompone ka nagnente naho nanao ty hoe:" Tsy misy na ino ino." Ka hoe ndraike Elia:" Mindehana ndraike, impito." 44Naho laha fagnim-pitone le hoe ty mpanompone:" Ingo, misy raho miakatre bakamity riake, kele manahake ty tagna ty ndaty." Le namale Elia ty hoe:" Miakara ka rehafo amy Ahaba ty hoe:' Anovo vogno ty kalesenao ka mizotroa aloha ty hitana ty ora anao"' ⁴⁵ Naho tsiela avao laha niha-mainte ty raho vaho nitioke ty lagnitse, le nisy oram-bey. Naho i Ahaba nitiketre Kalese ka niakatre nimbaeo Jezirela, ⁴⁶ fa ty tagna Yaveh le niomba Ahaba. Nisiky ty akanjone teo amity santira re naho nilay teo aloha Ahaba teo amity filira mbaeo Jezirela.