¹ Nirehafe Ahaba tamy Jezebela iaby ze natao Elia vaho ty namonoane reo mpaminane iaby tamity meso. ² Naho Jezebela nandefa mpinday talily tagne amy Elia, nanao ty hoe:" Hatao reo zagnahare amiko anie zay, eka mihoatre naho zay aza, laha tsy hataoko hanahake ty arofo ty raike tamiregne mpaminane ze mate reigne ty arofonao hamaray amity ora hoe zao." ³ Laha fa rey Elia zay, le nitsanga re ka lasa nilay namonje ty arofone naho nimbaeo Beri-sheba, ze agne Joda, naho nengane teo ty mpanompone. ⁴ Fa re nindeha lala ndraike andro tagne agnefetre, le niavy naho nitoboke teo ambane hetae kofafambohitse. Nangatake ty ho mate re, ka nanao ty hoe:" Ampe zay, amizao, ry Yaveh; afaho ty fiaiko, satria tsy soa naho reo razambeiko raho." ⁵ Ka le niroro nitsilagne teo ambane kofafambohitse re. Tampoke teo le nisy anjele nikasike aze ka nanao tamine ty hoe:" Mifohaza naho mihinana." ⁶ Nanente Elia, naho teo agnila ty lohane le nisy mofo voaende raike tavoara. Naho nihina vaho nino re ka niroro nitsilagne ndraike. ⁷ Niavy fagnindroene ndraike ty anjele Yaveh, ka nikasike aze naho nanao ty hoe:" Miaregna naho mihinana, satria ho lava aminao ty lia." ⁸ Ka nitsanga re naho nihina vaho nino, naho nindeha tamity here azone tamizay sakafo zay zisike ty efapolo andro vaho efapolo haleke ho agne Horeba, ty vohitse Nagnahare. ⁹ Nindeha tao amity zohy raike tagne re naho nitoboke tao amizay. Le niavy tamine ty safa Yaveh naho nanao tamine ty hoe:" Ino ro ataonao ato, ry Elia?" ¹⁰ Elia namale hoe:" Bey zotom-po ho ahy Yaveh, Zagnahare tompo ty maro raho, satria le fa nahafoe ty fagnenkenao ty ndaty Israely, nandrava reo alitaranao, naho namono reo mpaminanenao tamity meso. Amizao izaho, le zaho arere, ro sisa tavela naho midineke ty hifofo ty arofoko kea iereo." ¹¹ Yaveh namale ty hoe:" Miakara ka mitsangana eo amity vohitse eo agnoloako." Naho nandrio Yaveh, Ka nisy tioke mafe nagnisy ty vohitse naho namaky reo vatolampy ho poteke teo agnoloa Yaveh, kanefa tsy tao agnate ty tioke ty Yaveh. Naho tafara ty tioke, le nisy horohoron-tane niavy, kanefa tsy tao agnate ty horohoron-tane ty Yaveh. ¹² Naho tafara ty horohoron-tane le niavy ty afo, kanefa tsy tao agnate ty afo ty Yaveh. Naho tafara ty afo, le nisy feo maleme niavy. ¹³ Laha fa rey Elia ty feo, le nitakonane tamity lambane ty tarehene, niakatre re, naho nitsanga teo amity filira ty zohy. Naho nisy feo niavy tamine nanao ty hoe:" Ino ro ataonao eto, ry Elia?" ¹⁴ Elia namale ty hoe:" Bey zotom-po ho ahy Yaveh, Zagnahare tompo ty maro raho, fa ty ndaty Israely nahafoe ty fagnenkeako, nandrava reo alitaranao, naho namono reo mpaminanenao tamity meso. Amizao, izaho le zaho arere, ro sisa tavela naho mikasa ty hifofo ty arofoko kea iereo." ¹⁵ Naho Yaveh nanao tamine ty hoe:" Mindehana, miheregna amity lalanao ho agne agnefetre Damaskosy, naho laha fa avy agne riha le hagnosotre i Hazaela ho mpanjaka Syria, ¹⁶ naho riha hagnosotre i Jeho anadahy Nimsy ho mpanjaka Israely, naho riha hagnosotre i Elisa anadahy Safata bakagne Abela-mehola ho mpaminane hisolo ty toeranao. ¹⁷ Naho amizay le hovonoe Jeho iaby ze tafilay tamity meso Hazaela, hovonoe Elisa iaby ze tafilay amity meso Jeho. ¹⁸ Kanefa Izaho hagnenga ndaty fito arivo ho ahy agne Israely, reo ze nandohaleke ka tsy nihohoke tamy Bala, vaho reo vava ze tsy mboe nagnoroke aze." ¹⁹ Ka niala teo Elia naho nahisake Elisa anadahy Safata, ze niasa niarake tamity ziogan'agnombe roe amby folo nagnoloa aze, naho re vatane avao ro niasa niarake tamity zioga faha-roe amby folo. Nitsake mbaeo amy Elisa Elia ka nanaro ty lambane tamine. ²⁰ Bakeo le niala reo agnombene Elisa ka nilay nagnia i Elia; hoe re:" Engao rie raho hagnoroke ty raeko vaho ty reneko, naho hagnorike anao raho bakeo." Le hoe Elia tamine:" Miheregna naho, kanefa dineho ze le fa nataoko taminao." ²¹ Ka nihere bakagne amy Elia ty Elisa naho nangalake ty ziogan'agnombene, namono reo biby, naho nahandro ty hena tamity hetae ziogan'agnombe. Le nomeane ty ndaty zay ka nihina iereo. Bakeo nitsanga re, nagnorike i Elia naho nanompo aze.