¹ Namory ty tafine hiharo ty Beni-hadada mpanjaka Syria. Nisy mpanjaka kele roe amby telopolo niarake tamine, naho soavale vaho kalese. Niakatre re, nanao faherano i Samaria vaho nialy nandietse zay. ² Nandefa irake nimbaeo amity tana ho ahy Ahaba mpanjaka Israely re, ka nirehake tamine hoe:" Izao ro nirehafe Beni-hadada ty hoe: ³ 'Ty volafotinao vaho ty volamenanao le ahy. Reo valinao vaho ty ananao avao kea, reo soa vatane, le ahy amizao."' ⁴ Namale ty mpanjaka Israely ka nanao ty hoe:" Ho lefe arake ty rehanao zay, ry mpanjaka, tompoko. Izaho vaho iaby ze fanagnako le anao." ⁵ Avy ndraike reo iarake ka nanao ty hoe:" Izaho ro rehafe Beni-hadada ty hoe:' Nandefa rehake taminao raho fe riha le tsy maintsy hanolotre ty volafotinao, ty volamenanao, reo valinao, naho reo ananao ho ahy. ⁶ Nefa hagnirake reo mpanompoko agne aminao raho hamaray amity lera hoe zao, naho hipay ty tragnonao vaho ty tragno reo mpanomponao iereo. Hitsepake amity tagna iereo ka hangalake iaby ze tea ty maso iereo."' ⁷ Naho nikaike reo olobey ty tane iaby niarake ty mpanjaka Israely ka nanao ty hoe:" Mba raeso antsoratre ka henteo ty fomba hipaia ty lahilahy toy ndaty. Le fa nandefa rehake tamiko re mba hangala reo valiko, reo anako, naho ty volafotiko vaho ty volamenako, naho tsy mboe nilietse aze raho." ⁸ Reo olobey iaby vaho ty vahoake iaby nirehake tamy Ahaba ty hoe:" Ko midranjy aze na magnenke ze fangatahane." ⁹ Le hoe Ahaba tamireo irake Beni-hadada ty hoe:" Ambarao ty mpanjaka tompoko hoe:' Magnenke ty zaka iaby ze nagnirahanao ty mpanomponao hatao tamity voalohane raho, kanefa tsy afake hagnenke ty fangataha faharoe toy raho."' ¹⁰ Ka lasa reo irake naho ninday ze valen-drehake zay teo amy Beni-hadada. Le nandefa ty valen-drehane ho ahy Ahaba ty Beni-hadada, ka nanao ty hoe:" Enga anie reo zagnahare hanao zay amiko naho mihoatre aza, laha ho ampe hana feno ty tana bakamity laveno Samaria reo vahoake iaby ze magnorike ahy." ¹¹ Namale ty mpanjaka Israely ka nanao ty hoe:"Ambarao Beni-hadada ty hoe:' Tsy misy ndaty mametrake ty fialiane, ka tokone hirehareha ho amity nagnafahane zay."' ¹² Le naharey zay hafatre zay ty Beni-hadada laha nino re, le re vaho reo mpanjaka ambanene ze tao agnate ty tragno iereo. Beni-hadada nandily reo lahilahine ty hoe:" Milahara ho amity aly nareo." Le nagnoma ty vatane iereo ho amity aly iereo mba hagnisy ty tana. ¹³ Naho ingo, nisy mpaminane niavy teo amy Ahaba mpanjaka Israely ka nanao ty hoe:" Hoe ty Yaveh:' Le fa hisanao vao ty tafike bey ty? Ingo, hametrake zay eo antagnanao raho amizao, naho ho hainao vatane fa Izaho ro Yaveh."' ¹⁴ I Ahaba namale hoe:" Amity lalan'ia?" Le namale Yaveh ka nanao ty hoe:" Amity alala reo tanora manam-pahefa ze manompo reom governora ty distrike." Le Ahaba nanao ty hoe:" Ia ro hanomboke ty aly?" Yaveh namale ty hoe:" Riha." ¹⁵ Le nagnaro reo tanora manam-pahefa ze nanompo ty komandy ty isan'antokone ty Ahaba. Niisake 232 iereo. Tafara iereo le nagnaro reo miaramila iaby re; ty tafike Israely iaby; niisake fito arivo. ¹⁶ Niakatre tamity mitatao vovogna iereo. Beni-hadada le fa baka nino naho nahamamo ty vatane tao antragnone, re vaho reo mapanjaka kele roe amby telopolo ze nanoha aze. ¹⁷ Reo tanora manam-pahefa ze nanompo ty komandy ty isan-tokone ro nindeha mialoha. Le nampahaie tily ze nirahe i Beni-hadada ty hoe:" Misy lahilahy miakatre bakao Samaria." ¹⁸ Hoe Beni-hadada ty hoe:" Na tamity filamina na tamity aly ro niakara iereo, le tsepaho velo iereo." ¹⁹ Le niakatre ty tana reo tanora manam-pahefa ze nanompo reo governora ty isan-tokone naho nagnorike iereo ty tafike. ²⁰ Namono ty fahavalone aby iereo ka nilay reo Syriana. Nagnia iereo ty Israely. Beni-hadada mpanjaka ty Syria kea nilay tamity soavale niarake tamireo mpitiki-tsoavale ilane. ²¹ Naho nikatre ty mpanjaka Israely ka nanafike reo soavale vaho reo kalese, naho namono reo Syriana tamity famonoam-bey. ²² Le namonje ty mpanjaka Israely ty mpaminane ka nanao tamine ty hoe:" Mindehana, hamafeoty vatanao, ka takaro vaho omano ze hataonao, satria amity herentao le hiakatre handietse anao ndraike ty mpanjaka Syria." ²³ Reo mpanompo ty mpanjaka Syria nirehake tamine ty hoe:" Ty zagnahare iereo le zagnahare ty tazoa. Zay ro antone nahamafe iereo naho tika. Fa zao kea hindeha tika hialy amiereo egne amity lemake, naho ho azo antoke fa ho mafe naho iereo tika. ²⁴ Laha zao le zao ro tsy maintsy ataonao: afaho eo amity toera ty fahefane reo mpanjaka iaby ke solo mpifehe miaramila iereo. ²⁵ Mangana tafike manahake ty tafike mate teo__soavale solo ty soavale naho kalese solo ty kalese__mba hiafahantika mialy amiereo egne amity lemake. Le ho azo antoke fa haharey naho iereo tika." Le nidranjy ty torohetre iereo ty Beni-hadada naho nanao ze natoro iereo. ²⁶ Tafara ty nanomboha ty taom-baovao, le nagnaro reo Syriana ty Beni-hadada ka niakatre ho agne Afeka mba hialy amy Israely. ²⁷ Navory reo vahoake Israely naho nivatie mba hialy amiereo. Nitobe teo agnoloa iereo manahake ty ose kele roe toko ty vahoake Israely, nefa reo Syriana nagneneke ty tane. ²⁸ Le namonje ty lahilahin'Agnahare raike ka nirehake tamity mpanjaka Israely ty hoe:" Hoe ty Yaveh hoe:' Satria reo Syriana le fa nirehake fa Yaveh le zagnahare ty tazoa, fa tsy mba zagnahare reo baibo, le hatoboko eo antagnanao ty tafike bey toy, naho ho hainao fa zaho ro Yaveh."' ²⁹ Le nitobe nifanandrife reo tafike zisike ty fito andro. Naho nanomboke ty aly tamity andro fahafito. Namono Syriana mpandeha tomboke 100.000 ty vahoake Israely tagnate ty raike andro. ³⁰ Ty sisa nilay tagne Afeka, tao amity tana, naho nitonta tamireo lahilahy fito arivo vaho roe ale ze tavela ty manda. Nilay Beni-hadada ka nimbaeo amity tana, tagnate efetragno raike. ³¹ Nirehake tamine reo mpanompo Beni-hadada ty hoe:" Ingo amizao, reinay fa reo mpanjaka ty ana Israely le mpanjaka mpamindra arofo. Mba engao rie zahay hisiky lamba fandala eo amity valahanay vaho taly eo amity lohanay, naho hiakatre ho agne amity mpanjaka Israely. Mete hamindra arofo aminao asa re." ³² Ka nisiky lamba fandala tegne ambalahane iereo vaho taly andoha iereo naho bakeo nimbaeo amity mpanjaka Israely ka nanao ty hoe:' Beni-hadada mpanomponao nanao ty hoe:' Mba engao rie raho ho velo."' Hoe ty Ahaba hoe:" Mboe velo vao re? Rahalahiko re." ³³ Naho nidranjy ze ho famantara bakamy Ahaba reo lahilahy, ka namale aze malaky iereo hoe:" Eka, Beni-hadada rahalahinao le velo." Naho hoe Ahaba ty hoe:" Mindehana naho ento re." Bakeo le niavy teo amine ty Beni-hadada, naho tafakatre tagne amy Ahaba tamity Kalesene re. ³⁴ Beni-hadada nirehake tamy Ahaba ty hoe:" Ahereko aminao reo tana ze nalae ty raeko tamity raenao, naho afake manao fivarota ho anao agne Damaskosy riha, manahake ty natao ty raeko tagne Samaria." Namale Ahaba ty hoe:" Engako hindeha miarake amity fifangnenkeam-pilongoa toy riha." Ka nanao fifagnenkeam-pilongoa tamine ty Ahaba naho bakeo nagnenga aze hindeha. ³⁵ Nisy lahilahy, raike amireo anadahy reo mpaminane, nirehake tamity raike tamireo mpaminane namane tamity safa Yaveh ty hoe:" Mba asio raho." Feie nilietse ty hagnisy aze ty lahilahy. ³⁶ Le nirehake tamity mpaminane namane ty mpaminane ty hoe:" Satria riha tsy nanenke ty feo Yaveh, ka laha vaho miala ahy riha, le hisy liona hamono anao." Laha vaho niala aze ty lahilahy, le nisy liona niatsampe tamine ka namono aze. ³⁷ Bakeo le nahisake lahilahy hafa raike ndraike ty mpaminane naho nanao ty hoe:" Mba asio raho." Ka le nagnisy aze ty lahilahy naho nahafere aze. ³⁸ Le niala ty mpaminane naho niambe ty mpanjaka teo antsisin-dala; nagnova ty toerane tamity fehea teo amity masone re. ³⁹ Laha nandrio igne ty mpanjaka, le nikaike mafe ty mpanjaka ty mpaminane naho nanao ty hoe:" Niakatre ho agne agnate aly mafana ty mpanomponao, naho miaramila raike ro nanaka vaho ninday fahavlo ho ahy ka nanao ty hoe :' Henteo ty lahilahy toy. Laha tsy hisake amity fomba iaby re, le ty fiainao ro homea ho solo ty fiaine, na laha tsy zay le handoa talenta volafoty riha.' ⁴⁰ Nefa satria ty mpanomponao le mboe tavela tamity lia tetie vaho teroa, le nilay ty miaramila fahavalo." Bakeo le nirehake tamine ty mpanjaka Israely ty hoe:" Zao ro ho sazenao__ ty vatanao zao vatane ro le fa nanapa-kevetre zay." ⁴¹ Le nagnafake malaky ty fehea tegne amity masone ty mpaminane, naho hay ty mpanjaka Israely fa raike tamireo mpaminane re. ⁴² Hoe ty mpaminane tamity mpanjaka ty hoe:" Yaveh mirehake ty hoe:' Satria le fa nenganao hindeha bakeo antagnanao ty lahilahy ze nililieko ho mate, le ty fiainao ro hisolo toera ty fiaine, naho ty vahoakenao ho solo ty vahoakene."' ⁴³ Ka meloke vaho masiake mafe ty mpanjka Israely nimbaeo antragno, naho niavy tagne Samaria.