¹ Andro tsy ampe tafara atoy, nana tanem-boaloboke tao Jerizela ty Nabota Jezirelita, teo agnila ty lampa i Ahaba, mpanjaka Samaria. ² Nirehake tamy Nabota ty Ahaba nanao ty hoe:" Ameo ahy ty tanem-boalobokenao, mba ho baibo legiomako zay, satria agnila ty tragnoko. Ho takalo zay, hameako tanem-boaloboke soa kea riha, na laha teanao, le homeako vola vily zay riha. ³ Nabota namale i Ahaba ty hoe:" Ho rara Yaveh anie ze tokone lova reo razambeiko ameko anao." ⁴ Ka le nindeha tao amity lampa ty tamin-keloke naho halagine ty Ahaba noho ty valen-drehake nomea Nabota Jezerelita aze hoe:" Tsy hameako anao ty lova reo razambeiko." Niroro nitsilagne teo am-pandreane re, nagnodidy ty tana, naho tsy nimete nihinan-kane re. ⁵ Jezebela valine nimbeo amine naho nanao tamine hoe:" Nagnino ro malahelo loatre ty fonao, zay vao ro tsy hihinananao hane?" ⁶ Namale aze re hoe:" Nirehake tamy Nabota Jezirelita raho naho nanao tamine ty hoe:" Ameo ahy ty tanem-boalobonao hatakalo vola, na laha teanao le hameako tanem-boaloboke hafa ho anao riha.' Naho namale ahy re hoe:' Tsy homeako anao ty tanem-boaloboko."' ⁷ Naho Jezebela valine namale aze hoe:" Fa tsy mboe mandily ty fanjaka ty Israely vao riha? Mitsangana naho mihinana; ao ho fale ty fonao. Halaeko ho anao ty tanem-boalobok'i Nabota Jezirelita." ⁸ Naho Jezebela nanoratre taratasy amity agnara i Ahaba, tinombone tamity tomo-kasene zay, naho nalefane tagne amireo olobey vaho reo mpagnarivo ze nitoboke niarake tamine tao amity figaogna, naho reo ze nitoboke agnila i Nabota zay. ⁹ Sinorane tao amity taratasy ty hoe:" Magnambara fifalian-kane naho atoboho ambone ty vahoake Nabota. ¹⁰ Mametraha vao kea ndaty tsy mare roe miarake amine ka ao iereo hita aze hoe:' Nagnozo an'Agnahare vaho ty mpanjaka riha."' Naho akaro re ka toraho vato ho mate. ¹¹ Ka nanao ze finary Jezebela tamiereo, arake ty voasoratre ao amity taratasy ze nalefane ho ahy iereo ty lahilahy ty tana, reo olobey vaho ty mpagnarivo ze nitoboke tao amity tana Nabota. ¹² Nagnambara fifalian-kane vaho nametrake i Nabota teo ambone ty vahoake iereo. ¹³ Nilitse reo lahilahy tsy mare roe naho nitoboke teo agnoloa Nabota; nita i Nabota teo amity fagnatrehane ty vahoake iereo, ka nanao ty hoe:" Nagnozo an'Agnahare vaho ty mpanjaka Nabota." Naho le niente iereo niakatre ty tana re ka tinora-bato ho mate. ¹⁴ Bakeo reo olobey le nandefa rehake tagne amy Jezebela nanao ty hoe:" Tinora-bato ty Nabota ka mate." ¹⁵ Naho laha fa rey Jezebela fa tinora-bato ty Nabota ka mate, le hoe rta tamy Ahaba:" Mitsangana naho alao ho fanagna ty tanem-boalobok'i Nabota Jezirelita, ze nilietse ty hagnomea anao ty vola ho viline, satria le fa tsy velo sase ty Nabota, fa le fa mate." ¹⁶ Laha fa rey Ahaba fa mate Nabota, le nitsanga re naho nizotro tagne amity tanem-boalobok'i Nabota Jezirelita naho nangalake zay ho fanagna. ¹⁷ Naho niavy tamy Elia Tisbita ty safa Yaveh manao ty hoe: ¹⁸ "Mitsangana naho mindehana mifanoje amy Ahaba mpanjaka Israely, ze mitoboke agne Samaria. Ao amity tanem-boalobok'i Nabota re, agne amize nindehanane mba halaene ho fanagna. ¹⁹ Tsy maintsy mirehake amine riha naho ambarao hoe zao ro safa Yaveh:' Sady le fa namono vao riha ro mboe nanagalake ho fanagnanao avao kea?' Naho horehafenao aze hoe zao ro safa Yaveh:" Eo amity toera ze nitsela ty amboa ty lio Nabota, ro hitselafa ty amboa ty lionao kea, egne, ty lionao."' ²⁰ Hoe ty Ahaba tamy Elia:" Le fa nahisake ahy vao riha, ry fahavaloko?" le namale ty Elia hoe:' Le fa hisako riha, satria le fa nivarotre ty vatanao mba hanao ze raty eo amaso Yaveh riha. ²¹ Zao ro safa Yaveh aminao:' Ingo, hinday loza eo aminao vaho hanimba vatane naho handany eo aminao ty anake lahy iaby vaho ty ndevo naho ty lahilahy afake ao Israely raho. ²² Hataoko manahake ty foko Jeroboama anadahy Nebata ty fokonao, naho manahake ty foko i Basa anadahy Ahia, satria nipay ahy tamity heloke naho ninday i Israely hanonta riha.' ²³ Yaveh avao kea le nirehake momba Jezebela ty hoe:' Hihina Jezebela eo agnila ty manda i Jezirela ty amboa.' ²⁴ Zay ahy Ahaba iaby ka mate tao antana, le hohane ty amboa; naho reo voro egne amity lagnitse hihina reo iaby ze mate egne ambaibo." ²⁵ Tsy nisy ndaty manahake i Ahaba, ze nivarotre ty vatane mba hanao ze raty eo amaso Yaveh, ze narisy Jezebela valine hanonta. ²⁶ Nanao asa raty ho ahy ty sampe orihene Ahaba, manahake iaby ze le fa natao reo Hamorita, reo ze nafaha Yaveh teo agnoloa ty ndaty Israely. ²⁷ Laha fa rey Ahaba reo rehake reo, le nandriatre ty akanjone re naho nanao akanjo fanadala ka nifaly hane, naho niroro tamity akanjo fandala vaho tena nalahelo mafe. ²⁸ Naho niavy tamy Elia Tisbita ty safa Yaveh ty hoe: ²⁹ "Hisanao vao ty hatsotra Ahaba eto agnoloako? Satria tsy mieboebo eto agnoloako re, le tsy hinday ty loza le fa ho avy amireo androne raho; amity andro ty anadahine ro hindaisako loza eo amity fokone."