¹ Zisike ty telo tao lasa le tsy nisy aly teo amy Arama vaho Israely. ² Naho tamity tao fahatelo, le nizotro tagne amity mpanjaka Israely ty Josafata mpanjaka Joda. ³ Naho ty mpanjaka Israely le fa nirehake tamity mpanompone hoe:" Mba hainao vao fa Ramota-gileada le antika, feie tsy manao na ino ino tika mba hangala zay eo antana ty mpanjaka Arama?" ⁴ Le hoe re tamy Josafata:" Hiraike amiko hialy agne Ramota-gileada vao riha?" Josafata namale ty mpanjaka Israely hoe:" Izaho le manahake anao, ty vahoakeko le manahake ty vahoakenao, naho reo soavaleko le manahake reo soavalenao." ⁵ Hoe ty Josafata tamity mpanjaka Israely hoe:" Mipaia rie tari-dala bakamity safa Yaveh ty amize tokone hataonao voalohane." ⁶ Le namory reo mpaminane niarake ty mpanjaka Israely, lahilahy efajato, naho rehafo iereo hoe:" Tokone ho agne Ramota-gileada vao raho mba hialy, sa tsy tokone?" Le hoe iereo ty hoe:" Manafiha, fa ty tompo hagnomea zay ho eo antagna ty mpanjaka." ⁷ Fa hoe ty Josafata hoe:" Tsy misy mpaminane Nagnahare hafa ze mete hahazoantika hevetre sase vao eto?" ⁸ Le hoe ty mpanjaka Israely tamy Josafata ty hoe:" Mboe misy lahilahy raike ze mete hahazoantika hevetre bakamy Yaveh mba ho fagnampea, Mikaia anadahy Jimia, feie hejeko re satria tsy mba maminane zaka soa mikasike ahy, fa loza avao." Fa hoe ty Josafata ty hoe:" Tsy hirehake zay anie ty mpanjaka." ⁹ Le nikaike manam-pahefa raike ty mpanjaka Israely naho nagnomea baiko ty hoe:" Ento atoy Mikaia anadahy Imla, amizao." ¹⁰ Naho Ahaba mpanjaka Israely vaho i Josafata mpanjaka Joda le sambe nitoboke tamity sezan-droandriane aby, niakanjo ty akanjo iereo, teo amity toera malalake teo amity filira ty vavahady Samaria, naho reo mpaminane iaby le naminane teo aloha iereo. ¹¹ Zedekia anadahy Kenana vatane le nanao tsifa vy naho nanao ty hoe:" Zao ro voalaza Yaveh:' Amireto ro hitotoanao ty Syriana zisike ty hiravane."' ¹² Naho ty mpaminane iaby naminane nitovy, nanao ty hoe:" Tafiho Rmota-gileada ka mahazoa faharesea, fa Yaveh le fa nanolotre aze ho eo antagna ty mpanjaka." ¹³ Ty mpinday talily ze nindeha nikaike Mikaia nirehake tamine, nanao ty hoe:" Ingo amizao, ty safa reo mpaminane le magnambara zaka soa ho ahy ty mpanjaka tamity vava raike. Ao rie ty rehanao mba hanahake ty raike amireo naho mirehake zaka soa." ¹⁴ Le namale Mikaia ty hoe:" Laha mboe velo kea ty Yaveh, le ze rehafe Yaveh amiko ro ho rehafeko." ¹⁵ Laha fa niavy teo amity mpanjaka re, le hoe ty mpanjaka tamine hoe:" Ry Mikaia, tokone hindeha hialy agne Ramota-Gileada vao zahay, sa tsy zay?" Mikaia namale aze hoe:" Manafiha ka maharesea. Hanolotre aze ho eo antagna ty mpanjaka ty Yaveh." ¹⁶ Naho hoe ty mpanjaka tamine hoe:" Impire moa raho ro nipay anao hifanta mba tsy hirehake na ino ino amiko amity agnara Yaveh laha tsy ty mare avao?" ¹⁷ Le hoe ty Mikaia hoe:" Hisako niele tegne ambohitse ty Israely iaby, manahake ty agnondry tsy misy mpiarake, naho Yaveh nanao ty hoe:' Tsy mana mpiarake reo. Ao ty lahilahy kirai-kiraike holy soa aman-tsara agne antragnone."' ¹⁸ Le hoa ty mpanjaka Israely tamy Josafata ty hoe:" Tsy le fa nirehake taminao vao raho fa tsy mete maminane zaka soa mikasike ahy re, fa loza avao?" ¹⁹ Le hoe Mikaia hoe:" Noho zay dranogno ty safa Yaveh: nahisake Yaveh nitoboke teo amity sezan-droandriane raho, naho reo miaramila ty lagnitse iaby le nitsanga teo agnilane teo ankavanane vaho teo ankaviane. ²⁰ Hoe ty Yaveh:" Ia ro hitao Ahaba, mba hiakatre re ka ho lavo agne Ramota-gileada?' Ty raike tamiereo nirehake zao naho ty raike hafa nirehake zao. ²¹ Bakeo le nisy fagnahy raike nagnato, nitsanga teo agnoloa Yaveh, ka nanao ty hoe:' Izaho ro hitao aze.' Le hoe Yaveh tamine:' Amity fomba akore?' ²² Le namale ty fagnahy hoe:' Hiakatre raho naho ho fagnahy mavande eo ambava reo mpaminane iaby.' Yaveh namale ty hoe:' Hahatao aze riha, naho ho mete avao kea. Ka mindehana naho anovo zay.' ²³ Le ingo, Yaveh nametrake fagnahy mavande teo ambava reo mpaminanenao iaby reo, naho Yaveh le fa nagnombara loza ho anao." ²⁴ Naho Zedekia anadahy Kenana, niakatre, namofoke ty fify Mikaia, sady nanao ty hoe:" Taia ro lala ty fagnahy Yaveh niala tamiko mba hirehake aminao?" ²⁵ Le hoe ty Mikaia hoe:" Ingo, ho hainao zay amizao andro zao, laha fa militse ty efetre agnatene mba hihaja riha." ²⁶ Hoe ty mpanjaka Israely tamity mpanompone hoe:" Tsepaho Mikaia naho ento agne amy Amona, ty governora ty tana, naho agne amy Joasy,anadahiko. ²⁷ Ambarao re ty hoe:' Ampiliro ampoja ty lahilahy toy hoe ty mpanjaka, naho fahano mofo kele vaho rano kele avao re, zisike hiaviako soa aman-tsara. ²⁸ Naho hoe Mikaia ty hoe:" Laha tahie ka tafimpoly soa aman-tsara riha, le tsy nampirehafe Yaveh raho tsy akore." Naho nampeane ty hoe:" Dranjigno zay, ry vahoake iaby." ²⁹ Le niakatre ho agne Ramota-gileada ty Ahaba, mpanjaka Israely, vaho Josafata, mpanjaka Joda. ³⁰ Ty mpanjaka Israely nirehake tamy Josafata hoe:" hanao sare ndaty hafa raho naho hitsoboke ao agnate aly, fa riha kea hanao ty akanjo ty mpanjaka avao." Le nanao kisare ndaty hafa ty mpanjaka Israely ka nitsoboke tagne agnate aly. ³¹ Le nandily ty Kapitene ty kalese roe amby telopolo ty mpanjaka Syria, nanao ty hoe:" Ko manafike ty miaramila kele na ty bey. Fa ty mpanjaka Israely avao ro tafiho." ³² Naho laha fa nahisake Josafata reo kapitene ty kalese le nanao ty hoe:" Igne vatane ro mpanjaka Israely." Nihodike iereo mba hagnisy aze, ka nikaike mafe ty Josafata. ³³ Naho laha fa hisa reo mpifehe ty kalese fa tsy igne rompanjaka Israely, le nihere tamity fagniagnane aze iereo. ³⁴ Fa nisy lahilahy raike nandefa ty folesene avao naho nahavoa ty mpanjaka Israely teo agnivo ty fiaro tratrane. Naho Ahaba nirehake tamity mpinday ty kalesene ty hoe:" Mihodigna ka ento miakatre ty aly raho, fa nafere mafe raho." ³⁵ Nihamafe ty aly tamize andro zay naho ty mpanjaka le tinoha hitsanga tao amity kalesene nagnoloa ty Syriana. Mate re naho ty hariva. Nipiniake bakeo amity rantra ka zisike amity voly ty kalese ty lio. ³⁶ Naho laha le fa hotsofotre ty andro, le nisy kaike mafe nagnera ty tafike, nanao ty hoe:" Sambe moly agne amity tanane aby ty lahilahy iaby; naho sambe moly agne amity faritanene aby ty lahilahy iaby!" ³⁷ Le mate ty Ahaba mpanjaka naho niente tagne Samaria, ka naleve iereo tao Samaria re. ³⁸ Sinasa iereo teo amity rano Samaria ty kelese, naho tsinela ty amboa ty lio(teo ro fiandroa reo ampela janga), arake ze le fa natalily ty safa Yaveh. ³⁹ Naho ty zaka hafa mikasike i Ahaba, vaho iaby ze nataone, ty tragno ivory ze naorene, naho reo tana iaby ze naorene, feie vao tsy le fa voasoratre ao amity boke ty tantara ty mpanjaka Israely reo? ⁴⁰ Naho nimate tagne amireo razambeine ty Ahaba, ka i Ahazia anadahine ro lasa mpanjaka nisolo ty toerane. ⁴¹ Naho Josafata anadahy Asa nanomboke nanjaka nagnera i Joda tamity tao faha-efatre nanjaka i Ahaba mpanjaka Israely. ⁴² Dime amby telopolo tao ty Josafata ro nanomboke nanjaka, naho nanjaka tao Jerosalema zisike ty dime amby roapolo tao re. Azoba ro agnaran-drenene, ty anak'ampela i Sily. ⁴³ Nagnorike ty fomba Asa raene re; tsy niala tamireo re; nanao ze mare teo amaso Yaveh re. Kanefa ty toera abo le tsy mba rinava. Fa ty vahoake mboe nanao soro vaho nagnoro liten-ketae magnitse teo amireo toera abo avao. ⁴⁴ Naho i Josafata nilongo tamity mpanjaka Israely. ⁴⁵ Naho ty zaka hafa mikasike i Josafata, vaho ty here ze nasehone, naho ty fomba nialiane, feie vao reo tsy le fa voasoratre ao agnate ty boke ty tantara ty mpanjaka Joda? ⁴⁶ Nafahane teo amity tane reo sisa tavela tamity ndaty nanolo-bata hitsangatsanga ho fanompoan-tsampe ze mboe tamity andro Asa raene. ⁴⁷ Tsy nisy mpanjaka tao Edoma, fa ndaty voatendre ro nitondra tao. ⁴⁸ Josafata nanao sambo fitaona andriake; nindeha nimbaeo Ofira iereo hangalake volamena, kanefa tsy lasa satria nisimba tao Ezio-gebera reo sambo. ⁴⁹ Le hoe Ahazia anadahy Ahaba tamy Josafata hoe:" Ao mba hiarake hiantsambo amity mpanomponao ty mpanompoko." Fa i Josafata tsy nagnenke zay. ⁵⁰ Nimate tagne amireo razambeine Josafata naho naleve niarake tamiereo tao antana Davida, razambeine; naho Jerohama anadahine ro lasa mpanjaka nisolo ty toerane. ⁵¹ Ahazia anadahy Ahaba le nanomboke nanjaka nagnera Israely tagne Samaria tamity tao faha-fito amby folo nanjaka Josafata mpanjaka Joda, naho nanjaka roe tao teo amy Israely re. ⁵² Nanao ze raty teo amaso Yaveh re naho nagnorike ty fomba ty raene, tamity fomba ty renene, naho tamity fomba Jeroboama anadahy Nebata, ze nitarihane ty Israely hanonta. ⁵³ Nanompo i Bala vaho nivavake tamine re naho nanao ze nahameloke Yaveh, ty Zagnahare Israely, manahake ty le fa nataon-draene avao.