¹ Bakeo Davida nirehake ty hoe:" Eto ro hisy ty tragno Yaveh Zagnahare, miarake amity alitara ho ahy ty fagnatetre oroa Israely." ² Ka nandily reo mpanompone ty Davida mba hamory miarake reo vahiny ze mitoboke agne amity tane Israely. Tinendrene iereo mba ho mpamaky vato, mba hamaky reo vaton-kara, mba hagnoregna ty tragnon'Agnahare. ³ Nagnomea vy maro bey ho hafantsike ty varavara mba ho eo amity vavahady, naho amireo vy fagnitia Davida. Nagnomea varahy maro noho ze azo lanjae avao kea re, ⁴ naho hetae sedera maro tsy hay isahe. (Ninday hetae sedera maro bey ho ahy Davida mba hisahe reo Sidoniana vaho reo Tyriana.) ⁵ Hoe ty Davida hoe:" Solomona anadahiko le kele vaho tsy manam-pahaia, naho ty tragno ze tokone hamboare ho ahy Yaveh le tsy maintsy mahajilo, mba halaza vaho ho bey hasy eo amireo tane hafa iaby. Ka hikarakara ty fagnoregna zay raho." Laha zao le nanao fagnomana bey ty Davida taloha ty nifatezane. Bakeo le nikaike i Solomona anane re nandily aze hagnore tragno ho ahy Yaveh, ty Zagnahare Israely. ⁷ Hoe Davida tamy Solomona hoe:" Ry zanako, dineko ty hagnoregnako tragno, ho ahy ty agnara Yaveh Zagnahareko. ⁸ Kanefa Yaveh namonje ahy naho nirehake hoe:' Le fa nampimpoke lio maro naho le fa nialy aly maro riha. Tsy hagnore tragno ho ahy ty agnarako riha, satria le fa nampimpoke lio maro teto antane teo amasoko riha. ⁹ Na le zay aza, hana anadahy raike tea filongoa riha. Hagnomea aze fitofa amireo fahavalone iaby amity lafine iaby Raho. Fa ty agnarane le hatao hoe Solomona, naho hagnomea aze fiadagna vaho filamina ho ahy Israely amireo androne Raho. ¹⁰ Hagnore tragno ho ahy ty agnarako re. Ho anako re, naho ho raene Raho. Hanao ty sezan-droandria ty fanjakane eo amy Israely zisikagne Raho.' ¹¹ Amizao, ry zanako, hiomba anao anie Yaveh naho hahasoa anao. ¹² Hagnore ty tragno Yaveh Zagnaharenao anie riha, arake ty nirehafene fa hataonao. Hagnomea anao say vaho fazavan-tsay avao kea anie Yaveh, mba hagnenkeanao ty lily Yaveh Zagnahareko, laha fa manao anao hiasa eo amy Israely Re. ¹³ Le hosoa riha, laha magnenke soa reo lala vaho reo lily ze namea Yaveh tamy Mosesy mikasike ty Israely. Maherea naho managna herem-po. Ko matahotre na kivy. ¹⁴ Naho, ingo, ty ezake bey ze le fa vinognoko ho ahy ty tragno Yaveh te talenta volamena 100.000, talenta volafoty ray tape-trisa, naho varahy vaho vy marobey. Le fa nagnomea hetae vaho vato avao kea raho. Tsy maintsy hagnampe beibey kea reo iaby reo riha. ¹⁵ Mana mpiasa maro miarake aminao riha: mpamaky vato, mpanao tragno, mpandrafitre, naho reo mpanao asa-tagna mahay maro isan-karazane, ¹⁶ ze afake miasa amity volamena, volafoty, varahy, naho vy. Ka atombo ty asa, naho hiomba anao anie Yaveh." ¹⁷ Nandily reo mpitarike ty Israely iaby avao kea Davida mba hagnampe i Solomona anadahine, manao hoe: ¹⁸ "Miomba anareo Yaveh Zagnaharenareo naho le fa nagnomea fiadagna anareo tamity lafine iaby. Le fa nagnomea reo vahoake ty faritre teto antagnako Re. Milavo lefo eo agnoloa Yaveh vaho ty ndatine ty fagnatetre. ¹⁹ Amizao mipaia Yaveh Zagnaharenareo amity arofonareo iaby vaho ty fagnahinareo iaby. Mitsangana naho aoregno ty toera masy Yaveh Zagnahare. Ka afake minday ty tomabile ty fagnenkea Yaveh vaho reo zaka ze an'Agnahare ao antragno ze naore ho ahy ty agnara Yaveh nareo."