¹ Laha fa antetre ty Davida naho marine ho lany ty andro ivelognane, le nataone mpanjaka handily Israely ty Solomona anadahine. ² Navorine niarake reo mpitarike ty Israely iaby, niarake tamireo mpisoro vaho reo Levita. ³ Reo Levita telo-polo tao naho mihoatre ro hinafatre. Nisake valo arivo vaho telo ale iereo. ⁴ "Amireo, le efatre arivo vaho roe ale ro nita ty asa tao antragno Yaveh, naho ene arivo reo manan-kasine vaho mpitsara. ⁵ Efatre arivo ty mpiambe vavahady, naho efatre arivo ty mpiantsa Yaveh miarake amity zaka ze namboareko ho fagnomea fiantsa," Hoe Davida. ⁶ Zinara ho vondro ze mifagnarake amireo anadahy Levy iereo: Gesrona, Kehata, naho Merary. ⁷ Bakamireo foko Gersona, ro nisy i Ladana vaho Simey. ⁸ Telo ty anadahy Ladana: Jehiela ty mpitarike, Zetama, naho Joela. ⁹ Telo ty anadahy Simey: Selomota, Haziela, naho Harana. Reo ro mpitarike reo foko i Ladana. ¹⁰ Efatre ty anadahy Simey: Jahata, Ziza, Jeosy, naho Beria. ¹¹ Jahata ro zokene vatane, naho Ziza ro faharoe, fa Jeosy vaho Beria kea tsy mba nana anadahy maro, ka le natao ho foko raike mitovy asa iereo. ¹² Efatre ty anadahy Kehata: Amrama, Jizara, Hebrona, naho Oziela. ¹³ Toa iaby ty anadahy Amrama: Arona vaho Mosesy. Voafily ho mpanoka reo zaka-masy vatane ty Arona, ka re vaho reo fokone ro hanolotre ty liten-ketae magnitre eo agnoloa Yaveh, hanompo Aze naho hagnomea tso-drano amity agnarane zisikagne. ¹⁴ Fa laha ty amy Mosesy ty lahilahin'Agnahare kea, le natao ho Levita reo anadahine. ¹⁵ Reo anadahy Mosesy le i Gersona vaho Eliezera. ¹⁶ Ty foko Gersona le i Seboela ty zokene vatane. ¹⁷ Ty foko i Eliezera le i Rehabia. Tsy nanagnanake lahy hafa ty Eliezera, kanefa Rehabia le nana foko maro. ¹⁸ Ty anadahy Jizara le i Selomita ty mpitarike. ¹⁹ Ty foko i Hebrona le i Jeria, zokene vatane, Amaria ro faharoe, Jahaziela ro fahatelo, naho Jekameama ro fahaefatre. 20Reo anadahy Oziela le i Mika zokene vatane, naho Isiah ro faharoe. ²¹ Reo anadahy Merary le i Maly vaho Mosy. Reo anadahy Maly le i Eleazara vaho Kisy. ²² Mate tsy mba nitera-dahy ty Eleazara. Anakampela avao ro nanagnane. Reo anadahy Kisy le nanambaly iereo. ²³ Reo ana i Mosy telo lahy le i Maly, Edera, naho Jeremota. ²⁴ Toa ro foko Levy arake ty foko iereo. Iereo ro mpitarike, voaisake naho voaisake arake ty agnara ty foko ze nanao ty asa fanompoa tao antragno Yaveh, manomboke eo amity roapolo tao ro ho miakatre. ²⁵ Fa hoe Davida ty hoe:" Yaveh, Zagnahare Israely, le fa nagnomea fitofa ho ahy ty ndatine. Nataone ao Jerosalema zisikezay ty tragnone. ²⁶ Tsy hinday ty tabernakele vaho reo zaka fiasa amity fanompoa iaby sase reo Levita." ²⁷ Fa tamity alala ty safa Davida faeane ro nagnisaha reo Levita, roapolo tao naho mihoatre. ²⁸ Ty raraha iereo le magnatreke reo foko i Arona amity asa ao antragno Yaveh. Iereo le mikara-kara reo kianja, reo efetragno, ty fomba fandiova reo zaka iaby ze ahy Yaveh, naho ty asa fanompoa hafa ao antragnon'Agnahare. ²⁹ Iereo avao kea ro mikarakara ty mofo ty fiatreha, ty koba soa lisa ho vare fagnatetre, ty mofo manify tsy misy masirasira, fagnatetre voaende, fagnatetre misy diloilo, naho ty fagnarana ty hamaroa vaho habein-jaka iaby. ³⁰ Nitsanga isa-maray avao kea iereo mba hisaotre vaho hiantsa Yaveh. Natao iereo avao kea zay ty hariva ³¹ naho na ombia mbia ro manese fagnatetre oroa ho ahy Yaveh, na amity Sabata na amity fandaza ty voaloham-bola vaho amity andro fagnafara. Ty isake mare, ze voatendre ty lily, le tsy maintsy atoro eo agnoloa Yaveh zisikagne. ³² Iereo ro nita ty tragno lay fivoria, ty toera masy, naho nanorake reo foko i Arona nama iereo tamity fanompoa tao antragno Yaveh.