¹ Nisy fahavalo raike nitsanga nandietre Israely naho nandrisike i Davida mba hagnisake ty Israely. ² Hoe Davida tamy Joaba vaho reo mpifehe ty tafike hoe:" Mindehana, isaho ty vahoke Israely bakao Beri-sheba ka zisikagne Dana naho ento amiko, mba hahaiako ty isa iereo." ³ Le hoe joaba hoe:" Hanombo agnabo zato ty tafine anie Yaveh. Kanefa ry tompoko ty mpanjaka, feie tsy manompo ty tompoko ie iaby? Nagnino ro mipay zay ty tompoko? Nagnino ro minday heloke amy Israely?" ⁴ Kanefa tampetre ty safa ty mpanjaka amy Joaba. Ka le lasa Joaba naho nindeha nagnera Israely iaby. Bakeo le nihere tao Jerosalema re. ⁵ Naho le tinao Joaba tamy Davida ty fiharoa ty isa reo lahilahy mpialy. Nisy lahilahy 1.100.000 mita-meso tao Israely. Joda arere ro nana miaramila 470.000. ⁶ Fa Levy vaho Benjamina le tsy voaisake amiereo, satria niheje i Joaba ty baiko ty mpanjaka. ⁷ Naha-tohy an'Agnahare ty fihetsene, ke le nanafike Israely Re. ⁸ Hoe Davida tamin'Agnahare hoe:" Nanonta bey raho tamity fanova zay. Kea afaho ty heloke ty mpanomponao, satria nanao zaka-tsy mete bey raho." ⁹ Hoe Yaveh tamy Gada, mpaminane Davida hoe: ¹⁰ "Mindehana ambarao amy Davida hoe:' Zao ro atalily Yaveh: Ameko safidy telo riha: Mifilia raike amireo."' ¹¹ Laha zao Gada le nimbaeo amy Davida naho nanao tamine hoe:" Zao ro ambara Yaveh:' Mifilia raike amitoa: ¹² kere telo tao, sa telo vola hiagne reo fahavalo vaho tratre ty meso iereo, sa telo andro amity meso Yaveh, zane hoe, arete-mandany ao amity tane, miarake amity anjele Yaveh mandrava magnera ty tane Israely iaby.' Ka amizao are, tampaho ty valen-drehake tokone ho enteko agne amity nagnirake ahy." ¹³ Le hoe Davida tamy Gada hoe:" Sahira loatre raho. Engao raho hitonta eo antagna Yaveh hoe zay eo antagna ty ndaty, satria vatane foloay ty fandeferane." ¹⁴ Laha zao le nandefa loza tamy Israely Yaveh, naho ndaty fito ale ro mate. ¹⁵ Nandefa anjele tagne Jerosalema Yaveh mba handrava zay. Laha igne re mba handrava aze igne, le nagnente Yaveh naho nagnova ty saine tamity raty. Hoe re tamity anjele mpandrava hoe:" Ampe zay! Ajanogno ty tagnanao." Tamize andro zay le nitsanga teo amity famoloa Araona ty Jebosita ty anjele Yaveh. ¹⁶ Nagnente ambone Davida naho nahisake ty anjele Yaveh nitsanga teo agnivo ty tane vaho ty lagnitre, nisy meso nanondro i Jerosalema tegne antagnane. Bakeo Davida vaho reo olobey, nisiky akanjo fandala, nagnohoke ty tarehe iereo tamity tane. ¹⁷ Le hoe Davida tamin'Agnahare hoe:" Feie tsy zaho ro nandily ty hagnisaha reo tafike? Nanao zay zaka raty zay raho. Fa reo agnondry reo, ino ro natao iereo? Ry Yaveh Zagnahareko! Ao ty tagnanao hagnisy ahy vaho ty fokoko, fa ko enga hitoboke amity vahoakenao ty loza." ¹⁸ Le nandily i Gada ty anjele Yaveh mba hitalily amy Davida, fa tokone hiakatre vaho hagnore alitara ho ahy Yaveh eo amity famoloa Araona ty Jebosita ty Davida. ¹⁹ Laha zao le lasa niakatre Davida arake ty toro-hevetre napane Gada nanoene amity agnara Yaveh. ²⁰ Laha mboe nandisa vare ty Araona, le nitolike re naho nahisake ty anjele. Le nihaja iereo vaho reo anadahine efatre. ²¹ Laha fa niavy tagne amy Araona ty Davida, le nagnente Araona ka nahisake i Davida. Niala ty famoloa re naho nagnohoke ty tarehene tamity tane to amy Davida. ²² Le hoe Davida tamy Araona hoe:" Avilio amiko ty famoloa toy, mba hahafahako magnore alitara ho ahy Yaveh. Haloako ty viline feno, mba hiala amity vahoake ty loza." ²³ Hoe Araona tamy Davida hoe:" Alao ho anao zay, ry tompoko ty mpanjaka. Anovo amine ze hisanao fa soa ao amasonao. Ingo, hagnomea agnombe ho anao ho fagnatetre oroa raho, ty famofoham-bare ho hetae, naho ty vare ho fagnatetre voa; hameako anao iaby zay." ²⁴ Le hoe Davida mpanjaka tamy Araona hoe:" Aha, mifahatre hivily zay amity viline feno raho. Tsy hangalake ze anao vaho hanolotre zay ho fagnatetre oroa amy Yaveh raho laha amea ahy avao zay." ²⁵ Laha zao le nandoa enen-jato sekele volamena ho ahy ty toera ty Davida. ²⁶ Nagnore alitara ho ahy Yaveh teo Davida naho nanolotre fagnatetre oroa vaho fagnate-piharoa teo amizay. Nikaike Yaveh re, ty namale aze tamity afo bakahne andagnitse ho eo amity alitara fagnoroa ty fagnatetre oroa. ²⁷ Bakeo Yaveh nagnomea baiko ty anjele, naho nagnere ty mesone tao amity fitobohane ty anjele. ²⁸ Laha fa hisa Davida fa namale aze teo amity famoloa Araona ty Jebosita ty Yaveh, le nanao ty soro teo re tamio andro o avao. ²⁹ Naho tamize andro zay, ty tabernakele Yaveh, ze natao Mosesy tagne agnefetre, vaho ty alitara ho ahy ty fagnatetre oroa, le tagne amireo tane agnabo tagne Gibeona. ³⁰ Kanefa, tsy afake nindeha tagne mba hangatake ty tari-dalan'Agnahare ty Davida, satria natahotre ty meso ty anjele Yaveh re.