¹ Tafara zay Davida le nanafike ty Filistina naho naharese iereo. Nalane teo amity fifehea ty Filistina ty Gata vaho ty tanane. ² Naho naharese i Moaba re bakeo, naho le lasa mpanompo Davida ty Moabita naho nandoa haba tamine. ³ Le rese Davida ty Hadarezera, mpanjaka i Zoba tao Hamata, laha mboe nindeha mba hanao ty lalane teo amoro ty rano i Eofrata ty Hadarezera. ⁴ Nitsepake kalese arivo, vaho mpitiki-tsoavale fito arivo, naho mpindeha antomboke roe ale ty Davida. Finily Davida reo soavale ty Kalese iaby, fa nanonka ze mahampe kalese zato re. ⁵ Tamy niavy mba hagnampe Hadarezera mpanjaka Zoba reo Syriana bakagne Damaskosy, le namono lahilahy Syriana roa arivo vaho roe ale ty Davida. ⁶ Bakeo nametrake miaramila tagne Syria agne Damaskosy ty Davida, ka lasa mpanompo Davida ty Syriana naho nandoa haba tamine. Namea Yaveh faharesea ty Davida na taia aia niombane. ⁷ Nalae Davida reo ampinga volamena iaby tegne amity mpanompo Hadarezera naho nientene tagne Jerosalema. ⁸ Tagne Tibata vaho Kona, tana i Hadarezera, le nangalake varahy maro ty Davida. Ze varahy zay ro nagnanova Solomona ty riake varahy, ty ambe, vaho ty zaka varahy tafara atoy. ⁹ Tamy rey Toy, mpanjaka Hamata, fa rese Davida ty tafike Hadarezera mpanjaka Zoba iaby, ¹⁰ le nalefa i Toy tagne amy Davida ty Hadorama anadahine mba hanalama vaho hisaotre aze, satria Davida nialy tamy Hadarezera vaho naharese aze, naho satria nagnore aly tamy Toy ty Hadarezera. Naho Hadorama le ninday zaka vita tamity volafoty, volamena, naho varahy niarake tamine. ¹¹ Natoka Davida mpanjaka ho ahy Yaveh reo zaka reo, niarake tamity volafoty vaho volamena ze nientene bakamity fierene iaby: Edoma, Moaba, ty vahoake Amona, reo Filistina, naho ty Amalekita. ¹² Namono Edomita valo arivo vaho ray ale ty Abisay anadahy Zeroia tao amity Baibon-driake. ¹³ Nametrahane miaramila tao Edoma, naho le lasa mpanompo Davida reo Edomita iaby. Namea Yaveh faharesea ty Davida na taia aia niombane. ¹⁴ Nanjaka teo amy Israely iaby Davida, naho nanao ty rarene vaho ty hamarea tamity vahoakene iaby re. ¹⁵ Joaba anadahy Zeroia ro mpifehe ty tafike, naho Josafata anadahy Ahiloda ro mpitan-tsoratre. ¹⁶ Zadoka anadahy Ahitoba vaho Abimeleka anadahy Abiatara ro mpisoro, naho Saosa ro mpanora-dala. ¹⁷ Benaia anadahy Joiada ro nifehe reo Keretita vaho Peletita, naho reo anadahy Davida ro mpagnomea hevetre mitarike ty mpanjaka.