¹ Naho laha fa tafatoboke tao amity tragnone ty mpanjaka, le hoe re tamy Natana mpaminane hoe:" Ingo, mitoboke agnate tragno sedera raho, nefa ty tomabile ty fagnenkea Yaveh le mijano ao ambane lay." ² Le hoe Natana tamy Davida hoe:" Mindehana, anovo ze ao amponao, fa miomba anao ty Zagnahare." ³ Nefa ty hale igne avao le avy tamy Natana ty safan'Agnahare, nanao hoe: ⁴ " Mindehana naho ambarao Davida mpanompoko hoe:' Zao ro safa Yaveh: Tsy hagnore tragno ho ahy mba hitobohako riha. ⁵ Fa tsy mboe nitoboke tao agnate tragno Raho nanomboke tamity andro ze nindaisako Israely niakatre ka zisikamizao andro zao. Fa kea, nitoboke tao agnate lay Raho, le tabernakele, tamity toera sambehafa. ⁶ Tamity toera iaby ze le fa nifindrako teo amy Israely iaby, feie vao Raho le fa nirehake na ino ino tamireo mpitarike Israely ze tinendreko ho mpiambe ty vahoako, nanao hoe:" Nagnino nareo ro tsy nagnore tragno sedera ho ahy?""' ⁷ "Amizao are, ambarao Davida mpanompoko hoe:' Zao ro safa Yaveh tompo ty maro: Zaho ro nangalake anao bakamity tane fihinanam-bilo, bakamity fiaraha agnondry, mba ho mpandily eo amy Israely ndatiko riha. ⁸ Niomba anao Raho na taia aia niombanao naho nandrava reo fahavalonao tsy ho eo agnoloanao, naho hameako agnara, manahake ty agnara reo ze bey eto ambone ty tane riha. ⁹ Hanendre toera raike ho ahy Israely ndatiko Raho naho hanao iereo ao, mba hitoboha iereo ao amity toera iereo arere naho tsy hana fisalasala sase. Reo ndaty raty fagnahy le tsy hampijale iereo, manahake ty natao iereo taloha sase, ¹⁰ manahake ty natao iereo nanomboke tamity andro ze nandiliako reo mpitsara mba ho eo amy Israely ndatiko. Bakeo handavo lefo reo fahavalonao iaby Raho. Fagnampe zay le ataliliko aminao fa izaho, Yaveh, le hagnore tragno raike ho anao. ¹¹ Ho avy zay laha fa lefe ty andronao ze hindehananao agne amireo razambeinao, le hananga reo foko afara nao Raho, naho ho ahy ty raike amireo fokonao, le Zaho ro hanao ty fanjakane. ¹² Hagnore tragno ho Ahy re, naho Zaho hanao ty sezan-droandriane zisikezay. ¹³ Ho raene Raho, naho re ho anako. Tsy hafahako amine ty fatokia ty fagnenkeako, manahake ty nagnafahako zay tamy Saoly, ze nandily talohanao. ¹⁴ Hatoboko ho eo amity tragnoko vaho ho eo amity fanjakako zisikezay re, naho ty sezan-droandria le hitoboke zisikagne."' ¹⁵ Le nirehake tamy Davida ty Natana naho nitalily reo rehake iaby reo tagne amine, ka nirehake tamine momba ty fahisaha raike iaby re. ¹⁶ Le nilitre Davida mpanjaka naho nitoboke teo agnoloa Yaveh; hoe re ty hoe:" Ia vao Raho, ry Yaveh Zagnahare, naho ino ty fokoko, ro le nientenao ho amize fagniria zao raho? ¹⁷ Fa zaka kele teo amasonao zay, ry Zagnahare. Nirehake ty amity foko ty mpanomponao ze mboe hoavy Riha, naho nanoro ahy reo foko hoavy, ry Yaveh Zagnahare. ¹⁸ Ino kea ro azoko, zaho Davida, rehafe aminao? Nameanao hasy ty mpanomponao. Nameanao saotre arere ty mpanomponao. ¹⁹ Ry Yaveh, noho ty amity mpanomponao, vaho mba hahalefe ty fagniria arere, ro nagnanovanao ze zaka-bey zao mba hanoroa reo asanao foloay iaby. ²⁰ Ry Yaveh, tsy misy manahake anao, naho tsy misy Zagnahare laha tsy Riha, arake ze le fa reinay zisikagne. ²¹ Fa ia ro firene eto ambone tane manahake ty Israely ndatinao, ty navotanao, Zagnahare, bakagne Egypta mba ho vahoako ho Anao, mba hanao agnara ho anao amireo asa foloay vaho mahalatsa? Reo firene le rinoanao tsy ho eo agnoloa ty vahoakenao, ze navotanao tamy Egypta. ²² Nataonao ho vahoakenao arere zisikezay ty Israely, naho Riha, ry Yaveh, le lasa Zagnahare iereo. ²³ Ka amizao, ry Yaveh, hitoboke zisikezay anie ty fampagnantegna ze nataonao mikasike ty mpanomponao vaho ty fokone. Anovo arake ze le fa nirehafenao. ²⁴ Hitoboke zisikezay anie ty agnaranao naho ho foloay, ka hirehake ty ndaty hoe:" Yaveh tompo ty maro ro Zagnahare Israely,' laha atoboke eo agnoloanao, ty tragnoko, Davida mpanomponao. ²⁵ Fa Riha, ry Zagnahareko, le fa nanoro tamity mpanomponao fa hagnore tragno ho aze Riha. Zay ro antone, nahisahako, zaho mpanomponao, harisiha hivavake aminao. ²⁶ Ka amizao, ry Yaveh, Riha ro Zagnahare, naho le fa nanao ze fampagnantegna soa zay tamity mpanomponao: ²⁷ Naho zotoko ty hitahy ty tragno ty mpanomponao, mba hitohiza zay zisikagne eo agnoloanao. Riha, ry Yaveh, ro nitahy zay, Ka ho voatahy zisikagne zay."