¹ Le niente iereo nilitre ty tomabilen'Agnahare naho natobo iereo teo agnivo ty lay ze nanoe Davida ho ahy zay. Bakeo nanolotre fagnatetre oroa vaho fagnate-piharoa teo agnoloan'Agnahare iereo. ² Laha fa vita Davida ty soro ty fagnatetre oroa vaho ty fagnate-piharoa, le nitahy ty vahoake tamity agnara Yaveh re. ³ Nizara mofo, vaikin-kena, naho mofo mamy misy voaloboke tamireo Israelita iaby, na lahy na vave re. ⁴ Nanendre Levita ilane mba hanompo eo agnoloa ty tomabile Yaveh ty Davida, naho mba handaza, hisaotre vaho hiantsa Yaveh, ty Zagnahare Israely. ⁵ Reo Levita reo le Asafa ty mpitarike, naho faharoe magnorike aze ty Zakaria, Jeiela, Semiramota, Jehiela, Matita, Eliaba, Benaia, Obed-Edoma, naho Jeiela. Reo ro nitendre lokanga vaho harpa. Asafa ro nampagneno ty kipantso, ty magneno mafe. ⁶ Benaia vaho Jahaziela mpisoro ro mpitioke tsy tampake ty trompetra, teo agnoloa ty tomabile ty fagnenkean'Agnahare. &Naho tamize andro zay Davida ro nanendre voalohane i Asafa vaho reo rahalahine mba hiantsa i antsa ao fandala Yaveh eo. ⁸ Toloro fisaora Yaveh, kaiho ty agnarane; ampahaio eo amireo firene ty asane. ⁹ Miantsa aze, miantsa antsa Aze; atalilio reo asane mahagaga iaby. ¹⁰ Mirehareha amity agnarane masy; ao hifale ty arofo reo ze mipay Yaveh. ¹¹ Paio Yaveh vaho ty herene; paio zisikagne ty fiatrehane. ¹² Tiarovo reo zaka-mahagaga nataone, reo fahagaga vaho reo lala bakamity vavane, ¹³ ry foko Israely mpanompone, nareo vahoake i Jakoba, ze finiline. ¹⁴ Re ro Yaveh, Zagnaharentika. Amity tane iaby reo lalane. ¹⁵ Anovo ao antsay zisikagne ty fagnekeane, le ty rehake ze nandiliane reo foko arivo hifandimbe. ¹⁶ Mahatiaro ty fagnenkea ze nataone tamy Abrahama, vaho ty vavane tamy Isaka Re. ¹⁷ Zay ro nihamafesene tamy Jakoba hoe ty fotsipeke, naho tamy Israely hoe ty fagnenkea zisikezay. ¹⁸ Hoe re ty hoe:" Hagnomea anareo ty tane Kanana ho anjara lovanareo Raho." ¹⁹ Niente zay raho laha mboe tsy ampe isake nareo, vatane tsy ampe, naho vahiny tao amity tane. ²⁰ Nindeha tamity firene ho amity firene iereo, bakamity fanjaka raike mbaeo amity hafa. ²¹ Tsy nisy na ia ia nengane hampijale iereo; reo mpanjaka le niseze noho ty amiereo. ²² Hoe Re hoe:" Ko mikasike reo ze voahosotre, naho ko magnisy raty reo mpaminaneko." ²³ Miantsa ho Yaveh, ry tane iaby; atalilio isan'andro sanandro ty famonjeane. ²⁴ Atalilio eo amireo firene ty hasine, naho reo amireo firene iaby reo asane mahalatsa. ²⁵ Fa foloay Yaveh ka tokone ho antsae vatane, naho tokone hatahora ambone reo zagnaharen-kafe iaby Re. ²⁶ Satria sampe reo zagnahare ty firene iaby, fa Yaveh ro nanao ty lagnitre. ²⁷ Eo amity fiatrehane ty famirapirata vaho ty vonenahitre. Naho eo amity toerane ty here vaho ty hafalea. ²⁸ Magnomea Yaveh, ry foko ty vahoake, magnomea hasy vaho here Yaveh; ²⁹ ameo Yaveh ty hasy soa ty agnarane. Mindaisa fagnatetre naho mindeha eo agnoloane. Mihohofa amy Yaveh amity famirapiratane masy. ³⁰ Mihovita ao agnoloane, ry tane iaby. Zao tontolo zao avao kea le fa naore; tsy afake hozogne zay. ³¹ Ao ho fale ty lagnitre, naho ao hifale ty tane; ao iereo hirehake eo amireo firene hoe:" Manjaka Yaveh." ³² Ao hintsero ty riake, naho ze mameno zay le hikorake ampifalea. Ao ho fale reo baibo, vaho iaby ze ao amireo. ³³ Naho reo hetae ao angala hikorake ampifalea eo agnoloa Yaveh, fa ho avy hitsara ty tane Re. ³⁴ Misaora Yaveh, fa soa Re, satria maharetre zisikezay ty fagnenkeane matoky. ³⁵ Bakeo mirehafa hoe:" Vonjeo zahy, ry Zagnahare ty famonjeanay. Avorio miarake zahay naho vonjeo amireo firene hafa, mba ho afake hanolotre fisaora ho ahy ty agnaranao masy vaho vonenahetre amity fiantsa anao zahay." ³⁶ Ho antsae zisikagne zisikagne anie Yaveh, ty Zagnahare Israely. Hoe ty ndaty iaby hoe:" Amena" naho niantsa Yaveh. ³⁷ Laha zao Davida le namototre i Asafa vaho reo rahalahine teo agnoloa ty tomabile ty fagnenkea Yaveh, mba hanompo zisikagne eo agnoloa ty tomabile, arake ze paie ty asa isan'andro sanandro. ³⁸ Agnate zay i Obed-edoma miarake amireo longone valo amby enem-polo. Obed-Edoma anadahy Jedotoma, miarake amy Hosa, ro mpiambe vavahady. ³⁹ Zadoka ty mpisoro vaho reo mpisoro namane le teo amity toera agnabo tao Gibeona mba hanompo eo agnoloa ty tabernakele Yaveh. ⁴⁰ Hanolotre fagnatetre oroa zisikagne amity maray vaho hariva ho ahy Yaveh eo ambone ty alitara ho ahy ty fagnoroa fagnatetre iereo, arake iaby ze voasoratre ao amity lily Yaveh, ze nameane ho lily ho ahy Israely. ⁴¹ Hemana vaho Jedotona le nagnirake tamiereo, niarake tamireo sisane ze finily tamity agnara, mba hanolotre fisaora Yaveh, satria maharetre Yaveh, satria maharetre zisikezay ty fagnenkeane matoky. ⁴² Hemana vaho Jedotona ro mpita ty tragno reo ze mitioke trompetra, kipantso, naho zaka-magneno hafa ho ahy ty antsa masy. Reo anadahy Jedotona ro niambe ty vavahady. ⁴³ Bakeo ty ndaty iaby nihere tagne antragno iereo iaby, naho Davida nihere mba hitahy ty fokone.