¹ Naho Davida nagnamboatre tragno ho aze tao antana Davida. Nagnoma toera ho ahy ty tomabilen'Agnahare naho nagnore lay ho ahy zay re. ² Le hoe Davida hoe:" Reo Levita avao ro afake minday ty tomabilen'Agnahare, fa iereo ro voafily Yaveh mba hinday ty tomabile Yaveh, vaho hanompo aze zisikagne." ³ Le navory Davida tao Jerosalema ty Israely iaby, mba hagnakatre ty tomabile Yaveh agne amity toera le fa vinognone ho ahy zay. ⁴ Navory Davida niarake reo foko Arona vaho reo Levita. ⁵ Tamireo foko i Kehata, le nisy i Oriela mpitarike vaho reo longone, lahilahy 120. ⁶ Tamireo foko Merary, le nisy i Asaia mpitarike vaho reo longone, lahilahy 220. ⁷ Tamireo foko i Gersona, le nisy i Joela mpitarike vaho reo longone, lahilahy 130. ⁸ Tamireo foko i Elizafana, le nisy Semaia mpitarike vaho reo longone, lahilahy 200. ⁹ Tamireo foko i Hebrona, le nisy i Eliala mpitarike vaho reo longone, lahilahy valompolo. ¹⁰ Tamireo foko i Oziela, le nisy i Aminadaba mpitarike vaho reo longone, lahilahy 112. ¹¹ Nikaike i Zadoka vaho Abiatara mpisoro, naho reo Levita Oriela, Asaia, Joela, Semaia, Eliala, naho Aminadaba ty Davida. ¹² Hoe re tamiereo hoe:" Inareo ro loha reo foko ty Levita. Hamasigno ty vatagnareo, le nareo vaho reo rahalahinareo, mba hahafahanareo magnakatre ty tomabile Yaveh, ty Zagnahare Israely, ho agne amity toera ze le fa vinognoko amizay. ¹³ Tsy ninday zay nareo tamity voalohane. Zay ro antone nagnaliloa Yaveh Zagnahare antika, satria tsy nipay aze na nagnenke ty lalane tika." ¹⁴ Laha zao le nagnamasim-bata reo mpisoro vaho reo Levita mba hahafaha iereo magnakatre ty tomabile Yaveh, ty Zagnahare Israely. ¹⁵ Le niente reo Levita teo antsoro iereo tamity bao ty tomabilen'Agnahare, arake ze la fa nandilia Mosesy__magnorike reo fotsipeke namea bakamity safa Yaveh. ¹⁶ Nirehake tamireo mpitarike ty Levita ty Davida mba hanendre ty rahalahy iereo ho mpiantsa amireo zaka-magneno, valiha, lokanga vaho kipantso, hagnakatre mafe vaho ankafalea ty feo iereo. ¹⁷ Le tinendre reo Levita ty Hemana anadahy Joela vaho ty raike tamireo rahalahine, le i Asafa anadahy Berekia. Nanendre longo bakamireo foko Merary vaho Etana anadahy Kosaia avao kea iereo. ¹⁸ Niarake tamiereo kea ty longo vatane magnorike iereo: Zakaria, Jaziela, Semiramota, Jehiela, Ony, Eliaba, Benaia, Mahaseia, Matitia, Elifeleho, Mikneia, Obede-edoma, naho Jeiela, reo mpiambe vavahady. ¹⁹ Hemana, Asafa, naho Etana mpiantsa le tinendre mba hititike mafe ty kipantso varahy. ²⁰ Zakaria, Aziela, Semiramota, Jehiela, Ony, Eliaba, Mahaseia, naho Benaia ro nititike reo valiha, tamity Alamota. ²¹ Matitia, Elifeleho, Mikneia, Obed-edoma, Jeiela, naho Azazia ro nitari-dala tamity harpa tamity Saminita. ²² Kenania, mpitarike reo Levita, re ro tonia ty fiantsa satria magnanatre antsa re. ²³ Berekia vaho Elkana ro mpiambe ty tomabile. ²⁴ Senaia, Josafata, Netanela, Amasay, Zakaria, Benaia, naho Eliezera, reo mpisoro, ro nitioke reo trompetra teo aloha ty tomabilen'Agnahare. Obed-edoma vaho Jehia ro mpiambe ty tomabile. ²⁵ Naho Davida, reo olobey Israely, vaho reo mpifehe ty agnarivone le nindeha nagnakatre ty tomabile ty fagnenkea Yaveh bakao antragno Obed-edoma tamin-kafalea. ²⁶ Naho Zagnahare laha nanorake reo Levita ze ninday ty tomabile ty fagnenkea Yaveh, le nanao soro agnombe fito vaho agnondrilahy fito iereo. ²⁷ Nanao akanjo vita tamity rongnom-poty ty Davida, manahake reo Levita ze ninday ty tomabile, reo mpiantsa, naho Kenaia, ty mpitarike ty antsa amireo mpiantsa. Niakanjo efoda rongom-poty ty Davida. Ka le nagnakatre ty tomabile ty fagnenkea Yaveh tamity koran-kafalea, vaho tamity feon-antriva, tamity kipantso, naho tamity valiha vaho harpa ty Israely iaby. ²⁹ Nefa laha niavy tao antana ty Davida ty tomabile ty fagnenkea Yaveh, le nijilo teo an-dafonete ty Mikala anakampela Saoly. Nahisake Davida mpanjaka nandihy vaho nandaza re. Bakeo nanao tsinontsino aze tao agnarofone re.