¹ Naho Hirama mpanjaka i Tyro nandefa mpinday talily tagne amy Davida, vaho hetae sedera, mpandrafitre, naho mpanao tragno. Nagnore tragno ho aze iereo. ² Davida le nahay fa Yaveh ro le fa nametrake aze ho mpanjaka teo amy Israely, naho ty fanjakane le natao ambone noho ty amy Israely ndatine. ³ Tao Jerosalema, le nangalake valy maro Davida, naho niterake anadahy vaho anakampela maro re. ⁴ Toa iaby ty agnara reo anane iaby naterane tagne Jerosalema: Samoa, Sobaba, Natana, Solomona, ⁵ Jibara, Elisoa, Elipeleta, ⁶ Noga, Nafega, Jafia, ⁷ Elisama, Beliada naho Elifeleta. ⁸ Naho laha fa rey reo Filistina fa le fa hinosotre ho mpanjaka Israely iaby Davida, le niakatre nipay aze iereo iaby. Nefa rey Davida zay ka niakatre handietre iereo re. ⁹ Naho lasa reo Filistina ka nanao fanafiha tegne amity Baibo ty Refaita. ¹⁰ Bakeo Davida nangatake fagnampea tamin'Agnahare. Hoe re ty hoe:" Tokone hiakatre hanafike reo Filistina vao raho? Hagnomea faharesea eo amiereo vaho riha?" Le hoe Yaveh tamine hoe:"Tafiho, fa vatane hagnomea iereo ho anao raho." ¹¹ Le niakatre nimbaeo Bala-perazima iereo, naho tao nahareseane iereo. Nanoro hevetre re hoe:" Ty tagnako ro namakia Yaveh ty fahavaloko hizara hoe ty rano-bey." Ka lasa Bala-perazima ro agnara ze toera zay. ¹² Naleve iereo Filistina teo reo zagnaharene, naho nagnomea lily Davida fa tokone horoa reo. ¹³ Naho nanafike ty baibo ndraike ty Filistina. ¹⁴ Le nangatake fagnampea tagne amin'Agnahare ndraike Davida. Hoe ty Zagnahare tamine hoe:" Tsy tokone hanafike iereo eo agnoloa riha, fa kea hihodidy ao afara iereo naho ho avy eo amiereo bakeo amireo hetae balsama. ¹⁵ Laha fa reinao ty feo ty lia-bey amity fitio ty tioke bakeo amireo vohitse ty hetae balsama, le manafiha amin-kere. Manova zay satria Zagnahare le fa hiaolo lala anao hanafike ty tafike reo Filistina." ¹⁶ Ka natao Davida ze nandilian'Agnahare aze. Naharese ty tafike reo Filistina tagne Gibeona zisikagne Gazera re. ¹⁷ Naho ty laza Davida le niele teo amity tane iaby, naho nahavy ty firene iaby hatahotre aze Yaveh.