¹ Davida le nirehake tamireo mpifehe ty arivo vaho zato, niarake tamity mpitarike iaby. ² Hoe Davida tamity vondron-tafike iaby hoe:" Laha soa aminareo, naho laha bakamy Yaveh Zagnaharentika zay, le ao tika handefa mpinday talily egne iaby io agne amireo rahalahintika ze mitoboke agne amireo faritre Israely iaby, naho agne amireo mpisoro vaho reo Levita ze ao amireo tana iereo. Ao iereo ho rehafe mba hiarake amintika. ³ Andao tika hagnere amintika ty tomabile ty Zagnaharentika, satria tsy nipay satrampone tika tamireo andro ty fanjaka Saoly." ⁴ Ty vondron-tafike iaby le nagnenke hanao reo zaka reo, satria toe mare teo amaso ty ndaty iaby reo. ⁵ Ka navory Davida hiarake ty Israely iaby, zisikagne amy Rano Sihora agne Egypta ka hatragne Lebo Hamata, mba hinday ty tomabilen'Agnahare bakagne Kitiata Jearima. ⁶ Niakatre nimbaeo Bala ty Davida vaho ty Israely iaby, zane hoe, Kiriata Jearima, ty ahy Joda, mba hinday ty tomabilen'Agnahare bakagne, ze kinaike tamity agnara Yaveh, le Yaveh, ty mitoboke eo amity sezan-droandria eo amity Kerobima. ⁷ Laha zao le natobo iereo teo ambone sarete vaovao ty tomabilen'Agnahare. Nakare iereo bakao amity tragno i Abinada zay. Oza vaho Ahio ro ninday ty sarete. ⁸ Davida vaho ty Israely iaby le nandaza teo agnoloan'Agnahare tamity here iereo iaby. Niantsa niarake tamity lokanga, ampongatampake, Kipantso, naho trompetra iereo. ⁹ Laha fa niavy teo amity tane famoloa Kidona iereo, le namototre ty tagnane hita ty tomabile ty Oza, satria nitonta ty agnombe. ¹⁰ Le nirehetre tamy Oza ty helo Yaveh, naho vinono Yaveh re satria namototre ty tagnane tamity tomabile ty Oza. Mate teo agnoloan'Agnahare teo re. ¹¹ Meloke Davida satria nagnisy Oza ty Yaveh. Natao ty hoe Pereza Oza ze toera zay zisikandroany. ¹² Natahotre an'Agnahare ty Davida tamize andro zay. Hoe re ty hoe:" Akore ro fomba hindaisako ty tomabilen'Agnahare amiko atoy?" ¹³ Ka tsy nagnetseke ty tomabile ho agne amity tana Davida ty Davida, fa nanao zay teo agnila ty tragno i Obeda Edoma ty Getita. ¹⁴ Le nijano tao amity tragno Obeda Edoma zisike ty telo vola ty tomabilen'Agnahare. Laha zao le nitahy ty fokone vaho iaby ze nanagnane ty Yaveh.