¹ Toa iaby reo lahilahy ze niavy tagne amy Davida tao Ziklaga, laha mboe voaroake tamity fiatreha Saoly anadahy Kisy re. Agnate reo miaramila iereo, mpagnomba aze agnaly. ² Nirongo folese iereo naho afake nampiasa ty tagnane ankavana vaho ankavia tamity pilatse vaho tamity fitifira amity tsipika. Benjamita iereo, mpiarake foko tamy Saoly. ³ Ahiezera ro bey, bakeo Joasy, sambe anadahy Sema ty Gibeanita iereo. Nahitana i Jeziela vaho Peleta, anadahy Azmaveta. Nahitana avao kea Beraka, Jeho ty Anatotita, ⁴ Jismaia ty Gibeoniita, agnate reo miaramila telo-polo (naho mpifehe reo telo-polo); Jeremia, Jahaziela, Johanana, Jozababa ty Gaderatita, ⁵ Elozay, Jerimota, Bealia, Semaria, Sefatia ty Harofita, ⁶ reo Koraita Elkana, Jisia, Azarela, Joezera, Jasobeama, naho ⁷ Joela vaho Zebadia, anadahy Jehorama bakagne Gedora. ⁸ Nisy Gadita ilane namonje i Davida tao amity fiaro mafe tagne agnefetre. Lahilahy mpialy iereo, lahilahy voa anatre ho amity aly, ze afake mita ampinga vaho lefo; ty tarehe iereo le masiake manahake ty tarehe ty liona. Malaky lia manahake ty gazela egne ambohitse iereo. ⁹ Nisy i Ezera ty mpitarike, Obadia ro faharoe, Eliaba ro fahatelo, ¹⁰ Mismana ro fahaefatre, Jeremia ro fahadime, ¹¹ Atahy ro fahaene, Eliala ro fahafito, ¹² Johanana ro fahavalo, Elizabada ro fahasive, ¹³ Jeremia ro fahafolo, Makbanay ro faha raike amby folo. ¹⁴ Reo anadahy Gada reo ro mpitarike tafike. Ty ambane vatane nitarike an-jatone, naho ambone vatane nitarike agnarivone. ¹⁵ Nitsake i Jordana iereo tamity vola voalohane, laha fa nandifotre ty moro zay, ka nandroake ty zaka-managnay iaby tamireo baibo, na ty mbaeo antignana na ty mbaeo ahandrefa. ¹⁶ Ty vakine tamireo lahilahy i Benjamina vaho Joda le niavy tao amity fiaro tao amy Davida. ¹⁷ Niakatre mba hanalaka iereo Davida naho nirehake tamiereo hoe:" Laha avy ampilamina amiko atoy mba hagnampe ahy nareo, le afake mamonje ahy. Fa laha avy mba hivalike ahy amity fahavalo, le ao anie ty Zagnahare ty razambeintika hanente ka hamale anareo, satria tsy nanao raty raho." ¹⁸ Bakeo ty Fagnahy niavy tao amy Amasay, ty mpitarike ty telo-polo. Hoe Amasay hoe:" Zahay le riha, ry Davida. Zahay le mifanao aminao, ry anadahy Jese. Fiadagna, fiadagna anie ho amize magnampe anao. Fiadagna anie ho amireo mpiasanao, satria ty Zagnaharenao le magnampe anao." Le nandrae iereo Davida naho nanao iereo ho mpifehe ty lahilahine. ¹⁹ Ty ilane bakamy Manase avao kea le niala hamonje Davida laha niarake tamireo Filistina mba hialy amy Saoly re. Nefa tsy nagnampe reo Filistina iereo, satria nifandineke reo tompo i Filistina ka nampindeha Davida. Hoe iereo ty hoe:" Hiala ho agne amy Saoly tompone re ka hampidi-doza ty fiaignantika." ²⁰ Laha fa nimbaeo Ziklaga re, ty lahilahy Manase ze namonje aze le Adna, Jozabada, Jediaela, Mikaela, Jozabada, Eliho, Ziletahy, Kapitene ty agnarivo i Manase. ²¹ Nagnampe Davida nialy tamireo antoko mpijirika iereo, satria lahilahy mpialy iereo. Tafara atoy le lasa mpifehe teo amity tafike iereo. ²² Isan'andro, le niavy tagne amy Davida reo lahilahy mba hagnampe aze, mandram-pisia ty tafike bey, manahake ty tafin'Agnahare. ²³ Toy ro tahirin-tantara reo miaramila nitam-pialia ho amity aly, ze niavy tagne amy Davida tao Hebrona, mba hagnody ty fanjaka i Saoly ho aze, ze nanao ty safa Yaveh. ²⁴ Tamy Joda le 6. 800 reo mpita ampinga vaho lefo ro voa anatre hialy. ²⁵ Nisy lahilahy mpialy 7.100 bakamireo Simeonita. ²⁶ Nisy lahilahy mpialy 4.600 bakamireo Levita. ²⁷ Joiada ro mpitarike ty foko i Arona, naho 3.700 ro niarake tamine. ²⁸ Mpitarike roe amby roa-polo bakamity fokon-draene ro niarake tamy Zadoka, ajalahy, mahere, vaho lahilahy bey herem-po. ²⁹ Bakamy Benjamina, foko Saoly, le nisy telo arivo. Ty hamaroa iereo le mboe nijano ho mpiomba Saoly zisikamizao andro zao. ³⁰ Nisy lahilahy mpialy 20.800 bakamireo Efraimita, lahilahy nalaza teo amity foko ty razambey iereo. ³¹ Bakamity vaky mpoko Manase le nisy lahilahy malaza valo arivo vaho ray ale ze niavy mba hanao Davida ho mpanjaka. ³² Bakamy Isakara, le nisy lahilahy mpitarike roanjato ze nana fahihira tamize andro zay naho nahay ty tsy maintsy atao Israely. Reo longone iaby le teo ambane fehea iereo. ³³ Nisy lahilahy mpialy dome ale bakamy Zebolona, vinogno ho amity aly, niarake tamity zaka-fialia iaby, naho vogno ty hagnomea tsy fivaliha azo antoke. ³⁴ Nisy manamboninahetre arivo bakamy Naftaly, naho lahilahy mpita ampinga vaho lefo fito arivo vaho telo ale niarake tamiereo. ³⁵ Bakamireo Danita le nisy lahilahy 28.600 vinogno ho amity aly. ³⁶ Nisy lahilahy efatre ale vinogno ho amity aly bakamy Asera. ³⁷ Bakamity andafe Jordana, bakamireo Robenita, Gadita, naho ty vaky ty foko Manase, le nisy lahilahy 120.000 ty nirongo reo karazan-jaka fialia iaby ho amity aly. ³⁸ Reo miaramila iaby, vogno ho amy aly reo, le niavy tagne Hebrona niarake tamity hevetre amity hanao Davda ho mpanjaka magnera Israely iaby. Ty sisa iaby tamy Israely le nifagnenke ty hanao Davida ho mpanjaka avao kea. ³⁹ Niarake tamy Davida tao telo andro iereo, nihina vaho nino, satria ty longo iereo le fa nampinday vatse ho aze. ⁴⁰ Fagnampezay, reo ze teo agnila iereo, zisikagne Isakara vaho Zebolona naho Naftaly, le ninday mofo tamity borike, rameva, ampondra, vaho agnombe, naho mofo aviavy, voaloboke maike, divay, menake, agnombe, naho agnondry, satria nifale ty Israely.