¹ Niavytamiko ty safa yaveh tompoa ty lako, nanao hozao: ² ''Zao ro nivolany Yaveh tompoa ty lako: ''Tea mare any Ziona tamy ty zotom-po bevata zaho sady manarahy amy ty heloky bevata zaho! ³ Zao ty nivola Yaveh tompoa ty lako: himpoly a Ziona any Zaho sady hipetraky anivo i Jerosalema, fa efa nikaiha hoe azy tana ty Ha tò i Jerosalema sady ty vohitsy Yaveh tompoa ty lako le ho kaiha manao hozao Azy Vohitsy masy iny! ⁴ ao ty vola Yaveh tompoa ty lako: Lahilahy antitsy noho ampela antitsy ndraiky ro ho an-dala bevata i Jerosalema, le ty olo kiraikiraiky hila kobay ho an-tanany eny safe fa miha antitsy ie. ⁵ Ho atriky pamaraky noho somondrara mihisa amy ty lala bevata ty tana. ⁶ zao ty vola Yaveh tompoa ty lako: Amy fotoa zay laha misy raha tsy hay anovy imaso ty olo sisa tavela, le tokony tsy ho hay anovy imasoko eo koa va zay?--- zay ty fanambara Yaveh. ⁷ Zao ty vola Yaveh tompoa ty lako: Ingo, fa an-dala ty fanafaha ty oloko amy ty fiboaha ty masoandro Zaho sady amy ty tany filenteha ty masoandr! ⁸ Fa handay androzy himpoly Zaho, le hipetraky anivo i Jerosalema ndrozy, mba ho oloko ndraiky ndrozy, le ho Ndranaharindrozy amy ty tò noho amy ty fahamarina zaho! ⁹ Zao ty vola Yaveh tompoa ty lako: ''Iha ze manohy mijanjy ty safa mifanahaky ze niboaky baka amy ty vava ty mpaminany rey lafa napitiky ty fototsy ty tranoko---tranoko toy, Yaveh tompoa ty lako: Atanjaho ty tananao mba ho voatsanga ty fiangona. ¹⁰ Fa taloha anizay andro zay le tsy nisy vokatsy voavory ty olo, tsy nisy tombony ndra hoahy ty olo ndra hoahy ty biby, sady tsy nisy fiadana hoahy ze olo miboaky ndra militsy baka amy ty vahavalo rey. Fa nanenga ty olo kiraikiraiky hanohitsy ty namany Zaho. ¹¹ Fa henanizao, le tsy hanahaky ty andro taloha, hiaro ty sisa ty olo toy Zaho--- zay ty fanambara Yaveh tompoa ty lako. ¹² Fa hafafy ty foa ty fiadana; le hanome ty vihiny ty hazo voaloboky le ty tany hanome vokatsy ty famboleny; hanome ty andony ty lanitsy, fa hampandovako ze kila raha iaby zay ty sisa amy ty olo toy. ¹³ Manahaky ty firenena ty ozo hafa nareo, lahy tariha i Joda noho tariha Israely. Le hamonjy anareo Zaho le ho fitahia nareo. Ka mavaka; tokony hatanjaky ty tananareo! ¹⁴ Fa zao ty voala Yaveh tompoa ty lako: manahaky ty nanomanako hanao raty taminareo lafa nahameloky Ahy ty razambenareo--- hoasa Yaveh tompoa ty lako--- sady tsy nandefitsy Zaho, ¹⁵ ro hanomanako hanao raha soa ndraiky hoahy Jerosalema noho ty tariha i Joda avao koa amy fotoa zay! Ka mavaka! ¹⁶ tia ty raha tsy maintsy hanovinao: Mivolana ty mary, amy ty namany ty olo kiraikiraiky. Mitsara amy ty mary, ha tò, sady fiadana amy ty vavahadinareo eo. ¹⁷ Ka manao fikasan-draty anainareo ao amy ty hafa, sady ka tea fiainana tsy ie---safe malay ty raha rey Zaho! --- zay ty vola Yaveh.'' ¹⁸ Le niavy tamiko ty safa Yaveh tompoa ty lako, manao hozao: ¹⁹ ''Zao ty vola Yaveh tompoa ty lako: Ty fifalian-kany amy ty faha efatsy ty vola, faha limy ty vola, fahafito ty vola, le ty faha valo vola, le ty faha folo ty vola le hanjary fotoa ty fifalea, fanaova fety, sady fotoa soasoa hoahy ty tariha i Joda! Lafa zay le mila tea ty fahamarina noho ty fiadana! ²⁰ Zao ty vola Yaveh tompoa ty lako: Ho avy ndraiky ty olo, dra azy mipetraky amy ty kila tany samby hafa rey aza. ²¹ Hanedaha amy ty tana hafa ty mpipetraky ty tana raiky le manao hozao: ''Tokony handeha malaky aloha Yaveh eo tsika le hila an'Yaveh tompoa ty lako! Handeha avao koa tsika. ²² Olo lako noho ty firenena mahery lako ro ho avy hila an'Yaveh tompoa ty lako a Jerosalema sady hangataky ty fankasitraha Yaveh! ²³ Zao ty vola Yaveh tompoa ty lako: Amy fotoa zay le lahilahy folo baka amy ty fivolana noho firenena iaby ro hitanjaky ty moro ty sikinao sady hivola hozao : 'Engaho zahay hagnoriky anao, fa ni renay fa miaro anao Ndranahare!'''