¹ Le nitoliky zaho le nampiandra ty masoko le nahitaky kalesy efatsy niboay baka anelanela ty vohitsy roe; sady azy vohitsy roe rey le vita baka amy ty saba. ² Ty kalesy velohany le nana sovaly mena, ty kalesy faharoe nana sovaly mainty, ³ ty kalesy faha telo nana sovaly foty le ty kalesy faha efatsy le nana sovaly vanda misy foty. ⁴ Le namaly zaho le nivola tamy anjely niresaky tamiko iny manao hozao: ''Ino va rey io, lahy tompoko?'' ⁵ Namaly anjely iny le nivola hozao tamiko: ''Rey ty tsioky efatsy ty lanitsy ze niboaky baka an-toera ze nitsanganandrozy taloha ty Tompo ty kila tany iaby. ⁶ Azy raiky ze miaraky amy ty sovaly mainty iny le miboaky mandeha amy firenena avaratsy any; azy sovaly foty rey le miboaky mandeha amy firenena andrefa any; le azy sovaly vanda misy foty le miboaky mandeha amy ty firenena antimo any.'' ⁷ Azy sovaly matanjaky rey le niboaky sady mila handeha noho hikarikarioky amy ty tany eny, le hozao tiasa ty anjely iny: ''Mandina mikarikarioky amy ty tany eny!'' le nandeha heniky ty kila tany iaby ndrozy. ⁸ Le nitoreo tamiko ie le nivola tamiko hozao: ''Henteo ze miboaky ho amy firenena avaratsy rey; hampilamy ty fanahiko mikasiky ty firenena avaratsy ndrozy.'' ⁹ Le niavy tamiko ty safa Yaveh, manao hozao: ¹⁰ ''Mangala fanday amy ty tany an-tsesitany--- baka a Helay, Tobia, le Jedaia--- sady mandina amy andro zay avao le alao an-trano i Josia anaky Zefania ao, ze baka aBabylona anyzay. ¹¹ Le amangala volafoty noho ty volamena, manisia satrom-boninahitsy le apitiho amy loaha i Josoa anakilahy i Jozadaka eo, azy mpisorpnabe iny zay. ¹² Miresaha aminy sady volano hozao: 'Zao ty vola Yaveh tompoa ty lako: ''Azy lahilahy toy, ty anarany le i Rantsana! Hitombo amy ty misy azy eo ie sady hanampoatsy ty fiangona yaveh! ¹³ Ie ro hanamboatsy ty fiangona Yaveh sady hampitsanga anabo ty fipiriahan'izay; le hitoboky noho hanapaky amy ty sieza fiadanany eo ie. Ho mpisoro amy ty sieza fiadanany ie sady hisy tyfahazavan-tsay ty fiadanana amindrozy roe. ¹⁴ Henga amy ty fiangona Yaveh eo ty satrom-boninahitsy hanomeza voninahitsy an'i Helema, Tobia, noho Jedaia sady ho fahatiarova ty hasoa fanahy ty anakilahy i Zefania. ¹⁵ Le azy levitsy rey le ho avy noho hanamboatsy ty fiangona Yaveh, le ho hainao fa Yaveh tompoa ty lako ro nampaniraky ahy ho aminareo; fa hiseho za laha vatany mijanjy ty feo Yaveh Ndranaharinareo nareo!'''