¹ Hanompo an'Yaveh zaho amy ty fiaiko iaby, noho ze kila raha iaby anaiko ato, hanompo ty anarany masy zaho. ² Amy ty fiaiko iabby ro hanompoako an'Yaveh, sady hahatiaro ty asany soa iaby zaho. ³ Engany iaby ty fahadisoanao ; Mitsabo ty aretianao iaby Ie. ⁴ Manavotsy ty ainao amy ty faharava Ie; Mandoboky fanenkea mahatoky anao Ie sady vatany miferinay. ⁵ Manao ze mahafa-po ty fiainanao amy ty raha soa Ie mba ho vao manahaky ty voromahery ndraiky ty fahatanoranao. ⁶ Manao ty rariny Yaveh sady manao ty asa ty hato hoahy ty mijaly iaby. ⁷ Nampahaizany an'i Mmosesy ty lalany, sady amy ty tariha Israely asany rey. ⁸ Mandefitsy noho miferinay Yaveh; tsotra; sady lako fandefera. ⁹ Tsy hanasazy ziski amparany Ie; sady tsy hombia ho meloky. ¹⁰ Tsy manao antsika ze sahaza ty fahotantsika Ie ndra mamaly antsika araky ze takia ty otantsika. ¹¹ Manahaky ty hahabo ty lanitsy anabo ty tany, ro habe ty fandeferany amy azy manome voninahitsy Azy. ¹² Manahaky ty halavitsy ty antinana amy ty andrefa, le zay ty halavira ty hangalany ty hadisoa ty fahotantsika amitsika. ¹³ Manahaky ty baba miferinay ty anany, ro iferinesa Yaveh azy manome vonniahitsy Azy rey ¹⁴ Fa hainy ty nanamboarany antsika; hany fa posiera tsika. ¹⁵ Laha amy ty olo, le manahaky ty akata ty androny; mitiry manahaky ty folera ambaibo ie. ¹⁶ Tiofy ty tioky zay, le manjavo, sady tsy misy ndra ia ndra ia afaky mivola hozao nitiry taia zay taloha. ¹⁷ Fe ty fandefera Yaveh le baka amy maharitsy mandrakizay baka amy maharitsy mandrakizay ho amy ze manome voninahitsy Azy. Miitatsy amy ty tarihandrozy any ty hatony. ¹⁸ Midary ty fanenkeany noho mahatiaro ty fanoriha ty fampianarany rey ndrozy. ¹⁹ Fa nampipetraky ty sieza fiadanany an-danitsy any Yaveh, sady manjaka may olo iaby ty fanjakany. ²⁰ Manompoa an'Yaveh, nareo anjeliny, nareo maheriny ze matanjaky noho manao ty safany, sady manoriky ty feo ty safanay. ²¹ Manompoa an'Yaveh, ry miaramilany iaby, nareo mpanompony ze nanatenteraky ty sitrapony. ²² Manompoa an'Yaveh, ry raha iaby namboariny, amy ty toera iaby ze anjakany any. Hanompo an'Yaveh amy ty fiainako iaby zaho.