¹ Janjino ty fivavahako, lahy Yaveh; janjino ty toreoko Aminao. ² Ka avony amiko amy ty andro fijalia ty vatanao. Janjino zaho. Lafa mikaiky Anao zaho, le mba valio malaky lahy. ³ Mandrio manahaky ty setroky ty androko, sady mandoro manahaky ty afo ty taolako. ⁴ Potipotiky ty foko, sady manahaky ty akata malazo zaho. Haliniko ty homan-kany. ⁵ Noho ty alaheloko saky haly, le nanjary salapio mare zaho. ⁶ Manahaky ty samy anefitsy any zaho; niova manahaky ty vorondolo an-tana tsy misy mpipetraky. ⁷ Tsy azon-droro manahaky ty voro mandeha raiky zaho; raiky avao an-tapo ty trano. ⁸ Mivola raty ahy vahavaloko rey saky sanandro lava zao; azy manakiotsy ahy rey mampiasa ty anarako ho fanozona. ⁹ Manahaky ty mmofo ro fihinanako ty lavenoky sady aharoko amy ty raha inomako ty ranomasoko. ¹⁰ Noho ty halakoa ty helokinao, ro nanondrotanao ahy mba hampiravoky ahy. ¹¹ Manahaky ty aloky malazo ty androko; sady malazo manaky ty akata zaho. ¹² Fe Iha, lahy Yaveh, le velo mandrakizay, sady hoahy ty tariha iaby ty lazanao. ¹³ Hitsanga iha le ho ferinesanao i Ziona. Zao ro fotoa hiferinesanao azy; avy ty fotoa nitinginy. ¹⁴ Fa azy mpanomponao rey le mitanjaky vato teany rey sady malahelo ty fasiky ty faharariany. ¹⁵ Hanja ty anarano firenena rey, lahy Yaveh, sady hanondrotsy ty voninahitsinao ty mpanjaka ty tany iaby. ¹⁶ Hanamboatsy an'i Ziona ndraiky Yaveh le hiseho aminy ao ty voninahitsiny. ¹⁷ Amy zay fotoa zay, le hamaly ty fivavaha ty mijaly ie; tsy handa ty fivavahandrozy Ie. ¹⁸ Hosorata hoahy ty tariha ho avy zay, sady ty olo mbo tsy teraky le hanompo an'Yaveh. ¹⁹ Fa niondriky nanenty baka amy ty anbony masy Ie; baka andanitsy anyYaveh ro mijilo ty tany, ²⁰ mba hahare ty fisentoa ty gadra, hanabotorta azy nosazia ho maty rey. ²¹ Le hanambara ty anara Yaveh a Ziona noho a Jerosalema ty olo ²² lafa miaraky mivory mba hanompo an'i Yaveh olo rey noho ty fanjaka rey. ²³ Fa nala tamiko tanivo ty fiainako ty heriko. Nohaboria ty androko. ²⁴ Hozao tiasako: "Ndranahary lahy, ka ala anivo ty fiainako zaho; fa heniky ty tariha iabby eo Iha. ²⁵ Taloha Iha nanenga ty tany tamy ty polasiny; asa ty tananao ty lanitsy. ²⁶ Ho rava rey, fa Iha ro hipetraky; hanjary antitsy manahaky ty siky iaby rey; manahaky ty salotsy, ho alanao rey, le hanjavo. ²⁷ Fe Iha tsy hiova , sady tsy misy fahatamperany ty taonao. ²⁸ Ty anaky ty mpanomponao rey ho velo, sady ho velo aminy fanatrehanao eo ty tarihandrozy."