¹ Hanompo an'Yaveh amy ty fiaiko iaby zaho, lahy Yaveh NDranahariko o, le vatany soa mare Iha; misafotsy fipiriahy ty vonihahitsy Iha. ² Atsiky fahazava ho fisafora Iha; Avelatsinao manahky ty lamba ty lay ty lanitsy. ³ Nenganao tamy ty raho ty andry ty tranonao; nanovinao ho kalesinao ty raho; mandeha amy elatsy ty tsioky eo Iha. ⁴ Naharony ho raiky ty tsioky, ho mpanompo ty lela ty afo. ⁵ Nampipetraky ty fanambania ty tany Ie, le tsy ombia hiozohozo mihintsy zay ⁶ Manahaky ty salotsy ro nandongofanao ty tany tamy ty rano; nandifitsy ty vohitsy ty rano. ⁷ Ty fivolananao mare ro nampimpoly ty rano; tamy ty faneno ty fikotrokotriky ty feonao ro nampilay rey. ⁸ Nitsanga vohitsy rey sady baibo rey nibay tamy ty toera ze fa nivolaninao ho tiahindrozy. ⁹ Nanoritsy sisy ty tany hoahindrozy Iha mba tsy hihoarany ; le tsy handomboky ty tany sasy rey. ¹⁰ Nampikororoky ty loharano tamy ty baibo Ie; mikororoky anelanela ty vohitsy ty rian-drano. ¹¹ Manday rano hoahy ty biby iaby am-baibo rey; le tsy marandrano ty apondra ly. ¹² Mamboatsy ty tranonyanila ty rinirano voro rey. Mihira amy ty sam-pan-kazo ndrozy. ¹³ Manondraky ty vohitsy baka amy fasia ty ranony an-danitsy any Ie. Atsiky ty vokatsy ty asany ty tany. ¹⁴ Mampitiry akata hoahy ty biby fihary noho fambolea hoahy ty olo ho velo Ie mba hahaiza ty olo mamokatsy sakafo amy ty tany. ¹⁵ Manamboatsy divay ho hifalia ty olo Ie, soliky mba hampipiriaky ty vatany, sady hany mba hanohana ty ainy. ¹⁶ Azy hazo tiahy Yaveh rey le voatondraky ty ora lako; le azy sedera i Libanona ze namboleany. ¹⁷ Eo ro anamboara ty voro ty tranony. Ty voro maliniky manao ty hazo Kypreso ho fipetrahany. ¹⁸ Ty aosy ly mipetraky amy ty vohitsy anabo; sady ty hahabo ty vohitsy ro fialofa ty hyraka. ¹⁹ Natondro ty vola ho mariky ty fotoa Ie;hay ty mahasoandro ty fotoa hilentehany. ²⁰ Nanovinao ty maiiky ty haly lafa miboaky iaby ty biby an'ala any. ²¹ Mierotsy ho tiahy azony ty liona tanora rey sady mila ty haniny baka amy Ndranahary. ²² Lafa miboaky ty mahasoandro, le miala ndrozy le miroro amy ty lavakiny any. ²³ Zisiky amy fotoa zay, ty olo miboaky amy ty asany noho miasa zisiky ty hariva. ²⁴ Yaveh lahy, ee ty halakoa ty karaza ty asanao rey! Nanovinao tamy ty fahendrea ndrozy iabby; henity ty asanao ty tany. ²⁵ Ingo ty riaky, laliky sady bevata, mihetsiketsiky miaraky amy ty kila raha tsy hay hisafy, ndra maliniky ndra bevata. ²⁶ Mandeha eo sambo rey, sady mbo ao avao koa ty Leviatana, ze nanovianao hihisa amy ty riaky. ²⁷ Manenty Anao iaby ndrozy mba hanome ty haniny saky sanandro. ²⁸ Lafa manome rey Iha, le mivory ndrozy; lafa mamoha ty tananao Iha, le afa-po ndrozy. ²⁹ Lafa mamony ty vatanao Iha, le mavaka ndrozy; lafa alanao ty aindrozy; le maty rey le manjary posiera. ³⁰ Lafa mandefa ty fanahinao Iha, le misy rey, le manasoa ty tany ndraiky Iha. ³¹ Haharitsy mandrakizay lahy ty voninahitsy Yaveh, hahazo tombony ty hariny lahy Yaveh. ³² Miondriky manenty ty tany Ie, le mihozohozo zay; mikasiky ty vohitsy rey Ie; le setroky zay. ³³ Hihira hoahy ty Yaveh amy ty fiainako iaby zaho; hihira fanompoa hoahy ty Ndranahariko zaho lafa mbo velo avao. ³⁴ Ho mamy aminy lahy ty fisainako; hifaly amy Yaveh zaho. ³⁵ Hanjavo an-tany eto lahy ty mpanota rey, Hanompo an'Yaveh amy ty fiaiko iaby zaho. manompoa an'Yaveh.