¹ Anako e, laha nanoka ty jalanao ho antoky amy ty findrama ty namanao iha, laha nampanantena fampindrama-jala ho ahy ty olo tsy hainao iha, ² le fa nametsaky fandriky ho ahy ty vatanao tamy ty nampanantenanao iha, sady fa voasongitsy ty safa naboaky ty vavanao. ³ Laha voasongotsy ty safanao iha, anako e, le anovo zao ka le vonjeo ty vatananao, safe fa lavo tan-tana ty namanao ro iha; mandehana ka le manetre-vata sady mangataha anila ty namanao eo. ⁴ Ka enga hiroro ty masonao sady ka enga ho tandrena ty holitsy-masonao. ⁵ Vonjeo ty vatanao manahaky ty gazela an-tana ty mpihaza eny, manahaky ty voro an-tana ty mpamandriky-voro eo. ⁶ Henteo ty vitiky, olo-tsy tea, diniho ty fanoviny ka le henteo. ⁷ Tsy mana komandy, mpifehy, ndra mpanapaky ie, ⁸ nefa mamory ty haniny amy ty fahavaratsy sady anay ty fararano ro hanajariany ze hohaniny. ⁹ Zisiky-ombia ro hiroroanao, olo-tsy tea? Ombia ro hifohazanao amy ty roronao? " ¹⁰ Roro tsy ampy, fahatandrena ray ampy, famoretan-tana tsy ampy mba hiala vozaky"--- ¹¹ sady le ho avy manahaky ty mpangalatsy ty fijaleanao ka le ty filànao manahaky ty maramila milanja fialia. ¹² Ty olo-vao---ty olo raty fanahy --- le miay amy ty fanasazia ty safany, ¹³ mipi-maso, manome fahaiza amy ty tombony sady manondro amy ratsan-tanany rey. ¹⁴ Manao tetiky-raty noho fitaky am-pony ao ie; manetsiky fifamalia zisiky farany ie. ¹⁵ Laha zay le hahatsatsy azy tampoky ty lozany; anay ty fotoa tsy ampy ao le ho toro lavitsy ty fanafaha ie. ¹⁶ Misy raha eny hala Yaveh, fito ze mampangoritsy Azy. ¹⁷ Ty maso ty olo mpirengirengy, ty lela mpavandy, ty tana mpandatsaky-lio ty olo tsy manan-tsiny, ¹⁸ ty fo mamoro say-raty, ty tomboky ze malaky amy ty filaisa hanao raty, ¹⁹ ty vavolombelo ze mampiboaky vandy sady mandraraky fialia amy ty rahalahiny eo. ²⁰ Anako e, enkeo ty lily-babanao sady ka mahafoy ty fananaran-dreninao. ²¹ Fehezo am-ponao ao zisiky farany rey; fehezo am-bozonao eo rey. ²² Laha mandeha iha, le hitariky-lala anao rey; laha miroro iha, le hiemby anao rey; sady laha mifoha iha, le hampianatsy anao rey. ²³ Fa fanilo ty lily, sady fahazava ty fampianara; anatsy ze baka amy ty fampianara rey ro lala ty fiaina. ²⁴ Miaro anao amy ty ampela raty fandaisam-bata zay, amy ty safa malemy ty ampela raty fandaisam-bata. ²⁵ Engao ty fonao tsy haniry ty hasoany sady ka enga hotea anao amy ty volokikinao ie. ²⁶ Ty fiaraha-miroro amy ty mahery loha le sandrinao amy ty tapa-mofo, fa ty valy ty hafa le sandrinao amy ty ainao mihintsy. ²⁷ Misy olo afaky manday afo an-tsatsany eo va ka le tsy mandoro ty salony? ²⁸ Misy olo mahalia bongan'afo va ka le tsy hitsiboky ty tombony? ²⁹ Manahaky zay koa ty lahilahy miaraky-miroro amy valy ty namany; ze miaraky-miroro aminy le tsy ho afaky-amy zao avao. ³⁰ Tsy hikizaky ty mpangalatsy ty olo laha mangalatsy mba hahafa-po ty filàny lafa mosary ie. ³¹ Fa laha tsatsy koa ie, le hanonitsy im-pito heny ze nangalariny; tsy maintsy mamoy ty raha sarotsy iab an-tsanony ao ie. ³² Ze maheriloha le tsy misy say; ze manao zay le manimba ty vatany. ³³ Ratsy noho henatsy ro maeva azy sady tsy ho voafafa ty fanalam-barakany. ³⁴ Fa ty fahasarotam-piaro ro mampeloky ty lahilahy; tsy hampitoro famalozam-po ie lafa mamaly faty. ³⁵ Tsy hanenky onitsy ie sady tsy ho voatamby, ndra le amea fanomeza lako aza.