¹ Anako e, embeno ty fahendreako; ahohirano amy ty fahazavan-tsaiko ty sofinao, ² mba hianatsy mikasiky ty failo iha sady hiaro fahaiza ty soninao. ³ Fa ty sony ty ampela mpaheriloha mitete tantely sady ty vavany ro madoso noho ty solo-bonio, ⁴ nefa amy farany any le hangily, anahaky ty hazo mahafaty ie, manapaky manahaky ty meso-bey maranitsy. ⁵ Mijotsoa mana amy ty fahafatesa ty tombony any; sady ty liany mandeha ho amy ty Fiainan-tsy hita any. ⁶ Tsy mihevitsy tyvlala ty fiaina ie. Miriorio ty lia-tomboky; sady tsy hainy ze andehanany. ⁷ Amy zay, anako e, mijanjina Ahy; ka mivio amy ty fijanjina ty safa ty vavako. ⁸ Halaviro azy ty lalanao sady ka manariny ty varavara ty tsanony. ⁹ Amy zay le tsy hanome ty voninahitsinao amy ty hafa iha ndra ty tao iainanao ho ahy ty olon-dozabey; ¹⁰ tsy hifety amy ty hananao vahiny rey; sady ze fa niasanao lentsy ho avy an-tsano vahiny rey ao. ¹¹ Amy ty fara ty androm-piainanao le hiay iha lafa hihasoa ty nofotsinao noho ty vatanao. ¹² Hivola iha hozao: " Fe ty fahankahalako ty fampianara noho fananova ty foko tsy misy dikany ty fanitia! ¹³ Tsy nanenky mpampianatsiko rey zaho ndra nampihorira ty sofiko tamy mpananatsy ahy rey. ¹⁴ Fa rava tanteraky zaho tanivo ty egilizy eo, tamy ty fivoria ty olo eo." ¹⁵ Minoma rano baka amy ty famorian-dranonao ao sady minoma rano mirotsaky baka amy ty lava-dranonao ao. ¹⁶ Moa tokony hiboiboiky ndra aia ndra aia va ty loharanonao sady hirotsaky ankalamanjana eny ty loharanonao? ¹⁷ Engao ho ahy nao raiky avao rey fa tsy ho ahy vahiny miaraky aminao rey. ¹⁸ Ho voatahy lahy ty loharanonao sady engao hifaly amy ty valy ty fahatanoranao iha, ¹⁹ fa diera mahate-ho tea ie sady osidia soa. Engao hahafa-po anao amy ty fotoa iaby ty nonony; engao ho mamo ty fitiavany zisiky farany lahy iha. ²⁰ Fa nanao akory iha, anako, ro tokony gadra ty ampela mahery loha; nanao akory iha ro tokony hamihy ty tsatsa ampela raty fandaisam-bata rey? ²¹ Mahita ty raha anovy ty olo iaby Yaveh sady manenty ty lala andehanany iaby. ²² Ty olo raty fanahy le azo ty fanasazia avao; foly ty fahotany rey ro hamehy azy maré. ²³ Ho maty noho ty tsy fahampea ty fampianara ie; voatariky amy ty lala-diso any noho ty habey ty fahadalany ie.