¹ Anako e, embeno ty safako sady apitiho anainao ao rey. ² Embeno ty liliko mba ho velo iha sady embeno manahaky ty voamasonao ty fampianarako. ³ Fehezo amy rantsan-tananao eo rey; sorato amy ty vato pisaky eo ty fonao rey. ⁴ Volano ty fahendrea hozao: "Anabaviko iha," sady kaiho hoe longonao mariny ty fahazavan-tsay, ⁵ mba hiembenanao ty vatanao amy ty ampela maheriloha, amy ty ampela raty fandaisam-bata miaraky amy ty safany madoso. ⁶ Tamy ty lafonety ty tsanoko eo ro nihita tambaliky any baka amy ty makarakara eo zaho. ⁷ Nanenty olo kelikely say rey zaho, sady voamariky tamy tanora rey ty zatovo raiky tsy nisy say. ⁸ Niala tamy ty lala-vato mariny ty kihon-dalany eo tovolahy rey, sady nahity nana an-tsanony any. ⁹ Falifaly tamy zay, tamy ty andro hariva, noho tamy ty fotoa ty haly noho ty hariva. ¹⁰ Nisy ampela nitsena azy, nisalotsy manahaky ty mparotdy-vata, ze mailo am-po. ¹¹ Sady vavà ie ro maheriloha; tsy mahajano an-tsano ao ty tombokiny. ¹² Tsy ela tsy ela an-dala-vato eny, baka an-tsena eo, sady an-joron-tsano eny iaby eny ie ro mandiny mamitsaka. ¹³ ka le nisaviky azy ie ka le nanoroky azy, tamy ty tarehy nisolantsola ro nivolaniny taminy hozao: ¹⁴ "Nanao fanomezam-pilongoa zaho androany, nandoa voaliko rey zaho, ¹⁵ ka le niboaky hitsena anao zaho, mba hila maré ty tarehinao, sady le nahita anao zaho. ¹⁶ Fa namelatsy siky fisafora, rongony foty miloko baka Egypta any, tamy ty firoroako eo zaho. ¹⁷ Fa nandrarahako miora, havozo, sady kanely ty firoroako. ¹⁸ Avia, ndao tsika anatsiky fitea zisiky-maray; ndao tsika hangalaky fahafinareta amy ty fitiava. ¹⁹ Fa tsy an-tsanony ao ty valiko; nanjary nivahiny lavitsy ie. ²⁰ Nanday kitapom-jala niaraky taminy ie; himpoly ie amy ty fotoa ty fenomana." ²¹ Tamy ty resa-bey ro nitaomany azy; tamy ty fadoso ty soniny ro namitahany azy. ²² Nandeha nanoriky azy baka afara tampoky manahaky ty aomby andesy ho vonoe, manahaky ty diera voasambotsy anay fandriky ie, zisiky-hhampitsatoky ty anaky-kititsy amy ty atiny eo. ²³ Manahaky ty voro ze mitsoriaky ho amy ty fandriky eo. Tsy hainy fa hahafaty ty ainy zay. ²⁴ Ka le mijanjy ahy nareo, anakilahiko; embeno safa ty vavako rey. ²⁵ Engao tsy hivio amy ty lalany rey ahy ty fonareo; ka mivio amy lala-disony rey. ²⁶ Nahalavo olo voatsoboky lako ie; lako le lako niazo ty fahafatesa azony rey. ²⁷ Amy ty lala eny mana amy ty Fiainan-tsy hita any ty tsanony; mijotso mana amy ty efitsano firoroa maiky ty fahafatesa any ndrozy