¹ Soa vatany ty miay milamy miaraky amy ty tapa-mofo to zay amy ty tsano atsiky hany misy filira ao. ² Ty mpiasa hendry ro hanapaky amy ty anany ze nanao toetsy mahamenatsy eo sady hiharo lova manahaky ty raiky amy ty rahalahy. ³ Ty mamy ho ahy ty volafoty sady ty laforo fiketseha ho ahy ty volamena, fa Yaveh ro mamboatsy ty fo. ⁴ Ty mpanao raty mijanjy ty sony ty raty fanahy; manorira-sofy amy ty lela mpandravá ty mpavandy. ⁵ ndra ia ndra ia mikizaky ty malahelo le mivola raty ty Mpihary azy sady ze mifaly amy ty fahavoaza le tsy afaky-engà amy ty fanasazia. ⁶ Satso-boninahitsy ty antitsy ty zafy sady manday voninahitsy ho ahy anany rey ty ray-mandreny rey. ⁷ Ty kabary soa lahatsy le tsy mety amy ty dala; ka le vo maiky fa ty sony mpavandy ho mety ho ahy ty longo ty mpanjaka. ⁸ Manahaky ty vato mahatseriky ty kolikoly ho ahy ty olo ze manome zay; ndra ia ndra itolihany, le mety ie. ⁹ Ze manaro heloky ro mila fitiava, fa ze mampimpoly ty hadisoa taloha ro nampisaraky mpinama mariny rey. ¹⁰ Militsy laliky vatany amy ty olo ze mana fahazavan-tsay ty safa mahery ao noho ty kapoaky injato mana amy ty adala any. ¹¹ Ty olo-raty ro mila fiharoa foty, ka le halefa hanohitsy azy ty iraky lozabey. ¹² Aleo mifanojiky amy ty bera tsobo anaky to zay mifanojiky amy ty adala amy ty hadalany. ¹³ Laha misy olo mamaly raty ty soa, le tsy hiala ty tsanony zisiky farany ty raty. ¹⁴ Ty fanombohan'aly ro manahaky ze manenga ty rano hiparitaky eny iaby, ka le halaviro ty fifamalia i mbo tsy vaky zay. ¹⁵ Ty olo ze manamary ty olo-raty sady ty olo ze manasazy ty olo-marina--- le samby fahativativa amy Yaveh eo rey. ¹⁶ Nanao akory ty adala ro tokony handoa jala mba hianatsy mikasiky ty fahendrea, nefa ie tsy mana fahafaha ty hianatsy zay? ¹⁷ Ty nama le tea amy ty fotoa iaby sady rahalahiny nateraky ho amy ty fotoa ty fijalea. ¹⁸ Ty lahilahy tsy misy say manao fampanantena mamehy ka le nanjary tompon-antoky amy ty tsosa ty namany. ¹⁹ Ndra ia ndra ia tea aly le tea siaky; ze manao ty tokonam-baravarany ho abo maré le manatoro ty taola. ²⁰ Ty olo ze mana fo maheriloha ro tsy hahita ndra ino ndra ino soa; lavo amy ty loza ze mana lela mpamitaky. ²¹ Ndra ia ndra ia ray amandreny ty adala manday alahelo ho ahy ty vatany; sady tsy mana hafalea ty baba ty adala. ²² Fanafody soa ty fo falifaly, fa ty fanahy malemy koa mahamaiky ty taola. ²³ Ty lahilahy raty fanahy mankasitsaky kolikoly tsy hita mba hamaliha lala ty rariny rey. ²⁴ Ty olo ze mana fahazavan-tsay ro mampitoliky ty tarehiny mana amy ty fahendrea any, fa ty maso ty adala koa mitoliky amy vazan-tany rey any. ²⁵ Ty anaky adala ro alahelo ho ahy ty babany sady fangilia ho ahy ty ampela ze niteraky azy. ²⁶ Sady koa, tsy soa mihintsy ty manasazy ty olo-marina; ndra mamango olo maeva-hajà ze mana fahitia. ²⁷ Ze manam-pahaiza mampiasa safa boribory sady ze mana fahazavan-tsay ro mahatindry fo. ²⁸ Ndra le ty adala aza dinihiny ho hendry laha hohatsy ka tsy tsy mivola; lafa mampikombo-vava ie, le dinihiny ho manan-tsay.