¹ Ahy ty olo ty fikasa ty fo, fa baka amy Yaveh ty valin-tsafa baka amy ty lelany. ² Malio amasony eo avao ty lala ty olo iaby, fa Yaveh ro mandanja ty fanahy. ³ Ankino amy Yaveh ty asanao le ho mety ze anovinao. ⁴ Nanovy Yaveh ho amy ty antony iaby ty raha iaby, ndra raty fanahy aza le ho amy ty androm-pijalea. ⁵ Yaveh malay ty olo iaby ze manao fo miavonavo, azo antoky fa tsy ho afaky-amy zao avao reny. ⁶ Amy ty tsy fivaliham-panenkea noho fahendream-pitokisa ro hanavota amy ty heloky sady amy ty tahotsy an'Yaveh ro hiala ty olo amy ty raty. ⁷ Lafa ankasitraha Yaveh ty lala ty olo raiky, ndra fahavalo olo zay aza le anoviny milongo aminy. ⁸ Aleo kelikely amy ty fahamarina, to zay jala bey amy ty tsy rariny. ⁹ Am-pony ao ro amitiha ty olo ty lalany, fa Yaveh ro mpampitohy ty liany. ¹⁰ Fanapaha-kevitsy laliky ro amy ty soniny eo ty mpanjaka, ty vavany ro tsy mba hamaliky ty rariny. ¹¹ Baka amy Yaveh ty fandan-ja marina; ty lanja iaby amy ty kitapo ao ro asany iaby. ¹² Lafa manao raha-raty ty mpanjaka, le tokony ho raha hanovy tsy misy dikany zay, safe ty seza fipetraha le miory amy ty fanova ty marina. ¹³ Faly amy ty sony mivola ty marina ty mpanjaka sady teany ty olo ze mivola mahity. ¹⁴ Ty halaginy ty mpanjaka ro raiky ty fahafatesa fa ty olo-hendry koa ro hiezaky hampieny ty helokiny. ¹⁵ Amy ty heloky ty tarehy ty mpanjaka ao ro baibo amy ty raho ze manday oran-dohatao. ¹⁶ Henteo ty hasoa ty fahazoa fahendrea mandilatsy lavitsy noho ty volamena. Aleo mitingy ty hahazo fahazavan-tsay to zay volafoty. ¹⁷ Ty lalam-bey ty olo-marina le miala amy ty raty; ze miaro ty ainy ro miemby ty lalany. ¹⁸ Baka aloha ty faharava ty firengirengy sady ty fanahy mirvotsevotsy aloha ty fahatontà. ¹⁹ Soa vatany ty mampijotso-vata amy olo mijaly rey eo to zay mizara ze nifehezy amy ty olo mpirengirengy. ²⁰ Ze iaby mahazo ze nampianary androzy le hahita soa, sady ze mitoky amy Yaveh rey le ho voatahy. ²¹ Ze hendry am-po ro kaihy hoe manan-tsay sady ty hamamy ty safa ro mampivoatsy ty fahaiza-mampianatsy. ²² Ty fahazavan-tsay ro loharanon'ay ho ahy ze mana zay, fa ty fampianara ty adala le ty hadalany. ²³ Ty fo ty olo-hendry manome say ty vavany sady manampy fandresean-dahatsy ty soniny. ²⁴ Papon-tantely ty safa soasoa--- mamy amy ty fanahy sady fanafaha ho ahy ty taola. ²⁵ Misy lala ze manahaky ty marina amy ty olo, fa ty fiafarany ro lala mana amy ty fahafatesa any. ²⁶ Ty homa ty mpiasa ro miasa ho azy; ty hamosary ro manoriky azy. ²⁷ Ty olo tsy misy dikany ro mihaly sompatsy sady ty safany ro manahaky ty afo mandoro. ²⁸ Ty olo raty fandaisam-bata manetsiky aly sady ty mpitsiko mampisaraky ty mpinama mariny. ²⁹ Ty olo maheriloha le mavandy amy ty namany sady mampivary azy amy ty lala ze tsy soa. ³⁰ Ze mipi-maso ro mitetiky raha raty; ze manenky-sony ro mampandalo ty raty. ³¹ Ty volo-foty ro satso-boninahitsy; azo amy ty fiaina ty lala-marina zay. ³² Soa ty tsy mora meloky noho ty mpialy sady ty olo manapaky ty fanahiny ro mahery noho ty olo ze mamehy tanà raiky. ³³ Ty filoka ro atoraky am-potsina eo, fa ty fanapahan-kevitsy ro baka amy Yaveh.