¹ Ze mitokam-bata ro mila ty faniriany manoka sady mifamaly amy ty fitsarà soa iaby ie. ² Ty adala ro tsy mahita fahafinareta amy ty fahazavan-tsay, fa amy ty fanambarà ze am-pony ao avao. ³ Lafa misy olo raty fanahy avy, le avy miaraky aminy ty fanambania--- miaraky amy ty henatsy noho fanalam-baraka. ⁴ Rano laliky ty safa aboaky ty vava ty olo; sady rano miboiboiky ty loharano ty fahendrea. ⁵ Tsy soa ty miangatsy amy ty olo raty fanahy, ndra mandà ty rariny amy ty olo-marina. ⁶ Ty sony ty adala ro manday aly ho azy sady ty vavany mila vango. ⁷ Ty vava ty adala ro faharavany sady mamandriky ty vatany amy ty soniny ie. ⁸ Ty safa ty mpitsiko ro manahaky ty sombin-kany matavy sady mijotso anay ty vata any rey. ⁹ Ze miraviravy amy ty asany avao koa ro rahalahy ty mamotiky bibiky. ¹⁰ Tilikambo mahery ty anara Yaveh; milay mbao ty marina ka le voaaro. ¹¹ Ty hanana ty mpanan-kanana ro tanà voaarony sady ty manahaky ty vala abo an'eritseritsy ao. ¹² Aloha ty faharavany ro mirengirengy ty fo ty olo, fa ty fampijotsoam-bata ro avy aloha ty voninahitsy. ¹³ Ze mamaly aloha ty fitojeha--- le adala noho henatsy ho azy zay. ¹⁴ Zaka ty fanahy ty olo ty faharary, fa ia ro hahazaka fanahy torotoro zay? ¹⁵ Ty fo ty manan-tsay ro mandranto fahaiza sady ty sofy ty hendry mila zay. ¹⁶ Ty fanomeza ty olo ro mety hamoha lala noho handay azy aloha ty olo-lako eo. ¹⁷ Ze velohany manday ty raharahany ro hoy marina zisiky-iavia ty mpifanina aminy ka le hanontany azy. ¹⁸ Ty filoka ro mandamy fifamalea noho mampisaraky mpifamaly mahery rey. ¹⁹ Ty rahalahy meloky ro sarotsy azo noho ty tanà mahery, sady ty fifamalea ro manahaky ty hily ty lapa. ²⁰ Baka amy ty vokatsy ty vavany ro maha atsiky ty sarotso ty olo raiky; amy ty vokatsy ty soniny ro maha-afapo azy. ²¹ Ty fahafatesa noho ay ro fehezy ty lela, sady ze tea ty lela rey ro hihina ty vokatsiny. ²² Ze lahilahy mahita valy ro mahita raha soa sady mahazo sitsaky amy Yaveh. ²³ Ty olo mijaly ro mangataky famalozam-po, fa ty olo manan-kanana koa mamaly an-tsiaky. ²⁴ Ze mivola mana nama lako ro ho ravan-drozy, fa misy nama ze mariny vatany noho ty rahalahy.