¹ Anako e, la manalino ty liliko sady tano am-ponao ao ty fampianarako, ² fa andro lava noho tao lako hiaina sady fiadana ro hanampea anao rey. ³ Ka enga hiala anao ty tsy fivaliham-panenkea noho ty fahendream-pitokisa, hampifehezy amy ty vozonao eo rey, sady apitiho amy ty vato pisaky ao ty fonao. ⁴ Le hahita fitea noho soa laza amaso Njanahary eo noho ty olo iha. ⁵ Matokisa an'Yaveh amy ty fonao iaby sady ze mianky amy ty fahaizanao avao; ⁶ manenkea Azy amy ty lalanao iaby sady Ie ro hampahity ty lalanao. ⁷ Ka hendry amaso eo avao; matahora an'Yaveh ka le ialao ty raty. ⁸ Ho fanafaha ho ahy ty nofotsinao sady famelombelo ho ahy ty vatanao zay. ⁹ Manajà an'Yaveh amy ty hanananao noho ty veloham-bokatsy ty vokatsinao iaby, ¹⁰ le ho atsiky ty tsano fanajariam-bokatsy sady ho vintsy hijiajia ty fipetsaham-mbolobokinao, atsiky divay vaovao. ¹¹ Anako e, la manaraty ty fampianara Yaveh sady ka malay ty fanelofany, ¹² fa ze teany ro sazý Yaveh rey, manahaky ty anovy ty raiky amy ty anaky ze ankasitsahiny. ¹³ Sambatsy ze mahita fahendrea; fa mahazo fahazavan-tsay avao koa ie. ¹⁴ Soa noho ze amea ty volafoty ty azonao baka amy ty fahendrea sady ty tombony ro soa mandilatsy ty volamena. ¹⁵ Sarotsy noho ty ravaky ty fahendrea sady tsy misy azonao ampitovizy aminy ze mety ho irinao. ¹⁶ Andro lava ro an-tanany ankavana eo; sady hanana noho voninahitsy ro an-tanany ankavia eo. ¹⁷ Lala ty fahalemem-panahy ty lalany sady fiadana iaby ty lalany iaby. ¹⁸ Ie ro hazon'ay ho ahy ze mitandraky rey zay, sambatsy ze mipitiky amy zay rey. ¹⁹ Tamy ty fahendrea ro namboara Yaveh ty tany, tamy ty fahazavan-tsay ro nampipetsahany ty lanitsy. ²⁰ Tamy ty fahaizany ro nitiria ty laliky sady nampilatsaky ty andony ty raho. ²¹ Anako e, tandrano ty fitsara noho fahaiza-manavaky marina, sady ka alà amy ty masonao zay. ²² Ho ay ho ahy ty fanahinao raiky sady ravaky ty fankasitraha hananova miodidy ty vozonao. ²³ Le handeha amy ty lalanao am-pilamina iha sady tsy ho heloky ty tombonao; Lara miroro iha, le tsy hatahotsy; ²⁴ lafa miroro iha, le ho mamy ty nofinao. ²⁵ Ka matahotsy ty horohoro avy tampoky ndra ty fandrava anovy ty raty fanahy, lafa avy zay, ²⁶ fa Yaveh ro ho anilanao eo sady hiaro ty tombonao tsy ho voa ty fandriky. ²⁷ Ka mihina ty soa amy ze maeva rey zay, laha amy ty herinao ao avao ty hiasa. ²⁸ Ka mivola amy ty namanao hozao: "Mandehana, ka le miavia ndraiky, sady hamaray ro hanomezako zay," laha hanananao aminao any avao jala iny. ²⁹ Ka manao tetiky hanisy raty ty namanao eo---le azy mipetsaky anilanao eo iny sady matoky anao. ³⁰ Ka mifamaly amy ty o,o amy ty tsy misy dikany, laha tsy nanisy raty anao ie. ³¹ Ka mialona ty olo maheriloha ndra mitingy ze lalany. ³² Fa mampangoritsy amy Yaveh ty olo mandratiraty, fa hampitokisany aminy koa ty olo mahity fo. ³³ Amy ty tsano ty raty fanahy eo ty fanomeza Yaveh, fa mitahy ty fipetsaha ty olo-marina koa Ie. ³⁴ Mandatsa ty mpandrebireby Ie, fa manome sitsaky ho ahy ty olo mampijotso vata. ³⁵ Ty olo-hendry mandova voninahitsy fa ty adala koa le hisondrotsy amy ty hamenarany.