¹ Mijanjina, ty fampianara najanahary, anako e, sady miembena mba hahaizanareo ty anovy hozao fahazavan-tsay. ² Manome fampianara soa anao zaho; ka mahafoy ty fampianarako. ³ Tamy ty mbo naha-anaky ty babako ahy, mora fanahy sady anaky toka ty reniko iny, ⁴ le nampianatsy ahy ie sady nivola tamiko hozao: "Engao ty fonao hitandraky maré safako rey; tandraho liliko rey le ho velo nareo ⁵ Mahazoa fahendrea noho fahazavan-tsay; ka manalino sady ka mandà safa ty vavako rey; ⁶ ka afoy ty fahendrea sady hiemby anareo ie; tiavo ie le hiaro anareo. ⁷ Ty fahendrea ro raha-bevata bibiky, ka le mahazoa fahendrea sady lanio ze anananareo iaby mba hahazoanareo fahazavan-tsay. ⁸ Engao ho lalanao ty fahendrea ro hanondrotsy anareo ie; hanaja anareo ie laha mihina azy nareo. ⁹ Hametsaky fonondoham-panaja anabo ty lohanareo eo ie; sady hanome anareo satso-boninahitsy soa tarehy." ¹⁰ Mijanjina, anako e, sady embeno ty safako, le hana tao lako hiaina iha. ¹¹ Hanoro lala anao amy ty lalam-pahendrea zaho; sady hitariky anao ho amy lala mahity rey zaho. ¹² Lafa mandeha iha, le tsy hisy olo hitsanga amy ty lalanao sady laha milay iha, le tsy ho heloky. ¹³ Tandraho torolala rey, la enga handeha; tandraho, fa fiainanao zay. ¹⁴ Ka manoriky ty lala ty raty fanahy sady ka mandeha manoriky ty lala ze manao raty rey. ¹⁵ Ampilaiso zay, sady ka mandeha amy zay; mialà amy zay sady mandehana amy ty lala-hafa. ¹⁶ Fa tsy afaky-miroro ndrozy zisiky-hananovany raty sady tsobo roro ndrozy zisiky-mampeloky azy olo. ¹⁷ Fa ndrozy ro mihina ty mofo ty haratia sady mino ty divay ty heriloha. ¹⁸ Fa ty lala ty olo-marina ro manahaky ty hazava velohany ze mihamazava; mamirapiratsy zay zisiky-hiavia ty andro mazava. ¹⁹ Ty lala ty raty fanahy ro manahaky ty haiky--- tsy hain-drozy ze mampeloky androzy. ²⁰ Anako e, embeno ty safako; ahohirano amy ty safako ty sofinao. ²¹ Ka enga hiala amy ty masonao rey; tandrano am-ponao ao zay. ²² Fa ty safako ro ay ho ahy ze mahita azy rey sady fahasalama ho ahy ty vatan-drozy raiky iaby. ²³ Arovo ty fonao sady embeno amy ty fiembena iaby zay, fa baka amy zay ro hirotsaky ty loharanon'ay. ²⁴ Alao aminao eo ty safa miviombio sady ty safa manimba lavitsy anao. ²⁵ Engao ty masonao hanenty mahity noho dary mihintsy ty alohanao eo ²⁶ Manamboara lala mahity ho ahy ty tombokinao; le hilamy ty lalanao iaby. ²⁷ Ka mivio ho amy ty ankavia ndra ankavana; halaviro amy ty raty ty tombonao.