¹ Anako e, laha mandramby ty safako iha sady apitikinao aminao ao liliko rey, ² le engao ty sofinao hiemby soa ty fahendrea sady ahohirano ho amy ty fahazavan-tsay ty fonao. ³ Laha mihiakiaky ho amy ty fahazavan-tsay iha sady mampiakatsy-feo ho amy zay, ⁴ laha mila azy manahaky ty hilanao volafoty iha sady mila ty fahazavan-tsay manahaky ty filà hanana mivony, ⁵ le ho hainao ty tahotsy an'Yaveh sady ho hitanao ty fahaiza an-Janahary. ⁶ Fa manome fahendrea Yaveh, baka amy ty vavany ro hiavia ty fahaiza noho fahazavan-tsay. ⁷ Manajary ty fahendrea soa ho ahy ze ankasitsahiny rey Ie, ie ro fiaro ze mandeha amy ty fahitia rey, ⁸ miemby lala ty rariny rey Ie sady hiaro ty lala ze matoky Azy. ⁹ Le ho tsapanao ty fahamarina, ty rariny, noho ty hitiny, sady ty lala soa iaby. ¹⁰ Fa hilitsy am-ponao ao ty fahendrea, sady ho soasoa ty fanahinao ty fahaiza. ¹¹ Hiaro anao ty failo, sady hiemby anao ty fahazavan-tsay. ¹² Hanavotsy anao amy ty lala-raty ie, amy ze mivola raha-raty rey, ¹³ ze miala lala ty fahamarina rey sady mandeha amy ty lala ty lala-raty. ¹⁴ Mifaly ndrozy lafa manao raty sady soa amy ty fahativativa ty raty. ¹⁵ Manoriky lala-meloky ndrozy, sady nampiasa ty fitaky hamonia ty lalany. ¹⁶ Fahendrea sady failo ro hanavotsy anao amy ty ampela mahery loha, amy ty ampela raty fandaisam-bata noho ty safany malemy. ¹⁷ Mahafoy ty nama ty tanora azy ie sady manalino ty fanenkeany tamy ty Njanahariny. ¹⁸ Fa ty tsanony mitariky amy ty fahafatesa sady lalany rey handay anao ho amy ze an-dolo rey any. ¹⁹ Ze iaby militsy aminy ao ro tsy himpoly sasy sady tsy hahita ty lala ty fiaina ndrozy. ²⁰ Ke handeha amy ty lala ty olo soa iha sady hanoriky lala ty olo-marina rey. ²¹ Fa manao ty marina rey ro hanao fipetsaha amy ty tany eo, sady tsy mivaliky rey ro hipetsaky amy zay ao. ²² Fa ty raty fanahy hombota amy ty tany eo, sady ty tsy manam-pinoa hombota amy zay eo.