¹ Ohabola i Solomona ana i Davida rey, mpanjakan'Israely. ² Ohabola reto ro nanovy mba hampianatsy fahendrea noho ty torolala, hampianatsy safa ty fahaiza rey, ³ hahazoanao torolala mba hiaina may ty fananova ty marina, rariny, sady ty hitiny. ⁴ Ohabola reto avao koa ro nanovy hanome fahendrea ho ahy ty tsy ampy say, sady hanome fahaiza noho fahailo ho ahy ty tanora. ⁵ Engao ty olo hendry hijanjy ka le hampitombo ty fahaizany, sady engao ty olo mahay manavaky hahazo tari-dala, ⁶ mba hahatakatsy ohabola rey, ohan-tsafa rey, noho ty safa ty olo-hendry mbamy ty ankamatatsiny. ⁷ Ty tahotsy an'Yaveh ro fiboaham-pahaiza--- ty adala mikizaky ty fahendrea noho ty fampianara. ⁸ Anako e, janjino ty fampianara-babanao sady ka miala amy ty fitsipiky ty reninao; ⁹ ho fonon-doha soa tarehy ho ahy ty loharano rey sady rado mihanto amy ty vozonao eo. ¹⁰ Anako e, laha mila hanombotsy anao ho amy ty fahotan-drozy ty mpanota, le ka manenky hanoriky azy. ¹¹ Laha hoasan-drozy hozao: "Avia hiaraky aminay, ndao tsika hivony ka le hamango olo tsy manan-tsiny amy ty tsy misy dikany. ¹² Ndao hatelintsika velo rey, manahaky ty fangalà ty Fiainan-tsy Hita ze salama rey, sady hanao androzy hanahaky ze milatsaky an-davaky. ¹³ Ho hitantsika karaza-draha sarotsy iaby rey; ho fenoantsika amy ze hangalarantsika any ty hafa ty tsanontsika. ¹⁴ Atoraho miaraky aminay ty filokanareo; hana poketsa raiky avao isaky iaby." ¹⁵ Anako e, la mandeha mijotso amy lala zay miaraky amin-drozy; la enga hikasiky ze handehanany ty tombokinao; ¹⁶ milay ho amy ty raty ty tombokiny sady vo maiky handatsaky-lio ndrozy. ¹⁷ Fa tsy misy dikany ty hamelara harato hamandriha voro laha mitsindro voro iny. ¹⁸ Mihotsoky hamono ty vatany avao olo rey--- manao vela-pandriky ho ahy ty vatany ndrozy. ¹⁹ Manahaky zay koa ty lala ty olo iaby ze mahazo hanana amy ty tsy rariny; ty hanana azo amy ty tsy rariny maharary ty ay ze mipitiky amy zay rey. ²⁰ Mivazavaza an-dala eny ty fahendrea, mampiakatsy ty feony ankalamanjana eny ie; ²¹ amy loha-lala mikoraky eny rey ro hikorakoraky, amy ty filira amy ty vavahady ty tanà eny ro hivolanany hozao: " ²² Ho zisiky-ombia, nareo olo tsy ampy say, ro hotea ty habadoa? Ho zisiky-ombia, nareo mpandrebireby, ro hotea ty fandrebirebea, sady ho zisiky-ombia, nareo adala e, ro halay ty fahaiza? ²³ Embeno soa ty fananarako; harorako aminareo ty fihevitsiko; hanoviko hainareo ty safako. ²⁴ Fa nikaiky zaho, sady nandà ty hijanjy nareo; nanampatsy ty tanako zaho, fe tsy nisy nidary. ²⁵ Fa natanaoreo sary tsy hay ty fampianarako iaby sady tsy nijanjininareo ty fananarako. ²⁶ Hihehy ty lozanareo zaho, handatsa anareo zaho lafa niavy ty horohoro --- ²⁷ lafa niavy manahaky ty tafiotsy ty fandrava mampatahotsy sady mifaoky anareo manahaky ty talio ty loza, lafa niavy aminareo ty fijalea noho ty fangirifiry. ²⁸ Le nikaiky ahy ndrozy, fa tsy hamaly zaho; hikaiky ahy maré ndrozy, fa tsy hahita ahy. ²⁹ Safe malay fahaiza ndrozy sady tsy nitingy ty tahotsy an'Yaveh, ³⁰ tsy nanoriky ty fampianarako ndrozy, sady nikizaky ty fananarako iaby. ³¹ Hihina ty vokatsy ty lalany ndrozy, sady ty vokatsy ty tetiky-ratin-drozy ro hanatsiky azy. ³² Fa voavono ty tsy ampy say lafa mivio, sady hampipotiky azy ty tsy fidarea ty adala. ³³ Fa ndra ia ndra ia mijanjy ahy le hiay am-pilamina sady ho voaaro tsy hatahotsy loza."