¹ Le nanohy ty liany ndraiky Jakoba le nivy tamy tamy ty tany ty mpipetraky tan-tinana. ² Lafa nagnety ie le nahita fantsaka tamy baibo teo, sady, ingo, nisy hamaroa ty aondry voho ty aosy telo niroro tanila zay teo. Fa tambaliky fantsaka zay teo ro nampinomindrozy ty aondry voho ty aosiny, sady bevata ty vato tamy ty vavahady ty fantsaka. ³ Ka lafa tafavory eo ty aondry noho ty aosy iaby rey, le nampigoroso mpiaraky aondry ty vato amy ty vava ty fantsaka eo le nampinominy ty aondry, sady bakeo nolongofa ty vava ty fantsaka eo ndraiky ty vato, ho amy ty fitoerany eo. ⁴ Hoy tiasa i Jakoba tamindrozy hoe: "Ry Rahalahiko, baka aia moa nareo?" namaly hozao ndrozy: ''Avy baka Harana zahay." ⁵ Hoy tiasany tamindrozy: "Hainareo va i Labana anaky Nahora?" Hoasan-drozy:"Hainay ie." ⁶ Hoy tiasany tamindrozy: "Salama va ie?" Hoasandrozy hoe: "Salama ie, sady, ingo, Rahely anakampelany miaraky amy ty aondiny." ⁷ Hoasa i Jakkoba hoe: "Ingo, fa misasaky ty andro. mbo tsy fotoa famoria ty aondry noho ty aosy zao. Tokony hanome rano ty aondry nareo le ndao sady hanenga rey handromotsy akata eny." ⁸ Hoasandrozy: "Tsy afaky manome rano rey zahay laha tsy fa vory iaby aondry noho aosy iaby rey. Bakeo ty lahilahy rey hampigoroso azy vato amy ty vava ty fantsaka eo, le hampinominay rano ty aondry." ⁹ Laha mbo niresaky tamin-drozy Jakoba, le ingo Rahely niavy niaraky tamy ty aondry ty babany, safe niamby rey ie. ¹⁰ Lafa hitan'i Jakoba i Rahely, anakampela i Labana, anadahy ty reniny, le nagnato i Jakoba, nampigoroso ty vato tamy ty vavaty fantsaka zay teo, le nampinondrano ty aondry amy ty aosy tiahy Labana, anadahy ty reniny. ¹¹ Nanoroky an'i Rahely i Jakoba sady nitany mare. ¹² Nivolanin'i Jakoba tamy Rahely fa longo ty babany ie, sady ie ro anakilahy Rebeka. Le nilomay i Rahely le nivola tamy babany. ¹³ Lafa ren'i Jakoba ty vaovao momba an'i Jakoba anaky ty anabaviny, le nilomay hitsena azy ie, le nandrakotsy azy, sady nanday azy tan-tranony tany. Nambara i Jakoba tamy Labana zay raha iaby zay. ¹⁴ Le hoasa i Labana taminy: "Taolako noho nofitsiko vatany iha."Le nijano tokony vola raiky taminy teo i Jakoba. ¹⁵ Hoy tiasa i Labana tamy Jakoba: "Tokony hanompo ahy maimaim-poa va iha safe longoko? Volano amiko, ohantrino ty karamanao?" ¹⁶ Sady nana anakampela roe i Labana. Lea ty anara ty zokiny, Rahely koa ty anara y zainy. ¹⁷ Lea le malemy fagnety, fa Rahely koa le soa vata ro sady ampelasoa. ¹⁸ Jakoba le tea an'i Rahely, le hoy tiasany: "Hanompo anao fito tao zaho hahazoako an'i Rahely, anakinao faravavy." ¹⁹ Hoasa i Labana hoe: ''Soasoa avao laha ameakoanao ie, tany hameako lahilahy hafa. Mienena miaraky amiko." ²⁰ Le nanompo fito tao i Jakoba mba hahazoany an'i Rahely; sady manahaky ty andro tsy ampy ho tiazy avao zay, noho ty fiiteavany azy. ²¹ Le hoasa i Jakoba tamy Labana: "Ameo ahy ty valiko, fa efa feno ty fe-potoa--- maba hanambaliako azy!" ²² Le navory Labana ty olo iaby tan-toera tao le nifety. ²³ Lafa haly le nala i Labana i Lea anakampelany le nameany an'i Jakoba, ze niaraky niroro taminy. ²⁴ Nanome an'i Zilpa mpiasa ampelany ahy Lea anakampelany, mba ho mpiasany Labana. ²⁵ Lafa maray le ingo fa i Lea ro teo! Hoasa i Jakoba tamy Labana hoe: "Ino ty raha nanovinao tamiko zao? Tsy nanompo anao va zaho mba ahazoako an'i Rahely? Nanino ro namerivery ahy iaha?" ²⁶ hoasa i Labana: "Tsy fombanay ty hanome ty zainy ampela aloha ty zokiny. ²⁷ Tanteraho ty volan-tantely ty anakampela toy, le hameanay anao avao oa ty raiky mba hanompoanao ahy fito tao ndraiky." ²⁸ Le nanovin'i Jakoba zay, ka le nitanterahany ty herinandroan'i Lea. le namean'i Labana azy avao koa i Rahely anakampelany mba ho valiny. ²⁹ Le natolitsy Labana an'i Rahely anakampelany koa i Bila, mba ho mpiasany. ³⁰ Le nandry niaraky tamy Rahely koa i Jakoba, fa teany mandilatsy noho i Lea i Rahely. Le nanompo an'i Labana fito tao ndraiky i Jakoba. ³¹ Hitan'Yaveh fa tsy nidaria i Lea, le nampana anaky azy Ie, fe Rahely koa le momba. ³² Le nitrony i Lea sady niteraky aja lahilahy ie, le nanoviny hoe Robena ty anarany. Fa hoy tiasany: "Safe fa nijilo ty fijaliako Yaveh; le ho tea ty valiko vatany zaho henany zao." ³³ Le nitrony ndraiky ie le niteraky aja lahilahy. Hoy tiasany: "Safe fa re Yaveh fa tsy mba nidariany zaho, le zay ty nanomezany ahy aja toy avao koa," le ty anarany nanoviny hoe i Simeona. ³⁴ Le nitrony ndraiky ie le niteraky anakilahy. hoy tiasany: "Henany zao le hipitiky amiko ty valiko, safe fa niteraky anakilahy telo ho tiazy zaho." Zay ty nananovany ty anarany hoe i Levy. ³⁵ Le nitrony ndraiky ie le niteraky anakilahy . Hoy tiasany: "Henany zay le hanompo an'Yaveh zaho." Zay ty nananovany ty anarany hoe i Joda; le tsy niteraky sasy ie.