¹ Le nikaiky an'i Jakoba Isaka nitsipy rano azy, sady nandily azy hozao: "Tsy mahazo mangalaky valy amy ty ampela Kananita rey iha. ² Miongaha, le mandina a Padana-Arama any, ho amy tariha i Betoela baba ty reninao, le mangala valy any, raiky amy ty anak'ampela i Labana , anadahin-dreninao. ³ Njanahary tsy toha lahy hitahy anao, hampamokatsy anao sady hahalako anao, mba hahavy anao ho firenena lako. ⁴ Hameany anao lahy ty tsipirano ahy Abrahama, ho ahinao, noho ho tiahy ty tarihanao misolo anao, mba handovao ty tany ze fa nipetrahanao, ze namean-Janahary an'i Abrahama." ⁵ Sady Isaka nampandeha an'i Jakoba. Mba Padana-Arama any i Jakoba, ho amy Labana anaky Betoela Syriana any, anadahy Rebeka, renin'i Jakoba noho Esao. ⁶ Sady nitany Esao fa nitsipaza Isaka rano Jakoba sady nampoliany ta Padana-Arama any, mba hangalaky valy any. Nahita avao koa ie fa nitsipy rano noho nanome lily azy Isaka, nanao hozao: "Tsy mahazo mangalaky valy amy ty ampela baka Kanana any rey iha." ⁷ Hitany Esao avao koa fa nanoriky ty babany noho ty reniny i Jakoba, sady nandeha ta Padana-Arama tany. ⁸ Sady hitany Esao fa tsy nankasitaky ty ampela baka a Kanana any rey Isaka babany. ⁹ Le ankoatsy ty valy ze fa nananany rey, le nandeha amy Isamaela any ie, le nangalaky an'i Mahalota,anakampela an'Isamaela, anaky Abrahama,anabavin'i Nebaiota mba ho valiny. ¹⁰ Niala ta Beri-sheba i Jakoba le nandeha ta Harana. ¹¹ Sady niavy tamy toera raiky ie le nijano teo zisiky ty haly totolo, safe fa nilentiky ty masoandro. Nangalaky vato raiky tamy rey tamy toera zay teo ie, nametraky zay tambany ty lohany, le nitsilany tamy toera zay teo mba hiroro. ¹² Nanonofy ie le nahita esikalie nipitiky tamy ty tany. Nahazo ty lanitsy ty tendrony sady niakatsy noho nijotso tamizay ty anjelin-dranahary. ¹³ Ingo, Yaveh nitsanga tanabon'izay sady nivola hozao: "Zaho ro Yaveh, Ndranahary an'i Abrahama babanao, noho Ndranahary an'Isaka. Ty tany ze hiroroanao io, le ameako anao noho ty tarihanao. ¹⁴ Hanahaky ty posiera amy ty tany ty tarihanao, sady hiparitaky lavitsy baka andrefa ,le zisiky antinana,baka avaratsy, sady zisiky antimo iha. Amy ty alalanao noho amy ty alala ty tarihanao rey ro hitahia ty longo an-tany atoy iaby. ¹⁵ Ingo, hiaro anao Zaho, sady hiaro anao ndra aia ndra aia ty handinanao. Handay anao amy ty tany toy ndraiky Zaho; fa tsy hanenga anao Zaho. Hanoviko iaby ze raha iaby nampitamaniko anao." ¹⁶ Nifoha tamy torimaso i Jakoba,le hoy tiasany: "Azo antoky vatany fa amy ty toera toy Yaveh, fe zaho ro tsy nahay." ¹⁷ Navaka ie le nivola hozao: "Le vatany mampatahotsy toera toy! Tsy raha ino fa tranon-Dranahary toy. Toy ty vavahady ty lanitsy." ¹⁸ Nifoha maray i jakoba le nangalaky azy vato ze nengany tambany ty lohany. Nanoviny ho tsangam-bato zay sady nagnilinany menaky tanabo zay. ¹⁹ Sady le hikaiha hoe Betela ty anara ty toera zay, fa Lozy ro anara iazy tana iny tam-belohany. ²⁰ Sady nanao voady i Jakoba, le nivola hozao: "Laha hitahy noho hiaro ahy amy ty lala ze andinako tiy Ndranahary, le hanome ahy mofo ho hany, noho ty siky hisikina, ²¹ mba ahaizako mimpoly soa aman-tsara an-trano ty babako, le Yaveh ro ho Ndranahariko. ²² Sady hanjary vato masy ty vato ze namboariko ho tsangam-bato toy. Amy ze kila raha iaby ze hameanao ahy, le ho ampoliko aminao vatany ty ampahafolony."