¹ Lafa antitsy Isaka le nanjavo ty masony rey le tsy nahita ie, sady nampikaiky an'i Esao, anakilahiny talan'olo ie, le nivola hozao taminy: "Nao lahy anako." Le hoy tiasany taminy: "Toy zaho." ² Le hoy tiasany: "Janjino soa, fa efa antitsy zaho. Tsy haiko ty andro hahafaty ahy. ³ Lafa zay le rambeso ty fitaovam-pialianao, ty Fitifitsinao sady ty kititsinao, le mandina ambaibo any sady mihaza biby ly ho tiahy. ⁴ Iketreho hany matavy, amy azy teako zaho, sady andeso amiko atoy zay, sady andeso amiko zay ahaizako mihina zay noho hanomezako tsipirano anao aloha ty hahafaty ahy." ⁵ Le nire i Rebeka zay lafa iresaky tamy Esao anakilahiny Isaka. Nandeha ambaibo i Esao mba hihaza biby ly sady nanday zay holy. ⁶ Niresaky tamy Jakoba anakiny Rebeka sady nivola hozao: "Janjino soa, nireko i babanareo niresaky tamy Esao rahalahinao. Hozao tiasany: ⁷ 'Anandeso haza zaho sady amboaro hany matavy, mba ahaizako mihina zay noho hanomezako tsipy rano anao miatriky an'Yaveh aloha ty hahafaty ahy.' ⁸ Sady lafa zay,lahy anaky, le oriho ty safako araky ze nandiliako anao. ⁹ Mandina mandeha amy ty aondry noho ty aosy, le angalao an'akaosy roe soa zaho; le hanao hany matavy amirey ho tiahy babanao zaho, manahaky ty teany. ¹⁰ Sady handesinao o amy babanao any zay, mba ahaizany mihina zay, le hanome tsipy rano anao aloha ty hahafaty azy." ¹¹ Nivola tamy Rebeka reniny i Jakoba hoe: "Henteo, Esao rahalahiko le lahilahy voloa, fe zaho koa le lahilahy madoso holitsy. Mety hikasiky ahy ty babako, le ho hainy fa hamitaky azy zaho. ¹² Handay hakeo amy ty vatako zaho fa tsy tsipirano." ¹³ Hozao tiasa ty reniny taminy: "Anaky, Engaho ty babanao hanozo ahy. Oriho avao ty safako, le mndina, andeso amiko atoy rey." ¹⁴ Le nandeha nangalaky ty anak'aosy Jakoba sady nanday zay tamy reniny tany, le nanao hany matavy ty reniny, araky ty nitiava ty babany azy. ¹⁵ Nalain'i Rebeka ty siky soa biby an'i Esao, anakiny talan'olo, ze niaraky taminy tan-trano ao,le nampisikininy an'i Jakoba, azy anakilahiny farany. ¹⁶ Nengany tamy tanany teny noho ty faritsy madoso amy ty vozony ty angozo ty anak'aosy rey. ¹⁷ Nengany tan-tana i Jakaoba anany ty hany matavy noho ty mofo ze fa nikarakarany. ¹⁸ Nandeha amy babany any Jakoba le nanao hozao: "babako o!" hoy tiasany: "Toy zaho; ia moa iha, anaky?" ¹⁹ Hoasa i Jakoba tamy babany hoe: "Esao azy talan'olonao lahilahy; fa vitako ze nampanovianao ahy nanoviko . Mitoboha sady homana ty hazako, mba hitsipazanao rano ahy." ²⁰ Hoasa Isaka tamy ty anakilahiny hoe: "Nanao akory ty nahitanao zay tanay ty fotoa fohy anaky?" Hozao tiasany: "Safe Yaveh Njanaharinao ro nanday zay tamiko." ²¹ Le hoy tiasa Isaka tamy Jakoba: "Avia anilako etoa,mba hahaizako mikasiky anao, lahy anako, le hahaizako laha Esao anako vatany iha na tsy ie." ²² Nagnato an'Isaka babany Jakoba; le nitspa azy Isaka le nanao hozao: "ty feony le feo i Jakoba, fa ty tana rey koa le ahy Esao." ²³ Tsy nahay azy Isaka, safe voloa ty tanany, manahaky ty tana iEsao rahalahiny, ke le nanipy rano azy Isaka. ²⁴ Hoy tiasany: "Le vatany Esao anako va iha?" Namaly hozao ie: "Zaho vatany." ²⁵ Hoasa Isaka hoe: "Andeso amiko etoy ty sakafo fa ho haniko ty hazanao, mba ahaizako mitsipy rano anao." Nandesy i Jakoba taminy teny ty hany. Le nihina Isaka, sady nanandesa i Jakoba divay ie, le nino. ²⁶ Bakeo le hoy tiasa Isaka taminy: "Magnatona mrikitsy ahy sady orofo zaho, anaky." ²⁷ Nagnato i Jakoba le nanoroky azy ,sady nifofoniny ty fofoty ty sikiny rey ie le nitsipy rano azy Hozao tiasany: "Ingo ty fofo ty anako le manahaky ty fofo ty baibo ze namboary Yaveh. ²⁸ Njanahary lahy hanome anjara anao anjara amy ty ando ty lanitsy,anjara amy ty tsiro ty tany, sady voa noho divay vaovao lako. ²⁹ Hanompo anao lahy ty olo rey Handohaliky anatrehanao eo firenena rey. Ho tompo ty rahalahinao rey iha, sady handohaliky anatrehanao eo ty anaky ty reninao rey. Ho voaozo lahy iaby ty ze manozo anao; sady ho tahia iaby lahy ty ze iaby mitsipy rano anao." ³⁰ Lafa baka nitsipy rano an'i Jakoba Isaka, sady niboaky tamy ty tahotsy niala tamy ty fanatreha ty babany Jakoba, sady nimpoly baka nihaza i Esao rahalahiny. ³¹ Nanao hany matavy avao koa ie sady nanday zay tamy ty babany. Hoasa tamy babany: "Baba lahy, fohaza sady homana amy ty haza ty anakinao retoa, mba ahaizanao mitsipy rano ahy." ³² Hoasa Isaka babany taminy: "Fa ia iha?" Hoy tiasany: "Anakinao zaho, anakinao talan'olo lahilahy,Esao." ³³ Nangitikitiky mare Isaka le nivola hozao: "Fa ia ty nihaza ty aosy sady nanday zay tamiko? Nohaniko iaby zay aloha ty niavianao, sady fa nitsipy rano azy zaho.Le vatany ho tahia ie." ³⁴ Lafa nahare ty safa ty babany i Esao, le nitany mare, sady nnivola tamy babany hozao: "Tsipazo rano avao koa zaho, lahy babako." ³⁵ Hoasa Isaka : "Ty rahalahinao ro fa niavy namerivery ahy sady nangalaky ty tsipiranonao." ³⁶ Hoy tiasa i Esao: "Tsy ie va ro kaihy hoe Jakoba? Fa ie fa namerivery ahy indroe. Fa nalany ty maha talan'olo ahy, sady henany zao mbo naliny avao koa ty tsipirano tokony ho tiahy." Hoy tiasany bakeo: "Tsy misy tsipirano fa voatoka ho ahy va?" ³⁷ Namaly Isaka sady nivola tamy Esao hozao: "Ingo, fa nohosora ho tomponareo ie sady fa natolotsoko ho mpiasany rahalahiny rey, sady fa nameako azy ty voa noho ty divay vaovao. Ino ro mbo afaky ataoko ho ahinao, lahy anaky?'' ³⁸ Hoasa Esao tamy babany hoe: "tsy mana tsipirano ndra raiky ho tiahy va iha, lahy babako? Tsofy rano avao koa zaho, lahy babako." Nitany mare i Esao. ³⁹ Namaly Isaka babany sady nivola taminy hozao: "ingo ty toera ze misy anao le lavitsy ty tany lonaky, lavitsy ty tany anabo. ⁴⁰ Amy ty alala ty mesobenao ro hivelomanao, sady hanompo ty rahalahinao iha. Fa lafa hialy iha,le hanafaky ty vatanao amy ty fanandesany." ⁴¹ Nalay an'i Jakoba i Esao amy ty tsipirano ze namea ty babany azy. Nivola hozao tanainy tao Esao: "Mihamariny ty andro ty fisaona ty babako; afara zay le hovonoako i Jakoba rahalahiko." ⁴² Safa Esao talan'olo ze nivolaniny tamy Rebeka. Le nandefa sady nampikaiky an'i jakoba anany faralahy ie sady nivola taminy hozao: "Ingo, Esao rahalahinao le nampiono ty vatany amy ty fagniria hamono anao. ⁴³ Sady lafa zay,anaky,oriho ty safako sady milaisa amy Labana anadahiko any, a Harama. ⁴⁴ Mienena miaraky aminy fotoa fohy, ⁴⁵ zisiky mampihena ty heloky ty rahalahinao, le tsy ahatiarovany ty raha nanovinao taminy. bakeo le hampangalaky anao any zaho. Ataoko akory va ro hamoy anareo roe anay ty andro raiky? ⁴⁶ Hozao tiasa i Rebeka tamy Isaka: "Meloky mare zaho noho ty anakampela ty Hetita rey. Laha mangalaky valy amy ty raiky amy anakampela ty Hetita rey Jakoba, manahaky ty ampela mipetraky amy tany io rey, le ino ty soa ho tiahy amy ty fiainako?"