¹ Le nisy mosary nahazo tamy azy tany iny teo, faha ty niseho velohany tamy andro i Abrahama. Mbamy Abimeleka any, mpanajaka ahy Felistina ta Gerara Isaka. ² Le niseho tamy Yaveh sady nivola hozao: "Ka mijjotso ho Egypta iaha; mipetraha amy ty tany ze nivolaniko anao. ³ Mienena amy tany io, hiaro noho hitahy anao Zaho; fa ho ahinao noho ho tiahy tarihanao, ro ameako ty tany iaby rey, sady ho tanterahiko ty fifanta ze nifantako tamy Abrahama babanao. ⁴ Ho hampitomboako manahaky ty kinta ty lanitsy ty tarihanao rey, sady hameako ty tarihanao tany iaby rey. Baka amy ty tarihanao ro hitahia ty firenena iaby an-tany etoy. ⁵ Hanoviko zay safe Abrahama le nanoriky ty feoko noho nidary ty toro-hevitsiko, liliko rey, fanambarako rey, sady ty lalako rey." ⁶ Le nanory toboky ta Gerara tany Isaka. ⁷ Lafa nanontany azy mikasiky ty valiny lahilahy tamy toera io teo, le hozao tiasany: "Anabaviko ie." Navaka ie nivola hoe: "Valiko ie," safe nieritseritsy hozao ie: "Hamono ahy lahilahy an-toera eto rey mba hahazoany an'i Rebeka, safe le vatany ampelasoa ie." ⁸ Lafa nipetraky ela tao Isaka, le nisy fotoa Abimeleka mpanjakan'i Filistina nijilo tamy lafenety. Ingo,nihitany Isaka nitolo an'i Rebeka, valiny. ⁹ Nampikaiky an'Isaka i Abimeleka sady nivola hozao: "Hita vatany i henanizao fa valinao ie. Nanino iha ro mivola hozao: 'Anabaviko ie'?" Hozao tiasa Isaka taminy: "Safe nieritseritsy zaho fa ho vonoa ty olo mba hahazoany azy." ¹⁰ Hoy tiasa i Abimeleka hoe: "Fa ino ty raha nanovinao anay zao? Mety fa nisy olo raiky tamy ty olo niaraky niroro fahatany tamy ty valinao, sady nanday heloky sagy aminay etoy iha." ¹¹ Le nampitandry ty olo iaby i Abimeleka sady nivola hozao: "Ndra ia ndra ia mikasiky lahilahy io ndra ty valiny le azo antoky fa le vatany ho vonoa vatany." ¹² Namboly tahiry tamy tany zay Isaka le nahavokatsy lako zato avo heny tamy tao io avao, safe notahiany Yaveh ie. ¹³ Nanjary mpanarivo lahilahy iny, sady nitombo avao zay zisiky nahavy azy ho mpanarivo biby. ¹⁴ Nana aondry noho aomby, sady longo lako mare ie. Nialo azy Filistina reo. ¹⁵ Sady ty fantsaka ze nihalia ty mpiasa ty babany tamy ty andro i Abrahama babany, le nenga ty Filistiana rey zay. ¹⁶ Hozao tiasa i Abimeleka tamy Isaka: "Misitaha lavitsy anay, safe mahery lavitsy mandilatsy anay iha." ¹⁷ Le niala teo Isaka le nanoro toboky andoha ty baibo iGerara, sady nipetraky tany. ¹⁸ Nampoly Isaka nohalia ndraiky ty ;avaky ty rano rey, ze fa nohalia tammy andro ty Abrahama babany. Zefa novonoa i Felistina rey tafara ty nahafaty an'i Abrahama . Lavaky ty rano rey le nanaovy Isaka manahaky ze fa nikaiha ty babany zay avao. ¹⁹ Lafa nandoaky tambaibo ty mpiasa Isaka, le nahitaky loharano velo teny ndrozy. ²⁰ Nifamaly tamy ty mpiaraky aomby tiahy Isaka ty mpiaraky aomby ta Gerara tao, sady nivola hozao: " Ranonay io." Le nikaiaha Isaka hoe " Eseka" azy lavaky ty rano iny, safe nifamaly taminy ndrozy. ²¹ Le nihaly lavaky rano ndraiky ndrozy, le mbo nifamalian-drozy avao koa zay, le nokaiha hoe "Sitna" zay. ²² Niala teo ie le mbo nihaly lavaky rano hafa, fe tsy nifamalian-drozy zay. Le nokaihiny hoe "Rehobota" zay, sady hoasany: ''Henanizao fa nanamboatsy fipetraho ho tiahintsika Yaveh, sady ho tahina amy tany zay eo tsika." ²³ Le niakatsy bakao Isaka le nandeha a Beri-sheba. ²⁴ Tamy halin'io avao le niseho tagnaminy Yaveh sady nivola hozao: "Zaho ro Njanahary ahy Abrahama babanao. Ka mavaka, fa hiaro noho hitahy anao Zaho sady hampitombo ty tarihanao, noho amy Abrahama mpanompoko." ²⁵ Namboatsy alitara teo Isaka sady nikaiky ty anara Yaveh. Teo ty nanamboarany ty lainy, sady nandoaky fantsaka ty mpiasany. ²⁶ Bakeo i Abimeleka niata ta Gerara ho aminy any, niaraky tamy Ahozata, namany, sady Pikola be ty miaramilany. ²⁷ Hoy tiasa Isaka tamin-drozy: "Manino nareo ro mbamiko atoy, kanefa nalay ahy noho nandroaky ahy taminareo nareo. ²⁸ Bakeo ty asan-drozy hoe: "Hitanay soa zao fa niaro anao Yavaeh. Le nanapan-kevitsy zahay fa tokony hisy fifanta eo amitsika, eka, aminay eo noho aminao. Engaho zahay hanao fifanenkea aminao, ²⁹ fa tsy hanao raty anay iha, manahaky ty tsy nananovanay raty taminao, noho manahaky ty fomba soa nanandesanay anao sady nandefasanay ampilamina anao. Notahia Yaveh vatany iha." ³⁰ Le nanmboatsy hany lako ho tiahin-drozy Isaka, le nihina noho nino ndrozy. ³¹ Nifoha maraindray ndrozy sady nifampifanta. Bakeo le nampandinany Isaka nandeha ndrozy, sady nanenga azy ampilamina ndrozy. ³² Tamy andro io avao le nagnato mpiasa Isaka rey sady nivola taminy mikasiky ty lavaky ty rano ze nohalian-drozy. hoy tiasan-drozy: "Fa nahita rano zahay." ³³ Nikaiaha hoe Sheba azy lavaky ty rano, sady ty anara ty tana zay le Besi-sheba zisiky henanizao. ³⁴ Lafa efapolo tao iEsao, le nangalaky valy an'i Jodita anak'ampela i Bery Hetita,noho Basemata anak'ampela i Elona Hetita. ³⁵ Nampanday fijalea an'Isaka noho Rebeka ndrozy.