¹ Nangalaky valy hafa I Abrahama; Korota ty anarany. ² Niteraky an'i Zamrana, Joksana,Medana,Midiana, ³ Jisbaka sady Soaha ie. Joksana niteraky an'i Sheba noho i Dedana. Tariha i Dedana rey le olo Asorima, olo Letosima, sady Leomima. ⁴ Efaha ro anakilah'i midiana,Efera,Hanoka,Abida,sady i Eldaha. Azy iaby rey ro tariha i Kerota. ⁵ Namea i Abrahama an'Isakaze hanagnany iaby. ⁶ Fe tamy i mbo nivelo, le nanome fanomeza hoahy ty anaky ty valy masay sady nandefa androzy tamy ty tany antinana, lavitsy an'Isaka,anany. ⁷ Le ty andro niveloma i Abrahama le 175 tao. ⁸ Niala ay Abrahama le maty tratsy antitsy, lahilahy talan'olo fa nahazo tao, sady le navory ho amy ty olony any rey ie. ⁹ Isaka noho Ismaela, anakilahiny,ro nandevy azy tamy azy lava-baton'i Makpela, tamy baibo ahy Efrona anak'i Zohara Hetita,ze anila i Mamre. ¹⁰ Novial'i Abrahama tamy ty anakilah'i Heta zay baibo zay. Nalevy tany niharo amy Saraha valiny Abrahama. ¹¹ Tafara ty nahafatesa i Abrahama,le nitahy an'Isaka anakilahiny Njanahary,sady Isaka nipetraky narikitsy an'iBera-lahai-roy. ¹² Le retoa ty tariha Ismaela,anak'iAbrahama, ze naterak'i Agara Egyptiana, mpiasa i Saraha, tamy Abrahama. ¹³ retoa ty anara i anak'Ismaela, manoriky ty filahara ty faha antitsiny: Nabaita-- azy talan'olo lahilah'Ismaela, Kedara, Adbela, ¹⁴ Mibsama, Masma, Doma, Masa, ¹⁵ Hadada, Tema, Jetora, Nafisy,le i Kedma. ¹⁶ Rey iaby ty anakilah'Ismaela, sady rey ty anaran-drozy,araky ty tanany, noho ty toera nipetrahan-drozy; mpanjaka folo roa amby araky ty fokon-drozy. ¹⁷ Ty andro niveloma Ismaela le 137 tao: niala ay ie le nimaty, le navory ho amy ty olony ie. ¹⁸ Nipetraky ta Havila zisiky Sora ndrozy, ze tanila i Egypta, azy raiky madeha a Asyria. Niay tamy ty fankahala ndrozy. ¹⁹ Retoa iaby ty raha nahazo an'Isaka, anakilah'i Abrahama: Nanjary baba Isaka i Abrahama. ²⁰ Efapolo tao Isaka lafa nandeha nangalaky valy an'i Rebeka ie, azy anak'ampela i Betoela azy Syria ahy Padan-Arama, azy anabavy Labana Syriana. ²¹ Nivavaky tamy Yaveh ho tiahy ty valiny Isaka safe nitahy ie, sady nivalia Yaveh ty vavaky nanoviny, le trony Rebeka. ²² Nialy ty aja tan-trony,sady nivola hozao ie: "Nanino zay ro niseho tamiko?" Le nandeha nanontany an'Yaveh mikasiky zay ie. ²³ Nivola tamy Yaveh manao ho zao: " Firenana roe ro an-tonao ao, sady olo ro sarahy baka anainao ao. Ty olo raiky le harere mandilatsy ty azy hafa sady ty zokiny le hanompo ty zainy." ²⁴ Lafa avy ty fotoa hiterahanny,le ingo,nisy hamba tan-trony. ²⁵ Niboaky ty anany velohany le vatany mena manahaky ty lamba volosa. Esao ro nikaihan-drozy azy. ²⁶ Tafaran'izay,le niboaky ty rahalahany. Nitanjaky ty lela-tombok'i Esao ty tanany. Jakoba ty nikaiha azy. Enimpolo tao Isaka lafa teraka androzy ty valiny. ²⁷ Nihabe aja rey, le nanjary mpihaza mahay i Esao, lahilahy raiky tambanivolo; fe Jakoba le lahilahy tsy maro safa, ze nandany ty fotoany tan-day tao. ²⁸ Le Esao ro tean'Isaka safe nihina biby nohazainy rey ie, fe i Jakoba avao koa ty tea i Rebeka. ²⁹ Le niketriky hany i Jakoba. Le niavy baka ambaibo i Esao, le malemy ty kere ie. ³⁰ Hoasa i Esao tamy Jakoba: "Engaho zaho hihina amy ty hany mena toy. Mangalaty lahy fa vozaky mare zaho!" Zay ty antony nivolana ty anarany hoe Edoma. ³¹ Nivola hozao i Jakoba: "Avaroto amiko aloha ty hazokianao." ³² Le hoasa i Esao: ''Henteo, zaho fa ho maty. Ino ro soa azoko baka amy ty fizokia?" ³³ Le nivola hozao Jakoba: "mifanta amiko tse," le nifanta taminy Esao le tamy zay le namarotsy ty fizokiany tamy Jakoba ie. ³⁴ Namea i Jakoba mofo noho hany vita baka amy ty lojy i Esao. Nihina noho nino ie, le bakeo le nitsanga lenandeha. Tamy fomba zay ro tsy nampiasia i Esao ty fizokiany.