¹ Sendra nisy mpanakoronta raiky tamy toera raiky iny teo le i Seba ty anarany anakilahy Bikry, Benjamita raiky iny ie. Nitioky ty trompetra ie sady nivola hozao: ''Tsy mana anjara amy Davida tsika, ro sady tsy mahazo drala amy anakilahy i Jese. Engaho ty lahilahy iaby holy an-tranony any, lahy Israely.'' ² Lafa zay le nanenga any Davida lahilahy Israely iaby le nagnoriky any Seba anakilahy i Bikry. Fe ty olo Joda nipitiky nanoriky ty mpanjakandrozy, baka amy lala i Jordana iaby le zisisky aJerosalema any. ³ Lafa niavy tamy lapany ta Jerosalema tao i Davida, le nangalaky ty valiny andevo folo ze nengany hiamby ty lapa ie, le nengany tamy trano raiky voaamby ndrozy. Nanome ze kila raha nilainy ie, fa tsy niara nandry tamindrozy sasy. Le nihily tao ndrozy zisiky nahavy ty fotoa nahafaty azy, niay manahaky ty somondrara ndrozy. ⁴ Le hozao tiasa mpanjaka tamy Amasa: ''Vorio anay ty telo andro ty lahilahy Joda; tsy maintsy etoa avao koa iha.'' ⁵ Le nandeha i Amasa namory ty lahilahy i Joda, fe naharitsy ela mare tany ty fetsy andro ze nandidia ty mpanjaka azy ie. ⁶ Le hozao tiasa Davida tamy Abisay: Henanizao i Seba anakilahy i Bikry le hanao raty antsika mandilasy ty nanovy i Absaloma. Andeso ty mpanompo ty tomponao, miaramilak rey, le hidingo ie, laha tsy zay hahita tana mimanda ie le tsy ho hitantsika.'' ⁷ Le nandeha nagnia azy ty lahilahy i Joaba, niaraky tamy Keretita noho Peletita sady mpialy mahery iaby rey. Niala ta Jerosalema ndrozy mba hagnia any Seba anakilahy i Bikry. ⁸ Lafa tamy vato bevvata ta Gibeona tao ndrozy, le niavy i Amasa mba hitsena androzy. Fa nisikina i Joab taminy teny ty siky fialia, ze nisy fehin-bania tambalahany teny niaraky amy fipetraha mesobe ny nifehy taminizay. Sady lafa nandeha ie, le nilatsaky mesobe iny. ⁹ Le hozao tiasa i Joaba tamy Amasa: ''Salama soa va iha, lahy rahalahiko? Norambesy i Joaba tampitiava tamy tanany havana ty vaoky Amasa mba horofany. ¹⁰ Tsy niambiny i Amasa ty sabatsy kely ze tan-tanan-kavia i Joaba. Notsoboha i Joaba tamy tsarotsony teo i Amasa, le nivotsaky tamy tany ty tianainy rey, tsy namango azy sasy i Joaba, le nimaty i Amasa. Lafa zay le nagnia any Seba anakilahy i Bikry i Joaba noho Abisay rahalahany. ¹¹ Bakeo le niegny tamy Amasa teo ty raiky tamy lahilahy i Joaba, le hozao tiasa lahilahy iny: ''Ze mikasiky any Joaba, noho ze mikasiky any Davida, engaho ie hagnoriky any Joaba.'' ¹² Nihosy ty liony tanivon-dala teo i Amasa. Lafa nihita lahilahy iny fa niegny ty olo iaby, le nafalony niala tamy lala teo ho ambaibo i Amasa. Nolongofany lamba tanabony teo safe fa hitany fa ze olo mandrio taminy teo le nijano. ¹³ Lafa avy nala tamy lala teo i Amasa, le nanoriky any Joaba hagnia any Seba anakilahy Bikry ty lahilahy iaby. ¹⁴ Seba le nanapatapaka ty fokoa Israely iaby ta Abela a Beti-maka tany, noho heniky ty tany Berita iaby, ze nivory sady nagnia any Seba avao koa. ¹⁵ Tratsy ie le nanovindrozy aritsatoky ta Abela ta Beti-maka tany. Nanondrotsy dokon-tany raiky aloha ty manda tamy tana eo ndrozy. Ty miaramila iaby ze nagnoriky any Joaba le nandrava ty manda mba hampiravoky anizay. ¹⁶ Bekeo le nisy ampela raiky hendry nikaiky ty tan-tana tao manao hozao: '' Hanjino, mba janjino lahy, Joaba lahy! Mandina anilako atoa mba ho afahako miresaky aminao.'' ¹⁷ Le nagnanto azy i Joaba, hozao tiasa ampela iny: ''Iha va ro i Joaba?'' Le namaly hozao ie: ''zaho ro ie.'' ¹⁸ Le hozao tiasany aminy: ''Janjino ty safa ty mpanomponao.'' Le hozao tiasany: ''Fivolanan-drozy taloha ty manao hozao: 'Mila hevitsy amy A bela any,' sady zay hevitsy zay ro hampiegny ty olo. ¹⁹ Zahay le tana raiky amy le vatany milamy rey noho atokisa mare amy Israely etoa. Mikinia handrava tana raiky ze reny Israely etoa iha. Manino iha ro mila hihina ty lova Yaveh?'' ²⁰ Le namaly i Joaba le nivola hozao: '' Sanatria, le vatany sanatria amiko, ty hangalaky ndra hanimba. ²¹ Tsy to zay. Fa misy lahilahy raiky baka amy tany vohitsy Efraima, kaiha hoe seba anakilahy i Bikry, nampitsanga ty tanany hanohitsy ty mpanjaka, hanohitsy any Davida. Ie raiky avao aseseo , le hiala amy tana etoa zaho.'' Hozao tiasa ampela iny tamy Joaba: ''Ho atoraky aminao eo mandilatsy ty manda ty lohany. ²² Le tamy fahendrea ro nagnatona ampela iny ty olo iaby. Notapahandrozy ty loha i Seba anakilahy i Bikry le natoran-drozy tamy Joaba teo. Bakeo le nitsoky ty trompetra ie sady nanenga ty tana azy lahilahy i joaba rey, ty lahilahy iaby ho an-tranony . Bakeo i Joaba le nimpoly ta Jerosalema tany ho a Jerosalema. ²³ Le i Joaba le anabo ty miaramila iaby ta Israely, le i Benaia anakilahy i Joiada le anabo ty Ketretita noho Pelatita rey. ²⁴ Adorama le anabo ty lahilahy ze nanao asan'andevo. Le i Josafata anakilahy Ahiloda ro mpitahiry. ²⁵ Seva ro mpanoratsy lala, le i Zadoka noho Abiatara ro mpisoro. ²⁶ Ira azy Jairita rey ro mpanolo-tsay any Davida.