¹ Nivolany hozao tamy Joaba: ''Ingo, nitany noho misaona hoahy Absaloma ty mpanjaka.'' ² Le nivaliky fisaonana hoahy miaramila iaby ty fandresea tamy andro io, manao hozao ty niere miaramila tamy andro io: ''Misaona hoahy ty anakilahiny ty mpanjaka.'' ³ Tsy maintsy niala mangingina ty tana tamy andro io ty miaramila, manahaky ty olo menatsy mitingatinga miala laha handeha an'aly ndrozy. ⁴ Nanaro ty tarehiny ty mpanjaka sady nitany tamy feo mare manao hozao: ''Absaloma anako lahy, Absaloma, ty anako, ty anako!'' ⁵ Le nilitsy tamy trano mpanjaka tao i Joaba sady nivola hozao taminy: ''Manafa-baraka ty vata ty miaramilanao iaby henanio, ze nanavotsy ty ainao androany, ty ay anakilahinao rey noho anakampelanao, noho ty ay ty valinao sady ty ay ty valy andevonap iha, ⁶ safe iha le tea ze malay anao, sady malay ze teanao rey. Fa henanio le natorona fa tsy misy dikany aminao mpifehy noho miaramila rey. Henanizao le mino zaho fa laha mbo nivelo i Absaloma, le nimaty iaby tsika, le nahafaly anao zay. ⁷ Lafa zay mitsangana le miboaha sady volano amy ty fahatsora azy miaramilanao rey, fa mifanta amy Yaveh zaho, fa laha tsy mandeha iha, le tsy hisy olo ndra raiky hiegny aminao atoy androany haly. Horaty mare aminao mandilatsy ty loza iaby ze fa nahazo anao baka amy ty fahatanoranao le zisiky amizao zay.'' ⁸ Le nitsanga ty mpanjaka le nipetraky tambavady ty tana teo, le ty olo iaby nivola hozao: ''Ingo, mipetraky am-bavahady eo ty mpanjaka,'' le nandeha talohany eo ty olo iaby. Le nilay Israely, samby nandeha an-tranony iaby ty olo. ⁹ Le nialy hevitsy iaby ty olo ty amy fokoa Israely iaby le nanao hozao: '' Namonjy antsika tamy tana ty fahavalontsika ty mpanjaka, sady nanavotsy antsika tan-tana Filistina ie, fa henanizao ie le nilay ty tany ie noho i Absaloma. ¹⁰ Absaloma, ze nohosoratsika hanjaka tamitsika tetoy, le fa nimaty tanaly tany. Ka manino nareo tsy mivola ndra ino ndra ino amy ty fampolia any mpanjaka?'' ¹¹ Davida mpanjaka naniraky tamy Zadoka noho i Abiatara mpisoro tany le nanao hozao: ''Volano hozao loholon'i Joda: 'manino nareo ndraiky ro farany amy fampolia ty mpanjaka amy lapany any, fe ty resaky Israely iaby le mankasitraky any mpanjaka, mba handay azy himpoly amy lapany any? ¹² Rahalahiko nareo, nofitsiko noho taolako. Ka manino nareo ndraiky ro farany amy fanampoliana any mpanjaka?' ¹³ Sady volano hozao i Amasa: ' Vasa iha tsy nofitsiko noho taolako? Hanovin-Dranahary amiko lahy zay, le mandilatsy anizay aza, laha tsy kapiteny ty miaramilako amy toera i Joaba eo iha manomboky zao.'' ¹⁴ Le teany manahaky ty olo raiky azy fo ty lahilahy Joda iaby. Nampaniraky manao hozao tamy mpanjakandrozy: '' Mimpolia, iha noho ty olonao iaby.'' ¹⁵ Le nimpoly ty mpanjaka le niavy ta Jordana teo. Le ty olo i Joda niavy ta Gilgala teo mba hitsena ty mpanjaka sady bakeo handay ty mpanjaka hiampita i Jordana. ¹⁶ Simey anakilahy Gera, azyBenjamita iny, ze niavy baka a Bahorima, le nijotso malaky niaraky tamy olo i Joda mba hitsena any Davida mpanjaka. ¹⁷ Nisy arivo lahy niavy baka a Benjamina niaraka taminy, le i Ziba azy mpanompo i Saoly, noho ty anakilahiny folo limy amby sady mpanompony roapolo niaraky taminy. Niampita any Jordana miatriky mpanjaka ndrozy. ¹⁸ Niampita mba handay ty longo ty mpanjaka sady hanao ze kila raha iaby nieritseretiny fa ho soa ndrozy. Nandongaliky tanatreha mpanjaka eo i Simey anakilahy i Gera aloah ty hiampitany ty Joradana. ¹⁹ Hozao tiasa i Simey tamy mpanjaka: ''Aha, lahy tompoko, ka manasazy ahy na mahatiaro ze nanovy ty mpanomponao tamy fivazavaza tamy andro niala ty mpanjaka tompoko ta Jerosalema tao. Mangataka, engaho tsy handramby anizay am-po ao lahy mpanjaka. ²⁰ Fa azy mpanomponao rey lafa mahay fa mpanota zaho. Ingo, zay ty antony niaviako aloha tamy longo i Josefa rey androany mba hijotso hitsena ty mpanjaka tompoko.'' ²¹ Fa i Abisay anakilahy Zeroia namaly le nanao hozao: '' safe nanozo any azy nohosora Yaveh ie?'' ²² Le nivola hozao i Davida: '' Vasa mpy ino zaho noho iha, lahy anakilahy Zeroia, ro tokony mpanohitsy ahy nareo henanizao? Tokony hisy lahilahy ho vonoa va amy Israely etoa androany? vasa tsy hainao fa zaho ro mpanjaka any Israely henanio?'' ²³ Le nivola hozao tamy Simey ty mpanjaka: '' Tsy ho maty iha.'' Le nampitama azy tamy fifanta ty mpanjaka. ²⁴ Le i Mefiboseta anakilahy Saoly nijotso mba hitsena any mpanjaka. Tsy nanisy kapa ty tombony ie, na nagnafaky ty somitsiny, ndra nanasa ty sikiny nanomboky tamy andro nandina ty mpanjaka le zisiky amy andro niaviany soa aman-tsara tan-tranony tao. ²⁵ Lafa niavy ta Jerosalema ie mba hitsena ty mpanjaka, le hozao tiasa mpanjaka taminy: ''Nanino iha ro tsy niaraka tamiko, lahy Mefiboseta?'' ²⁶ Namaly hozao ie: ''Mpanjaka tompoko lahy, namerivery ahy ty mpanompoko, fa hozao tiasako: 'Hanisy ty fipetraha ty apondrako zaho mna hahaizako mitikitsy anizay noho miaraky amy mpanjaka, safe ty mpanomponao mandringa. ²⁷ Ziba mpanompoko lefa nanarasara ahy, mpanomponao, tamy mpanjaka tompoko. Fa ty mpanjaka tompoko le manahaky ty anjely Ndranahare. Lafa zay le anovo ze soa amasonao eo. ²⁸ Safe ty tariha ty babako iaby lafa lahilahy maty anatreha ty mpanjaka tompoko eo,kanefa iha nanenga ty mpanomponao ho isa ze mihina andatabonao teo manoka. Le ino asy lafa zay ro hato to hiany ze tokony mbo hitoreovako amy mpanjaka?'' ²⁹ Le hozao tiasa mpanajak taminy: '' Manino ro manazava raha mandilatsy?'' Fa nanam-pakevitsy zaho fa iha noho Ziba ro hizara baibo rey.'' ³⁰ Le i Mefiboseta namaly ty mpanjaka manao hozao: '' Eka, engaho ie hangalaky azy iaby, safe ty mpanjaka tompoko le fa viavy soa ts nanahy an-tanony ato.'' ³¹ Le i Barzilay azy Gileadita iny le nijotso baka a Rogelima any mba hiampita i Jordana miaraky amy mpanjaka, sady nanesy any mpanjaka hiampita any Jordana ie. ³² Barzilay le vatany lahilahy antitsy, valopolo tao. Fa nanome vatia hoahy mpanjaka ie tamy ie mbo ta Mahanaima tao, safe lahilahy mpanarivo ie. ³³ Hozao tiasa i mpanjaka tamy Barzilay: ''Ndao hiaraky hiampita amiko, sady hanome anao toera miaraky amiko a Jerosalema any zaho.'' ³⁴ Barzilay namaly any mpanjaka manao hozao: ''Ombiamoa ty sisa ty andro iainako, ro tokony mbo hiara hiakatsy amy mpanjaka a Jerosalema any va zaho? ³⁵ Valopolo tao zaho. Mahay manavaky ty soa noho ty raty va zaho? mahavita mihina ze haniko noho hinomako va y mpanomponao? Vasa mahare ty feo ty mpihira sasy va zaho? Ka manino ty mpanomponao le mbo ho vesatsy hoahy mpanjaka tompoko? ³⁶ Te hiampita miaraka amy mpanjaka a joradana fotsiny ty mpanomponao. Le manino ty mpanjaka le hamaly fitea ahy manahaky zay? ³⁷ Engaho lahy holy ty mpanomponao, mba ho maty amy tanako anila ty lolo ty babako noho ty reniko zaho. Fa ingo, ntoy i Kamama mpanomponao. Engaho ie hiaraky miampita amt tompo mpanjaka, le anovy aminy ze eritseretinao fa soa aminao.'' ³⁸ Le namaly hozao ty mpanjak: ''Hiaraky hiampita amiko i Kamama, le hanoviko aminy ty eritseretinao fa soa, sady ndra ino ndra ino irinao amiko, atoy le hanoviko hoahinao zay.'' ³⁹ Le niampita any Jordana ty olo iaby, niampita ty mpanjaka,le nanoroky any Barzilay ie sady nitsipy rano azy. Le noly tan-tranony tany i Barzilay. ⁴⁰ Le niampita any Galgala ty mpanjaka, le niampita niaraky taminy i Kimama. Ty miaramila i Joda iaby le nanday any mpanjaka niampita, le ty ila ty miaramila Israely. ⁴¹ Tselatsela le nanomboky niavy tamy mpanjaka teo ty lahilahy Israely iaby sady nivola hozao tamy mpanjaka: ''Nanino rahalahitsika rey, azy lahilahy i Joda, ro nangalatsy anao sady nanday ty mpanjaka noho ty longony niampita any Joradana, sady ty lahilahy davida iaby niaraky taminy?'' ⁴² Le namaly ty lahilahy Israely hozao i Joda: ''Zay safe ty mpanjaka anilay mare. Le manino nareo ro meloky amizay? Fa nandany ze novilia ty mpanjaka va zahay? Fa nanome fanomeza hoahinay va ie?'' ⁴³ Le namaly ty lahilahy i Joda hozao ty lahilahy i Israely: ''Mana foko folo mifandray amy mpanjaka zahay, lafa zay manan-jo lako ty amy Davida tany nareo zahay.Le manino nareo ro tsy midary anay? Vasa tsy torohevitsinay ty hanandesa ty mpanjaka himpoly ro nire velohany? ''Fa azy vola i Lahilahy i Joa le mahery mare tany ty safa ty lahilahy Israely.