¹ Nisy mosary naharitsy telo tao nifanoriky tamy andro tiahy davida, le nila ty vatany Yaveh i Davida. Le hozao tiasa Yaveh: '' Aminareo eo ty mosary io hoho Saoly noho ty longony mpanompony olo , safe namono Gibeonita ie.'' ² Le Gibeonita rey tsy niavy amy olon'Israely; fa avy amy sisa ty Amorita rey ndrozy. Fa nifanta tsy hamono androzy rey ty olon'Israely, fe niezaky hamono androzy avao tamy ty zotom-pony avao i Saoly hoahy olon'Israely noho Joda. ³ Lafa zay i Davida Mpanjaka le nikaiky niaraky Gibeonita rey sady nivola hozao tamindrozy: ''Ino va ro tokony hanoviko ho ahinareo? Manao akory ty hananoviko fanavota, mba hanomezanareo tsipy rano azy olon'Yaveh rey, ze mandova ty hasoany noho ty fampitamaniny?'' ⁴ namaly azy hozao i Gibeonita: ''Tsy resaky volafoty ndra volamena aminay noho Saoly ndra ty longony zay. Manahaky zay koa ro tsy amonoanay olo amy Israely ao.'' Le namay hozao i Davida: ''Ino va ty volanireo fa tokony hanoviko aminareo?'' ⁵ Namaly hozao ty mpanjaka ndrozy: ''Azy lahilahy ze nikinia hamono anay iaby, ze nanao hevitsy hanohera anay , mba ho potiky zahay zao sady tsy hana toera amy sisintany Israely --- ⁶ tokony hisy lahilahy fito baka amy ty tarihany hamea anay, le hagnanto androzy anatreha Yaveh a Gibea tiahy Saoly any,azy raiky nitinginy Yaveh zahay.'' Le hozao tiasa mpanjaka: ''Hameako anareo ndrozy.'' ⁷ Fa niferinay tamy Mefiboseta anakilahy Jonatana anakilahy Saoly ty mpanjaka, noho ty fanta Yaveh tamindrozy rey teo, tamy Davida noho Jonatana, anakilahy i Saoly. ⁸ Fe nala ty mpanjaka azy anakilahy roe i Rizpa anakampela i Aia, anany baka amy Saoly--- Armony noho Mefiboseta ro anara ty lahilahy roe rey; le nala i Davida avao koa azy anakilahy limy amy Mikala anakampela i Saoly, ze baka amy Adriela anakilahy i Barzilay azy Meholatita iny. ⁹ Nameany tan-tany ty Gibeonita rey ndrozy. Nahantondrozy tambohitsy taloha Yaveh tany ndrozy, le niaraky maty ndrozy fito. Tamy fotoa fiakara ty vokatsy ty namonoa androzy, tamy andro velohany tamy fiatomboha ty famoriam-bokatsy ty vary hordea. ¹⁰ Bakeo i Rizpa, anakampela i Aia, nangalaky lamba fisaona sady namelatsy anizay hoahy ty vatany tamy tendro vohitsy anila ty faty rey, baka amy ty veloha ty fanapafa ty vokatsy le zisiky amy ty nilatsaha ty ora tamindrozy rey teo baka andanitsy any. Tsy nengany hanakoronta ty maty rey ty voro ty lanitsy lafa atoandro ndra ty biby ly lafa haly. ¹¹ Nivolany tamy Davida ze nanovy i Rizpa, anakampela i Aia, azy valy Saoly andevo iny. ¹² Lafa zay le nandeha i Davida le nangalaky ty taola i Saoly noho ty taola i Jonatana anakilahiny tamy lahilahy i Jabesi-gileada, ze nangalatsy anirey tamy kianja ty olo itambara ta Beti-sana tany, tamy ze nampihatona ty Filistina androzy tany, lafa baka namono any Saoly ta Gilboa tany ndrozy. ¹³ Nala i Davida hiala tao ty taola i Saoly noho ty taola i Jonatana anakilahiny, sady namory ty taola ty lahilahy fito rey avao koa ndrozy. ¹⁴ Nelevindrozy tamy tana Benjamina ta Zela ty taola i Saoly noho Jonatana anakiny, tamy lolo i Kisy babany. Nanovindrozy iaby ze kila raha iaby nandidia ty mpanjaka. tafaranizay le nivalian-Dranahare ty vavakindrozy hoahy ty tany. ¹⁵ Bakeo azy Filistianrey le nandeha nialy tamy Israely ndraiky. Lafa zay le nijotso niaraky tamy miaramilany i Davida le nialy anohitsy any Filistinarey. Vozaky ty aly i Davida. ¹⁶ Jisbibenoba , tariha i Refaita ,azy nilanja telonjato sekely ty lefony saba, le ze nana mesobe fitaovam-pialia vaovao, le nikinia hamono any Davida. ¹⁷ Kanefa i Abisay anaky Zeroia nanavotsy any Davida, nanafiky ty Filistina, le namono azy. Bakeo azy lahilahy Davida rey nifanta nanao hozao taminy: ''Ts tokony handeha hialy miaraky aminay sasy iha, mba tsy hamonanao ty joro Israely.'' ¹⁸ Le tafaranio le nisy aly niaraky tamy Filistina ndraiky ta Goba tao, lafa nivonoa i Sibeka azy Hosatita iny i Safa , ze raiky tamy tariha i Refaita rey. ¹⁹ Le nisy aly ndraiky tamy Filistina ta Goba rey, ze namonoa i Elanana anakilahy i Jere azy Betlehemita ahy Goliata azy Gatita iny, ze manahaky ty fory teno ty mpeneno ty lefony. ²⁰ Le amy aly hafa ta Gata tao le nisy lahilahy bevata nana ratsan-tana eny saky t tanany sady rantsan-tomboky eny saky saky ty tombony, roapolo efatsy amby ty isakiny. Baka amy tariha i Refaita avao koa ie. ²¹ Lafa nanosotraky any Israely ie, le nivonoa i Jonatana anakilahy i Siea, rahalahany Davida. ²² Rey ty tariha i Refaita ta Gata tao, le novonoa ty tana i Davida noho ty tana miaramila rey ie.