¹ Tafara zay Davida le nanafaky ty Filistina sady nandresy androzy. Lalàny tamy ty fifeheza ty Filistiny i Gata noho ty tanàny. ² Sady nandresy an'i Moaba ie bakeo, sady le nanjary mpiasa i Davida ty Moaba sady nandoa haba taminy. ³ Le resy i Davida i Hadarezera, mpanjaka i Zoba ta Hamata ao, laha mbo nandeha mba hampipetsaky ty lalàny tan-tsisy ty renirano i Eofrata eo i Hadarezera. ⁴ Nanamnotsy kalesa arivo raiky, noho mpiondra-sovaly fito arivo, sady mpandeha an-tomboky roa aly i Davida. Nitsekofy i Davida sovaly ty kalesa iaby rey, fa nanoka ze mahampy kalesa zato ie. ⁵ Lafa niavy mba hanampy an'i Hadarezera mpanjaka i Zoba rey Syriana baka Damaskosy any, le namono lahilahy Syriana roa rivo noho roa aly Davida. ⁶ Bakeo le nampipetsaky maramila ta Syria a-Damaskosy any i Davida, ka le nanjary mpiasa i Davida ty Syriana sady nandoa haba taminy. Namea Yaveh fandresea i Davida ndra taia ndra taia nandehanany. ⁷ Nala i Davida fiaro volamena iaby rey tamy ty mpiasa i Hadarezara rey eny sady nandesiny ta Jerosalema any. ⁸ Ta Tibata noho Kona any, tanà i Hadarezera, ke nangataky saba lako i Davida. Saba zay ro nananova i Solomona ty riaky-saba, ty andry, noho ty fiasà saba tafara tato. ⁹ Lafa re i Toy, mpanjaka i Hamata, fa resy i Davida ty tafiky i Hadarezara mpanjaka i Zoba iaby, ¹⁰ le nalefa i Toy tamy i Davida any i Hadorama anakilahiny mba hiarahaba noho hisaotsy azy, safe Davida nialy tamy i Hadarezera noho nandresy azy, sady safe nampitsanga aly tamy i Toy i Hadarezera. Sady Hadorama ro nanday raha vita tamy ty volafoty, volamena, sady saba niaraky taminy. ¹¹ Natoka i Davida mpanjaka ho an'Yaveh raha rey, niaraky tamy ty volafoty noho volamena ze nandesiny baka amy ty firenea iaby: Edoma, Moaba, ty olo lako i Amona, Filistina rey, sady ty Amalekita. ¹² Namono Edomitavvalo ray aly noho valo arivo i Abisay anakilahy i Zeroia tamy ty Lohambaibon-tsira. ¹³ Nametsahany maramila ta Edoma ao, sady nanjary mpiasa i Davida Edomita iahy rey. Namean-Janahary fandresea i Davida ndra taia ndra taia nandehanany. ¹⁴ Nanjaka tamy Israely iaby eo Davida, sady nanao ty rariny noho ty fahamarina tamy ty olo lakony iaby ie. ¹⁵ Joaba anakilahy i Zeroia ro mpifehy ty tafiky, sady Josafata anakilahy i Ahiloda ro mpanoratsy. ¹⁶ Zedoka anakilahy i Ahitoba noho Abimeleka anakilahy i Abiatara ro mpisoro, sady Saosa ro mpanoraky-lala. ¹⁷ Benaia anakilahy i Joiada ro nifehy Keretita noho Peletira rey, sady anakilahy i Davida rey ro mpanome-say mitariky ty mpanjaka.