¹ Sady lafa tafapetraky tamy ty tsanony ao ty mpanjaka, le hoy ie tamy i Natana to-resaky hozao: "Ingo, mipetsaky anay tsano sedera zaho, nefa ty fiondrana ty fanenkea Yaveh ro mijano ambany lay ao." ² Le hoasa Natana tamy Davida hozao: "Mandehana, anovo ze am-ponao ao, fa mitahy anao Njanahary. " ³ Nefa ty haly avao ro avy tamy i Natana ty safan-Janahary, nanao hozao: ⁴ "Mandehana sady volano i Davida mpiasako hoe: 'Zao ro volany i Yaveh: Tsy hamboatsy tsano ho Ahy mba hipetsahako iha. ⁵ Fa tsy mbo nipetsaky tanay tsano ao Zaho nanomboky tamy ty andro ze nandaisako an'Israely niakatsy ka le zisiky amy andro zao. Fa koa, nipetsaky tanay lay ao Zaho, le tabernakely, tamy ty toera sambihafa. ⁶ Tamy ty toera iaby ze fa nifindrako tamy Israely iaby eo, moa va Zaho fa nivola ndra ino ndra ino tamy mpitarikin'Israely ze nitondroko rey ho mpiemby ty olo lakoko, nonao hozao: "Nanino nareo ro tsy namboatsy tsano sedera ho Ahy?""' ⁷ "Amy zao, volano Davida mpiasako hoe: 'Zao ro volany Yaveh Tompo ty lako: Zaho ro nangalaky anao baka amy ty tany fihinanam-biby, baka amy ty fanaraha aondry, mba ho mpanapaky amy Israely oloko eo iha. ⁸ Nitahy anao Zaho ndra taia ndra taia nandehananao sady nandrava fahavalonao rey tsy ho alohanao eo, sady hameako anara, manahaky ty anara ze bey anabo ty tany eo iha. ⁹ Hanondro toera raiky ho ahy Israely oloko Zaho sady hampipetsaky androzy ao, mba hipetsahan-drozy amy ty toeran-drozy ao manoka sady tsy hana ahiahy sasy. Olo raty fanahy rey ro tsy hampijaly androzy, manahaky ty nanovin-drozy taloha sasy, ¹⁰ manahaky ty nanovin-drozy manomboky tamy ty andro ze nibekoako mpitsara rey mba ho amy Israely oloko rey eo. Bakeo handavo lefo fahavalonao rey iaby Zaho. Fanampy zay le volaniko aminao fa zaho, Yaveh, ro hamboatsy tsano raiky ho anao. ¹¹ Ho avy zay lafa tanteraky ty fotoanao ze handehananao amy razambenao rey any, le hampitsanga tariha manolo anao rey Zaho, sady ho ahy ty raiky amy tarihanao rey, le Zaho ro hampipetsaky ty fanjakany. ¹² Hanamboatsy tsano ho Ahy ie, sady Zaho hampipetsaky ty seza fipetrahany mandrakizay. ¹³ Ho babany Zaho, sady ie ho anako. Tsy halako aminy ty fahatokisa ty fanenkeako, manahaky ty nangalako zay tamy i Saoly, ze nanapaky talohanao. ¹⁴ Hapetsako ho amy ty tsanoko noho amy ty fanjakako mandrakizay eo ie, sady ty seza fipetrahany ro hipetsaky mandrakizay."' ¹⁵ Le niresaky tamy i Davida i Natana sady nanesy safa iaby rey taminy any, ka le niresaky taminy mikasiky azy fahita raiky iaby iny ie. ¹⁶ Le nilitsy Davida mpanjaka sady nipetsaky taloha Yaveh eo; hoy ie hozao: "Ia moa zaho, Yaveh Njanahary, sady ino ty longoko, ro le nandesinao ho amy tanjo zao zaho? ¹⁷ Fa raha kelikely tamasonao eo zay, Njanahary e. Niresaky amy ty longo ty mpiasanao ze mbo ho avy Iha, sady nampitoro ahy tariha ho avy rey, Njanahary e. ¹⁸ Ino sasy ro azoko, zaho Davida, volany aminao? Nameanao voninahitsy ty mpiasanao. Nameanao fankatoava manoka ty mpiasanao. ¹⁹ Yaveh e, laha ty amy ty mpiasanao, noho mba hahantanteraky ty tanjo manoka, ro nananovanao raha-bey zao mba hampibaribary asanao bevata iaby rey. ²⁰ Yaveh e, tsy misy manahaky Anao, sady tsy misy Njanahary hafa-tsy Iha, manahaky ze fa renay mandrakariva. ²¹ Fa ia ro firenea anabo ty tany eo manahaky ty Israely olonao, ze navotanao, Njanahary, baka Egypta any mba ho olo lako ho Anao, mba hanao anara ho anao amy asa bevata rey noho mahatseriky? Firenea rey eo niroahinao tsy ho aloha ty olo lakonao eo, ze navotanao tamy Egypta. ²² Nanovinao ho olo lakonao manoka mandrakizay i Israely, sady Iha, Yaveh, le avy Njanaharin-drozy. ²³ Ka le amy zao, Yaveh e,hipetsaky mandrakariva lahy ty fampanantenanao ze nanovinao mikasiky ty mpiasanao noho ty longony. Anoviny manahaky ze fa nivolaninao. ²⁴ Hipetsaky mandrakizay lahy ty anaranao sady ho bevata, ka le hivola ty olo hoe: "Yaveh Tompo ty lako ro Njanaharin'Israely,' laha apetsako anilanao eo, ty tsanoko, Davida mpiasanao. ²⁵ Fa Iha, Njanahariko, ro fa nampitoro tamy ty mpiasanao fa hamboatsy tsano ho azy Iha. Zay ro anoviny, nahitako, zaho mpiasanao, firisiha hivavaky aminao. ²⁶ Ka le amy zao, Yaveh e, Iha ro Njanahary, sady fa nanao fampanantenà zay tamy ty mpiasanao: ²⁷ Sady sitsakinao ty hitahy ty tsano ty mpiasanao, mba hitohiza zay mandrakizay anilanao eo. Iha, Yaveh e, ro nitahy zay, ka le ho voatahy mandrakizay zay."