¹ Le nandesin-drozy nilitsy fiondranan-Janahary iny sady napetsakin-drozy tanivo ty lay ze nanovy i Davida ho ahy zay eo. Bakeo nanome fanomeza oroa noho fanomeza-pihombonana tanilan-Janahary eo ndrozy. ² Lafa vita i Davida ty soro ty fanomeza oroa noho ty fanomezam-pihombona, le nitahy ty olo lako tamy ty anara Yaveh ie. ³ Nizarazara mofo, sombin-keny, sady mofo mamy misy voloboky tamy Israelita iaby rey, ndra lahy ndra ampela ie. ⁴ Nanondro Levita sasantsasany mba hanompo aloha azy fiondrana Yaveh eo i Davida, sady mba hankalaza, hisaotsy noho hanompo an'Yaveh, Njanaharin'Israely iny. ⁵ Levita rey ro Asafa azy mpitariky iny, sady faharoe manaraky azy i Zakaria, Jeiela, Semitamota, Jehiela, Matita, Eliaba, Benaia, Obed-Edoma, sady Jeiela. Rey ro nititiky lokanga noho harpa. Asafa ro nampaneno ty kipantso, ze maneno maré. ⁶ Benaia noho Jahaziela mpisoro ro mpilay tsy tapaky ty trompetra, taloha ty fiondrana ty fanenkean-Janahary. ⁷ Sady tamy androzy zay Davida ro nanondro velohany an'i Asafa noho rahalahiny rey mba hihira hira ty fisaora an'i Yaveh io. ⁸ Ameo fisaora i Yaveh, Kaiho ty anarany ; ampahaizo amy firenea rey ty asany. ⁹ Mihirà Azy, mihirà fanompoa Azy; ambarao asany mahatseriky iaby rey. ¹⁰ Mirengerengea amy ty anarany masy; enganie hofaly ty fo ze mila an'Yaveh rey. ¹¹ Ilao Yaveh noho ty heriny; ilao mandrakariva ty famonjeany. ¹² Tiarovo raha-mahatseriky nanoviny rey, hatsereha noho lalà baka amy ty vavany reg, ¹³ tariha Israely mpiasany rey, nareo olo lako i Jakoba, ze nitingininy. ¹⁴ Ie ro Yaveh Njanaharin-tsika. Amy ty tany iaby lalány rey. ¹⁵ Anovo an-tsainao ao mandrakariva ty fanekeany, le ty safa ze nibekoany an'i tariha arivo raiky hifanolo rey. ¹⁶ Mahatiaro ty fanenkea ze nanoviny tamy i Abrahama, noho ty voaliny tamy Isaka Ie. ¹⁷ Zay ro nampahereziny tamy i Jakoba manahaky ty fitsipiky, sady tamy Israely manahaky ty fanenkea mandrakizay. ¹⁸ Hoy Ie hozao: "Hanome anareo ty tany i Kanana ho anjara lovanareo Zaho." ¹⁹ Nivola zay Zaho laha mbo tsiampy hisaky nareo, tena tsiampy vatany, sady vahiny tamy ty tany ao. ²⁰ Nandeha tamy ty firenea ho amy ty firenea ndrozy, baka amy ty fanjaka raiky mana amy ty hafa any. ²¹ Tsy nisy ndra ia ndra ia nengany hampijaly androzy; mpanjaka rey ro nisaziny noho ty amin-drozy. ²² Hoy ie hozao: "Mba ka mikasiky an'i ze voahosotsy rey, sady mba ka manisy raty an'i mpaminaniko rey." ²³ Mihirà ho an'Yaveh, tany iaby; ambarao isan'andro san'andro ty famonjeany. ²⁴ Ambarao amy firenea rey eo ty voninahitsiny, sady amy firehea iaby rey eo asany mahatseriky rey. ²⁵ Fa bevata Yaveh ka le tokony ho tompoe maré, sady tokony hatahora anabo njanaharin-kafa iaby rey Ie. ²⁶ Safe sampy Njanahary ty firenea iaby, fa Yaveh ro nanao ty lanitsy. ²⁷ Amy ty famonjeany eo ty famirapiratsy noho ty voninahitsiny. Sady amy ty toerany eo ty hery noho ty hafalea. ²⁸ Manomeza an'Yaveh, foko ty olo lako, manomeza voninahitsy noho hery an'Yaveh; ²⁹ ameo an'Yaveh ty voninahitsy maeva ty anarany. Mandaisa fanomeza sady mamonjea anilany eo. Mandohalifa amy Yaveh amy ty famirapiratsy masy. ³⁰ Mangovitsy anilany eo, tany iaby. Tany iaby toy avao koa ro fa namboary; tsy afaky hazongozony zay. ³¹ Enganie ho faly ty lanitsy, sady enganie ndrozy hivola amy firenea rey eo hozao: "Manjaka Yaveh. " ³² Engaho hierotsy ty riaky, sady ze manatsiky zay le hihiaky am-pifalea. Enganie ho faly baibo rey, noho ze iaby amy rey eo. ³³ Sady engaho hazo an'ala ao rey hihiaky am-pifalea anila i Yaveh eo, fa ho avy hitsara ty tany Ie. ³⁴ Misaora an'Yaveh, fa soa Ie, safe maharitsy mandrakizay ty fanenkeany matoky. ³⁵ Bakeo mivolana hozao: "vonjeo zahay, Njanahary ty famonjeanay. Avorio miaraky zahay sady vonjeo amy firenea hafa rey, mba ho afaky hanome fisaora ho ahy ty anaranao masy noho voninahitsy amy ty fanompoa Anao zahay." ³⁶ Ho tompoe mandrakizay lahy i Yaveh, azy Njanaharin'Israely. Hoasa ty olo iaby hozao: "Amena" sady nanompo an'Yaveh. ³⁷ Laha zay Davida le nanenga an'i Asafa noho rahalahiny tanila azy fiondrana ty fanenkea Yaveh iny eo, mba hanompo mandrakariva anila azy fiondrana iny, manahaky ze take ty asa isan'andro san'andro. ³⁸ Anay zay i Obed-Edoma miaraky amy longony enim-polo valo amby. Obed-Edoma anakilahy i Jedotona, miaraky amy i Hosa, ro mpiemby vavahady. ³⁹ Zadoka azy mpisoro noho mpisoro namany iny rey ro tamy ty toera abo eo ta Gibeona ao mba hanompo aloha ty tabernakelin'Yaveha eo. ⁴⁰ Hanome fanomeza oroa mandrakariva amy maray noho hariva ho ahy Yaveh anabo ty alitara eo ho ahy ty fanoroa fanomezan-drozy, manahaky zeciaby voasoratsy amy ty lalà Yaveh ao, ze nameany ho lily ho an'Israely. ⁴¹ Hemana noho Jedotona ro niaraky tamin-drozy, niaraky tamy ambiny rey ze nitinginy tamy ty anara, mba hanome fisaora an'Yaveh, safe ela mandrakizay ty fanenkeany matoky. ⁴² Hemana noho Jodotona ro mpiantoky ty tsano ze mitsoky trompetra rey, Kipantdo, sady raha-maneno hafa ho ahy ty hira masy. Anakilahy i Jedotona rey ro niemby ty vavahady. ⁴³ Bakeo ty olo iaby nimpoly tan-tsanon-drozy ao iaby, sady Davida nimpoly mba hila ty longony.