¹ Sady tafara tato le maty Nahasy, mpanjaka ty olo lako i Amona, sady le ty anakilahiny ro lasa mpanjaka tamy ty toerany eo. ² Hoasa Davida hozao: "Hampitoro hasoam-panahy amy i Hanona anakilahy i Nahasy zaho, safe nampitoro hasoam-panahy tamiko ty babany." Ka le nandefa iraky i Davida mba hampijano azy mikasiky ty babany. Nilitsy tamy ty tany Amonita any mpiasa i Davida rey sady nana amy i Hanona any, mba hampijano azy. ³ Fe hoasa lahilahy lako Amonita rey tamy i Hanona hozao: " Mieritseritsy va iha fa manome voninahitsy ty babanao i Davida safe naniraky mpiasany rey mba hampahery anao? Moa tsy avy aminao eto mpiasany rey mba hisafo noho hanenty ty tany mba handrava zay?" ⁴ Ka le nanambotsy mpiasa i Davida i Hanona, nandratsy androzy, nanapaky fisikinan-drozy zisiky amy ty valahany eo, zisikybamy ty foto-pen-drozy eo, sady nandroaky androzy. ⁵ Lafa nihazavan-drozy tamy i Davida zay, le naniraky hitsena androzy ie, safe afa-baraka tanteraky lahilahy rey. Hoasa ty mpanjaka hozao: "Mijanona a-Jeriko ao zisiky hitiria ty volosomotsinareo ndraiky, sady mimpolia bakeo." ⁶ Lafa hita Amorita rey fa nanjary nangily holitsy tamy i Davida ndrozy, le nandefa talenta volafoty arivo raiky i Hanona noho ty Amonita mba hikarama kalesa Syriana noho mpiondra-sovaly baka amy i Naharaima, Maka, sady Zoba. ⁷ Nampikarama androzy kalesa telo aly noho roa rivo ty mpanjaka i Maka noho ty olo lakony, ze avy nipetsaky taloha i Medeba eo. Nivory tamy tanàny rey eo Amonita rey, sady niboaky ho amy ty aly. ⁸ Lafa naharé zay i Davida, le naniraky an'i Joaba noho ty tafikiny iaby ie mba hamonjy amin-drozy. ⁹ Niboaky ty olo lako i Amona ka le nilahatsy ho amy ty aly tamy ty vavahady ty tanà eo, laha tamy ty baibo mpanjaka ze avy rey eny. ¹⁰ Lafa hita i Joaba ty aly nanatsiky azy sady taloha teo ro tafara ao, le nifantoky ilany amy mpialy mahay bibiky rey tamin'Israely eo ie sady mandahatsy androzy hanohitsy Syriana rey. ¹¹ Laha ty amy tafiky ambiny rey, le nameany ho ambany fibekoa i Abisay eo rahalahiny zay, sady nalahatsiny ho amy ty aly hanohitsy ty tafiky i Amona ndrozy. ¹² Hoasa Joaba hozao: "Laha hohatsy ka mahery maré ho ahy Syriana rey, le iha, Abisay, ro tsy maintsy mamonjy ahy. Fa laha mahery maré aminao koa ty tafiky i Amona, le ho avy hamonjy anao zaho. ¹³ Mahereza, sady enga anie tsika hampitoro ty vatantsika ho mahery ho ahy ty olo lakontsika noho ho an'i tanà ty Njanaharintsika, fa hanao ze soa ho ahy ty tanjony Yaveh." ¹⁴ Ka le nisoro ho amy ty aly i Joaba noho maramila tafikiny rey mba hanohitsy Syriana rey, ze voatery nilay tanila ty tafik'Israely eo. ¹⁵ Lafa hita ty tafiky i Amona fa nilay Syriana rey, le nilay an'i Abisay rahalahy i Joaba avao koa ndrozy ka le nimpoly tan-tanà any. Bakeo nimpoly baka amy ty olo lako i Amona ao i Joaba sady noly ta Jerosalema any. ¹⁶ Lafa hita Syriana rey fa resy Israely rey ndrozy, le nandefa fanampy-hery baka Andafy ty Ony Eofrata any ndrozy, niaraky tamy i Sofaka azy mpifehy ty tafiky i Hadarezera. ¹⁷ Lafa nivola zay i Davida, le namory an'i Jordana, sady avy tamin-drozy eo. Nandahatsy ty tafiky ho amy ty aly hanohitsy Syriana rey ie, sady nialy taminy ndrozy. ¹⁸ Nilay an'Israely ty Syriana, sady Davida namono mpiondra-kalesa Syriana fito arivo noho maramila mpandeha tomboky efatsy aly. Nivonoany avao koa i Sofaka, azy mpifehy ty tafiky iny. ¹⁹ Lafa hita mpanjaka iaby rey ze mpiasa i Hadarezera fa resin'Israely ndrozy, le nilongo tamy i Davida ndrozy sady nanompo androzy. Ka le tsy maniry ty hanampy Amonita rey sasy ty olo lako i Syria.