¹ Aza mirehareha amin'ny amaraigna, fa tsy fantatrao ze mety havôkan'ny gniany. ² Ôka ôlon-kafa no handoka an'nao fa tsy ny vavanao ihany; ny vahiny fa tsy ny molotrao ihany. ³ Saigno ny havesatry ny vato sy ny lanjan'ny fasika__ ny fikatsian'ady ataon'ny adala de mavesatra noho reo rôy reo. ⁴ Maseka ny havignirana ary misafôka ny hasosena, fa iza no afaka hitsangana akeo agnolônan'ny hasarotam-piaro? ⁵ Aleo anatra sambimaso toy izay fitia asitrika. ⁶ Azo atokisana ny ratra ataon'ny namana, fa ny fahavalo de mety hagnoroka mitafotafo an'nao. ⁷ Ny ôlà ze nihinana mandra-pahavoky de mandà na de ny rôgin-tintely aza, fa ho an'ny ôlà nôna kosa, de mamy ny ra-mangidy daôly. ⁸ Ôtran'ny vorogna ze mirenireny miala amin'ny akaniny ny ôlà ze maniasia miala am'tragnony. ⁹ Ny ranomagnitra sy emboka magnitra de mampifaly ny fo, fa ny hamamian'ny namana de tonga avy am'toroheviny amin-kitsim-po. ¹⁰ Aza mahafoy ny namanao sy ny rain'ny namanao, ary aza mankaigny am'tragnon'ny rahalànao amin'ny andro-pahavoazanao. Tegna tsara ny namana ze ankeky noho ny rahalà ze alavitra. ¹¹ Haregny, za ry zanako, de ampifalio ny foko; de hamaly an'le magneso anà za. ¹² Ny leilà mahira-tsaigna de mahatazagna ny loza ka misitrika, fa ny ôlà bado de magnatogna fôgna ka vôn'zany. ¹³ Alao ny akanjon'ze nagnome antoka am'vahiny, ary tano ho antoka zany rafa magnome antoka am'veivavy ratsy fitondran-tegna izy. ¹⁴ Na iza na iza magnome tso-drano ny namany am'feo mahery amin'ny andro ampôlakeka, de raisina ho ôtran'ny ozogna zany tso-drano zany! ¹⁵ Ny vady mpifanditra de salan'ny ora-mikija amin'ny andro fahavaratra; ¹⁶ ny mitana an'azy de ôtran'ny mitana rivotra, na miezaka mamihina menaka am'tagnanao ankavanana. ¹⁷ Ny vy mandragnitra vy; ôtran'zany, ny leilà mandrangitra ny namany. ¹⁸ Ze mikarakara ny kakazon'aviavy de hihinana ny vôny, ary ze miaro ny tompony de hamem-boninahitra. ¹⁹ Salan'ny talinjona agnaty ny rano amin'ny endriky ny ôlà, de ôtran'zany kô ny fon'ny ôlà amin'ny ôlà. ²⁰ Ôtran'ny Fiaignan-tsy hita sy ny Fandringanana tsy afa-po mandrakizay, de ôtran'zany ny mason'ny ôlà tsy ho afa-po mandrakizay. ²¹ Ny memy ho an'ny volafotsy ary ny fatagna fandrendrehana ho an'ny volamena; de am'fiderana an'azy no hisapana ny ôlà. ²² Na de totoinao am'fanoto aza ny adala__miaraka am'vary__de mbôla tsy hiala aminazy fôgna ny adalany. ²³ Atôvo azo antoka fa fantatrao ny toetran'ny ondrinao ary saigno ny momba an'reo biby tahirizinao, fa ²⁴ ny harena de tsy mandrakizay. Maharitra ho an'ny taranaka daôly ma ny satro-boninahitra? ²⁵ Rafa miala ny ahitra ary mitsiry ny solofony, de angonina avy aigny an-tanety ny ahitra ho an'reo ondry aman'osy. ²⁶ Reo zanak'ondry reo no hagnome ny fitafianao ary reo osy no hagnonitra ny saran'ny tany. ²⁷ Hisy rononon'osy ho an'ny ahaninao__ahanina ho an'ny tokantragnonao__ary ahanina ho an'ny mpanomponao vavy.