¹ Mino ny fagnanaran-drainy ny zanaka hendry, fa ny mpaniratsira de tsy mino anatra mintsy no de faizina mafy. ² Avy amin'ny vokatry ny vavan'ôla no ahazaôna ra tsara, fa ny mpamitaka kosa de magnomagna ady. ³ Ze mahafe ny vavany no miaro ny aignany, fa kasivava de mamotika ny tegnany ihany. ⁴ Ny ôla kamo de magniry nefa tsy mahazo na ino na ino, fa ny ôla mazoto kosa de hoafa-po am'ze ataony. ⁵ Ny ôla-marina de mankahala laingo, fa ny ôla ratsy fagnahy kosa de magnano ny tegnany ho mamparikoriko, ary magnano an'ze mamegnatra izy. ⁶ Ny fahamarinana de miaro an'reo ze mande tsisy tsigny, fa ny faharatsina de mamotika an'reo ze magnota. ⁷ Misy ôla mihambo ny tegnany ho mpanankarena, nefa tsy managno na ino na ino mintsy ary misy ôla mahafoy ny ra daôly, kanefa tegna manan-karena. ⁸ Ny harenan'ny ôla mpanan-karena no amonjeny ny aignany fa ny ôla mahantra tsy maregny fampitahôrana. ⁹ Ny hazavan'ny ôlo-marina de mazava tsara, fa ny jiron'ny ratsy fagnahy de hofoaty. ¹⁰ Fifandirana no vokatra ateraky ny avognavogna, fa ho an'reo ze mitaino toro-hevitra tsara no misy fahendrena. ¹¹ Hihegna ny harena rafa be lôtra ny zava-pôgna andaniana an'azy fa efa mitady vola amin'ny asan'ny tagnany de hampitombo ny volany. ¹² Refa mihegna ny fagnantignana, de mandratra fo zany, fa ny fagniriana tanteraka no kakazon'aigna. ¹³ Ze mankahala ny fampianarana de ahavery ny tegnany, fa ze magnaja ny didy de ahazo valisoa. ¹⁴ Ny fampianaran'ny ôlon-kendry de lôranon'aigna, miaro an'nao amin'ny fandriky ny fahafatesana. ¹⁵ Ny fahendrena tsara de ahazaôna fitia, fa ny lalan'ny mpamadika de ho sarotra mandrakizay. ¹⁶ Ny ôla mahiratsaigna de mandray ny fanapan-kevitra amin'ny fahaizana daôly, fa ny adala de mampiariary ny hadalany. ¹⁷ Ny iraka ratsy fagnahy de ho tafalatsaka agnaty fahorena, fa ny tsara kosa mitondra fampihavanana. ¹⁸ Ze tsy miraharaha fampianarana de ahantra sy ho megnatra, fa ho an'ze magneky ny fagnanarana sy fagnitsina ny voninahitra. ¹⁹ Ny fagnirina tanteraka de mamin'ny fo, fa ny adala mankahala ny fialàna amin'ny ratsy. ²⁰ Miaraha lalana amin'ny ôlon-kendry de ho hendry anao, fa ny naman'ny adala de hijaly amin'ny ratsy. ²¹ Magnenjika ny mpagnota ny loza, fa ny ôla-marina de amena valisoa amin'ny tsara. ²² Mamela lova hoan'ny zafiny ny ôla tsara, fa ny harenan'ny mpagnota de vôtahiry hoan'ny ôlo-marina. ²³ Ny tany ze tsy mbôla vôasan'reo mahantra de afaka mamokatra ahanina betsaka, fa vôfafa amin'ny tsy rariny zany. ²⁴ Ze tsy magnitsy ny zanagny de mankahala an'azy, fa ze te ny zanagny kosa de magnanatra sy magnafay an'azy tsara. ²⁵ Ny ôlo-marina de ihinana mandra-pahavokiny, fa ny kebon'ny ratsy fagnahy de ho nôna isan'andro isan'andro.